«ЦIыфхэм япсауныгъэ  нахь лъапIэ щыIэп»

Зэпахырэ узэу коро­навирусыр къызэутэкIы­гъэмэ япчъагъэ лъэшэу хахъоу зэриублэжьыгъэр гумэкIыгъошхоу къэуцухэ­рэм ащыщ. COVID-19-кIэ зэджа­гъэхэм ятIонэрэу къытыригъэзэжьыгъэу зе­ушъомбгъу.

Тишъолъыр пштэмэ, чэщ-зымафэм ар нэбгырэ 70-м ехъурэмэ къяу­тэкIыгъэу къызыщыхэ­кIыгъэ мафэхэр агъэу­нэфыгъэх.

Коронавирусыр къы­зэуалIэхэрэм япчъагъэ зэ­рэхэхъожьырэм ыгъэгу­мэкIэу иеплъыкIэ къыри­IотыкIыгъ бзэхэр зыщы­зэрагъэшIэрэ гупчэу «Активым» ипащэу,

Адыгэ Хасэм хэтэу Едыдж Мэмэт.

— Апэу къыхэзгъэщымэ сшIоигъор нэбгырэ пэпчъ ипсауныгъэ, ищыIэныгъэ фэсакъын, цIыфэу къэзыуцухьэхэрэми ягупшысэн зэрэфаер ары. ШIэхэу илъэс хъущт мы гумэкIыгъор къызежьагъэр ыкIи ащ зыщытыухъумэнымкIэ амалэу щыIэхэм икъоу хэшIыкI афытиIэ хъугъэ. Ау пстэуми шIокI имы- Iэу ахэр зэрамыгъэцакIэхэрэр тэрэзэп. Тучаным изакъоп, тыдэ укIуагъэми нэгуихъор бгъэфедэным, нахьыбэрэ пIэ­хэр птхьа­кIынхэм къин хэлъэп. Джащ фэдэу цIыфхэм азыфагу илъ зэпэчыжьагъэми мэхьанэ иI, ар на­хьыбэ къэс нахьышIу.

Джэгухэр, сэдэкъэшхынхэр, нэмыкI Iофтхьабзэхэу цIыфыбэ зыхэла­жьэ­хэрэр шъэфэу зэрашIы­хэрэр мытэрэзэу тигущы­Iэгъу ылъытагъ. Шъыпкъэ, къиныри хъярыри цIыфым ищыIэныгъэ ды­хэтых, ау вирусыр зэрэщынагъор зыщыдгъэгъу­пшэ хъущтэп.

— ЦIыфым ипсауныгъэ нахь лъапIэ щыIэп, ар ыпэ идгъэшъынэу щыт. Адыгеим и ЛIышъхьэу КъумпIыл Мурат коронавирусым зимыушъомбгъу­нымкIэ къышIыгъэ уна­шъохэм адедгъэштэн, зэхэтшIыкIынхэ фае, — хигъэу­нэфыкIыгъ Едыдж Мэмэт.

Бзэхэр зыщызэрагъа­шIэрэ гупчэм нэбгырабэ зэрэщеджэрэм елъытыгъэу санитарнэ шапхъэхэр икъу фэдизэу щагъэцакIэх. Еджэгъу сыхьатыр аухы къэс классхэр дезинфекцие ашIых: Iанэхэр, пхъэн­тIэкIухэр, джэхашъор, пчъэ къопсхэр атхьакIых, ви­русыр зыгъэкIодырэ остыгъэхэр щыхагъанэх. Ыпэ­кIэ классхэм нэбгыри 10 — 12 исэу рагъаджэщтыгъэхэмэ, джы ар 6-м на­гъэсыгъ.

Iэшъынэ Сусан.