Чъэпыогъум и 8-м Аскъэлае культурэм и Унэ Iоф щызышIэхэрэм чIэнэгъэшхо тшIыгъэ, игъонэмысэу ГъукIэлI Мае идунай ыхъожьыгъ. Къоджэдэсхэми ар гукъэошхо ащыхъугъ.

Мае илъэс 38-рэ Аскъэлэе къоджэ клубым Iоф щишIагъ. Адыгэ лъэпкъым фэгумэкIэу тикультурэ, тихабзэ, тишэн-зэ­хэтыкIэхэм якъызэтегъэнэн иIахьышIу хишIыхьагъ. Ар къэзгъэшъыпкъэрэр театрэм ролэу къыщищIыгъэхэр, орэдэу къыIощтыгъэхэр, ипщынэ мэкъэмэ дахэхэр ары.

Илъэс пчъагъэм сэнаущы­гъэу хэлъыр сабый цIыкIухэм алъигъэIэсыгъ. Ащ ыгъэсэгъэ сабыйхэм республикэм, Краснодар краим, районым ащызэхащэгъэ зэнэкъокъухэм хагъэунэфыкIырэ чIыпIэхэр къащахьыгъэх.

Мае пщынэ Iапэм апэ тыригъэIэбагъэмэ зэу ащыщ Адыгэ къэралыгъо къэшъокIо ансамблэу «Налмэсым» ипщынаоу Шэуджэн Адам.

Аужрэ илъэсхэм Мае Iоф зыдишIэгъэ Талъэкъо Заирэ ныбжьыкI нахь мышIэми, пщы­нэо цIэрыIо хъугъэ, ипщынэ мэкъамэ къалэу Шъачэ щыIугъ.

Мае IофшIэным ыгу етыгъэу зэрэпылъыгъэм имызакъоу, лIакъоу зыхэсыгъэр ыгъэдэхагъ, ыгъэбэгъуагъ.

ГъукIэлI Тыркубыйрэ Маерэ унэгъо дахэ зэдашIагъ, адыгэ шэн-хабзэм тетэу ясабыйхэр апIугъэх. Мае ныбжьыкIэу шъу­забэу къэнагъэми, исабыищ апшъэрэ гъэсэныгъэ аригъэгъо­тыгъ, гъогу дахэ тыригъэуцуагъэх.

Мае ицIыфышIугъэрэ ихъуп­х­ъагъэрэ чылэм щызэлъашIэ. Ищыпс пIастэрэ ихьалыгъу хьакушэрэ зыIумыфагъэ чылэм дэсэп пIоми ухэукъощтэп. Ащ ихьалыгъу гъэжъакIэ ищытхъу ехъу хэмылъэу тирайон ыцIэкIэ 2019-рэ илъэсым зэхащэгъэ республикэ фестивалэу «Адыгэ хьалыжъом» лъэныкъоу «Нанэ ихьалыжъу» зыфиIорэм хэлэ­жьэгъагъ.

ГъукIэлI Мае иIахьылхэм, иблагъэхэм тафэтхьаусыхэ, Тхьэм джэнэт лъапIэ къырет, лъфыгъэу къыщинагъэхэм, икъо­рэлъф цIыкIухэм тафэлъаIо псауныгъэрэ гъэшIэ кIыхьэрэ яIэнэу. Ялъфыгъэхэм яхъяр нахь амылъэгъоу ягъашIэ къырыкIонхэу.

Аскъэлае щыпсэухэрэм ацIэкIэ культурэм и Унэ иIофышIэхэр.