Адыгэ Республикэм и ЛIышъхьэу КъумпIыл Мурат Москва зэкIом, Урысые Федерацием и Правительствэ и Тхьаматэ игуадзэу Дмитрий Чернышенкэм IукIагъ.

Шъугу къэтэгъэкIыжьы Урысые Федерацием и Президентэу Владимир Путиныр Адыгэ Республикэр зызэхащагъэр илъэси 100 зэрэхъурэр 2022-рэ илъэсым хэгъэунэфыкIыгъэным ехьылIэгъэ Указым 2017-рэ илъэсым ичъэ­пыогъу зэрэкIэтхагъэр. Урысые Федерацием ивице-премьерщтыгъэ Виталий Мутко япащэу зэхэщэкIо комитетым тапэкIэ зэхэсыгъо заулэ иIагъ. Урысые Федера­цием культурэмкIэ и Министерствэ ягъусэу Iоф­тхьабзэу зэрахьащтхэм яплан зэхагъэуцуагъ ыкIи аухэсыгъ. А Iоф­тхьабзэхэм ащыщхэм язэхэщэн фежьагъэх.

Адыгэ Республикэм и ЛIышъхьэ Урысые Федерацием и Правительствэ и Тхьаматэ игуадзэ зэIукIэгъум тхьауегъэ­псэу щыриIуагъ Адыгеим иавтономие илъэси 100 гъогууанэ къызэрикIугъэм фэгъэхьыгъэ Iофтхьабзэхэм язэхэщэнкIэ федеральнэ гупчэр IэпыIэгъу къазэрафэхъурэм фэшI.

КъумпIыл Мурат джащ фэдэу Iоф­тхьабзэу джыдэдэм зэрахьэхэрэми, тапэкIэ зэхащэщтхэми ягугъу къышIыгъ. Планым къызэрэщыдэлъытагъэм тетэу цIыфхэр жъугъэу зыхэлэжьэщт культурэ Iофтхьабзэхэр, къэгъэлъэгъонхэр, зэнэ­къокъухэр, театрэхэм, концертхэр зэхэзыщэрэ организациехэм якъэгъэлъэгъон­хэр, дунэе, шъолъыр мэхьанэ зиIэ фестивальхэр щыIэщтых. Ткъош респуб­ликэхэу Къэбэртэе-Бэлъкъарми, Къэ­рэщэе-Щэрджэсми къэралыгъо гъэпсыкIэ яIэ зыхъугъэм ыуж лIэшIэгъу гъогууанэ къызэракIугъэм епхыгъэ мэфэкIым ихэгъэунэфыкIынкIэ проект заулэ зэдагъэцэкIэнэу рахъухьэ.

Культурэ-тарихъ альбомхэм, каталог­хэм, краим ихъишъэ къэзыIотэрэ тхылъхэм якъыдэгъэкIын зыфагъэхьазыры, тарихъ-документальнэ фильмэу «Становление» зыфиIорэмрэ адыгэ пшысэхэм атехыгъэ анимационнэ фильмэу «Тым иосыетхэр» зыфиIорэмрэ язэхэгъэуцон дэлажьэх.

Ахэм анэмыкIэу инфраструктурэхэм ягъэпсын, социальнэ учреждениехэм ягъэкIэжьын атегъэпсыхьэгъэ Iофтхьаб­зэхэри зэрахьанхэу рахъухьэ. ЦIыфхэм ящыIэкIэ-псэукIэ зыкъегъэIэтыгъэнымкIэ, фэIо-фашIэхэм ягъэцэкIэнкIэ, инвестициехэр нахьыбэу республикэм къыха­лъхьанхэмкIэ ахэм мэхьанэшхо зэряIэр Адыгеим и ЛIышъхьэ къыхигъэщыгъ. Учреждениехэу агъэцэкIэщтхэм респуб­ликэмкIэ мэхьанэшхо зэряIэр, Адыгеим щыпсэурэ цIыф лъэпкъыбэмэ якультурэ кIэн икъэухъумэнкIэ ахэм пшъэ­рылъышхо зэрагъэцакIэрэр ащ къыIуагъ.

Ахэм зэу ащыщ федеральнэ, шъо­лъыр мэхьанэ зиIэ саугъэтэу агъэцэкIэжьыгъэр. Ар Зэкъошныгъэм исаугъэтэу Адыгеир Урысыем зэрэхэхьагъэм фэгъэхьыгъэу агъэуцугъэр ары. Джащ фэдэу искусствэхэмкIэ Адыгэ республикэ колледжэу Тхьабысымэ Умарэ ыцIэ зыхьырэм игъэцэкIэжьын макIо, искусствэхэмкIэ республикэ еджапIэу Лъэцэрыкъо Кимэ ыцIэ зыхьырэм игъэцэкIэжьын аухы. Къихьащт илъэсым Адыгэ Республикэм сурэтхэмкIэ игалерее, Адыгэ Республикэм лъэпкъ культурэмкIэ и Гупчэ гъэцэкIэжьын IофшIэнхэр ащыкIощтых.

Адыгеим и ЛIышъхьэ ыпэкIэ игъоу ылъэгъугъагъэхэр Iофтхьабзэхэм яплан хагъэхьэгъагъэх, федеральнэ гупчэми ахэм къадыригъэштэгъагъ. Ахэм ащыщ­хэр агъэцэкIэгъахэх.

КъумпIыл Мурат Дмитрий Чернышенкэм зыIокIэм, псэолъэшIыным, культурэм, псауныгъэм икъэухъумэн, спортым япхыгъэ псэуалъэхэм, общественнэ чIыпIэхэм, транспорт инфраструктурэм ягъэпсынрэ ягъэкIэжьынрэ япхыгъэ проектхэу республикэмкIэ мэхьанэшхо зиIэхэр зэрагъэцэкIэщтхэм атегущыIагъэх.

Джащ фэдэу культурэмкIэ, спортымкIэ, зекIонымкIэ къэралыгъо программэхэр, лъэпкъ проектхэр Адыгеим щыпхырыщыгъэнхэм япхыгъэ Iофыгъо­хэри зэIукIэгъум къыщаIэтыгъэх.

Лъэпкъ проектхэмрэ Адыгэ Респуб­ликэм ия 100-рэ илъэс ихэгъэунэфыкIынрэ къадыхэлъытэгъэ Iофтхьабзэхэм Урысыем и Правительствэ и Тхьаматэ игуадзэ къадыригъэштагъ. Федеральнэ IэпыIэгъу зищыкIэгъэ проектхэмкIэ Урысые Федерацием и Правительствэ иведомствэхэу зытефэхэрэм пшъэрылъ гъэнэфагъэхэр афашIыщтых.

Адыгэ Республикэм и ЛIышъхьэ ипресс-къулыкъу