2010-рэ илъэсым къыщегъэжьагъэу Адыгэ республикэ клиническэ онкологическэ диспансерым бгъэм адэбз уз къыхэмыкIыным фэгъэхьыгъэ Iофтхьабзэ зэхещэ. Ащ къыдыхэлъытагъэу чъэпыогъум и 15-м къыщегъэжьагъэу шэкIогъум и 15-м нэс лекциехэр, зэдэгущыIэгъухэр рагъэкIокIых. Уз бзаджэм зызэрэщаухъумэщтыр цIыфхэм къафаIуатэ, онлайн шIыкIэм тетэуи Iофтхьабзэхэр рагъэкIокIых.

Адэбз уз зиIэ бзылъфыгъэхэм IэпыIэгъу афэхъурэ купэу «От сердца к сердцу» зыфиIорэм мы гумэкIыгъом епхыгъэ къэбар зафэр цIыфхэм аIэкIагъэхьанымкIэ IофшIэнышхо зэшIуехы. ЫпэкIэ зигугъу къэтшIыгъэ купыр 2018-рэ илъэсым зэхащагъ, ащ бзылъфыгъэ 50 хэт. Ахэм врач-онкологхэмрэ психологхэмрэ ренэу IэпыIэгъу афэхъух.

Адыгэ Республикэм псауныгъэр къэухъумэгъэнымкIэ и Министерствэ къызэрэщаIуагъэмкIэ, бгъэм адэбз уз иIэу процент 11,6-мэ къахагъэщыгъ. Мы уахътэм адэбз къызхагъэщыгъэ нэбгырэ 1060-мэ ащыщэу 123-мэ бгъэм узыр иIэу агъэунэфыгъ. Мыр нахьыбэрэ цIыфмэ къяутэкIырэ узхэм ащыщ. Анахьэу къызхагъэщыхэрэр бзылъфыгъэхэу зыныбжь илъэс 55-м къыщегъэжьагъэу 59-м нэс, 60-м къыщыублагъэу 70-м нэс.

Непэрэ мафэм ехъулIэу бгъэм адэбз уз къыхагъэщыгъэу нэбгырэ 2230-рэ онкологическэ диспансерым иучет хэтых. Шъугу къэтэгъэкIыжьы, лъэпкъ проектэу «Псауныгъ» зыфиIорэм пшъэрылъ шъхьаIэу иIэхэм ащыщ адэбз узым илIыкIэрэмэ япчъагъэ нахь макIэ шIыгъэныр. Мыгъэ шъолъыр проектэу «Адэбз узым пэшIуекIогъэныр» зыфиIорэм къыдыхэлъытагъэу медицинэ оборудование 22-рэ республикэм зэригъэгъотынэу егъэнафэ. Ащ сомэ миллион 17,4-рэ пэIухьащт.

Абрэдж Сэтэнай.