Коронавирусым ищынэгъуагъэкIэ непэ зэтемыфэрэ еплъыкIэхэр щы­Iэх. Бельгием иврач купмэ яджэпсалъэ ковидым щынагъоу пылъымкIэ лъэшэу рагъэхъоу, бырсыр бащэ къаIэтэу къыщаIо.

ИгъэкIотыгъэу цIыфхэр непэ мы Iофыгъом тегущыIэх. Москва дэт къэлэ клиникэ сымэ­джэщэу N 15-м иврач шъхьаIэу Валерий Вечерко телъэIугъ Бельгием иврачхэм яджэпса­лъэкIэ еплъыкIэу иIэм тыщигъэ­гъозэнэу. Ар зипэщэ сымэ­джэщым чэщи мафи ямыIэу коронавирусымкIэ сымаджэхэм щяIазэх. «Лъэныкъо плъы­жьым» щылэжьэрэ специалистым къытфиIотагъэхэм нэIуасэ шъуафэтэшIы.

— Ары, Бельгием иврачхэм джэпсалъэу къашIыгъэм се­джагъ, — къеIо Валерий Иван ыкъом. — Бельгием имедицинэ щысэтехыпIэу зыкIи щытыгъэп. Сэри, сиIофшIэгъухэми щысэ къэтхьын тлъэкIыщтэп дэ­гъоу къеIэзэнхэу сымаджэхэм ащыщ горэ мы хэгъэгум агъэкIуагъэу. Ар Бельгием иврачхэм яджэпсалъэмэ, лъэкъуацIэ гори сыда зыкIыкIэмытыр? Ар зэхэзгъэуцуагъэхэм коронавирусыр къызэутэлIагъэ алъэгъугъэпщтын. Тэ мафэ къэси ахэм тахэт. Ары, Iофхэр зы­щынахьышIуи, зыщынахь дэий къыхэкIы. Ащ фэдэ сымаджэхэм тызяIазэрэр мэзи 8 хъугъэ. Вирусым инэшанэхэм зэхъокIыныгъэхэр афэхъоу къаIоу зэхэтэхы. Ау кIэух зэфэхьысыжьхэр пшIынкIэ джыри жьыIо.

Гриппым ивирус фэдэу ковидым ивируси зэхъокIыны­гъэхэр фэхъухэу бэмэ къаIо. Тыди ахэр щызэрагъапшэх. Ковидым нахьи гриппым на­хьыбэ илIыкIэу пчъагъэхэр къа­хьых. Ау къэIогъэн фае ахэм къэбарэу аIэкIэлъхэр жъы зэ­рэхъугъэр, хьадэгъур къызы­лъыIэсырэ пчъагъэмкIэ ковидыр джыдэдэм апэ зэришъы­гъэр. Бельгием иврачхэм яджэ­псалъэ къыщеIо нэгурыхъор, Iалъэхэр зэрагъэфедэхэрэм, социальнэ дистанциер къызэ­рэдалъытэрэм яшIуагъэ къэ­мыкIоу, жьым нахьыбэрэ хэтхэмэ, спортым пылъхэмэ, тэ­рэзэу шхэхэмэ ковидым щыухъумагъэ хъущтхэу.

АщкIэ сэ еплъыкIэу сиIэр мыщ фэд. Мафэ къэс тисы­мэджэщ нэбгырэ 200-м ехъу къащэ. Ахэм бомжи, ешъуакIуи ахэтэп, щыIэкIэ-псэукIэ тэрэзми рэгъуазэх. Сыда адэ ахэм зэпахырэ узыр къазыкIыпыпкIэрэр? ЕтIани къэIогъэн фае хьадэгъур къызылъыIэсыхэрэм «лъэныкъо плъыжьым» щылэжьэрэ медицинэ Iофы­шIэхэр бэу къазэрахафэхэрэр.

Ащ фэдэ джэпсалъэм гъэ­тхапэм седжэгъагъэмэ, ащ фэ­дизэу мэхьанэ естыщтгъагъэп. Ау мэзибгъу фэдизрэ «лъэныкъо плъыжьым» сызыщылэ­жьэгъэ, нэбгырэ 28000-м ехъу­мэ тызяIэзэгъэ нэуж ащ итхэм лъапсэ зэрямыIэр къасIо сшIоигъу. Жьэу яIазэхэу зэрэрагъажьэзи, мы узым кIэухэу фэхъущтыр загъорэ къэшIэ­гъуай. Джэпсалъэр зэхэзыгъэуцуагъэхэр врачмэ, коронави­русым тхьабыл уз хьылъэхэри, аритмиери, тромбозри къа­кIэлъыкIон зэрилъэкIыщтыр ашIэн фае. ЩыIэкIэ-псэукIэ тэ­рэз закъокIэ ахэм апэуцужьыгъуай.

Документыр еджэгъошIоу щыт, Гиппократ итхьэрыIуи ­щы­гъэфедагъ, ау ащ лъапсэ зэримыIэм еджэхэрэм гу лъа­тэрэп. Коронавирусыр мыщынагъоу аIоным нахьи, сыма­джэхэм яIазэхэмэ, ящыIэныгъэ къагъэнэжьымэ нахьышIугъ. Узым къытыригъэзэжьыщт-къытыримыгъэзэжьыщтыр къэшIэгъуай. Ау сымаджэхэм япчъагъэ джыдэдэм зэрэхахъорэр сыд фэдэрэ хэгъэгуи щигъэзыен ылъэкIыщтэп.