«Театр у трех дорог» зыфиIорэ театрэм экологием епхыгъэ проектымкIэ мыгъэрэ сезоныр къызэIуихыгъ. Ащ къыдыхэлъытагъэу шэмбэт шIыхьаф Адыгеим щырагъэкIокIыгъ, «Хочешь спасти природу, начни с себя» зыфиIорэ акцие зэхащагъ.

Театрэм хэт артистхэр пчэгум итхэу чIыопсым икъэухъумэн лъыплъэныр пшъэрылъ шъхьаIэу нэбгырэ пэпчъ зыфигъэуцужьын зэрэфаер къа­Iуагъ, пыдзафэхэм тэрэзэу цIыфхэр адэзекIонхэм мэхьанэшхо зэриIэр къыхагъэщыгъ.

— Экологием фэгъэхьыгъэ къэбархэм кIэлэцIыкIыкIухэр ащыдгъэгъозэнхэм мэхьанэшхо иI. Ащ къыхэкIэу мы темэр зыпхырыщыгъэ спектакль зэхэдгъэуцуагъ. Бжъэм хэшIыкIыгъэ пыдзафэхэмкIэ чIыопсыр зэраушIоирэр непэ гумэкIыгъо шъхьаIэу къэуцу. ИцIыкIугъом къыщегъэжьагъэу сабый пэпчъ ышIэн фае бжъэр къыдагъэкIыжьын зэралъэкIыщтыр. Зыныбжь икъугъэхэми ар ащыгъупшагъэмэ, агу къэдгъэкIыжьын гухэлъ тиI, — къыIуагъ режиссерэу Сергей Переверткиным.

Адыгеим псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ Iофтхьабзэм кIэщакIо фэхъугъэ активистхэм IэпыIэгъу афэхъу. Мыщ фэдэ проектхэм яшIуагъэкIэ къыткIэхъухьэрэ ныбжьыкIэхэр чIыопсым икъэбзэныгъэ алъэгъун, ащ фэдэ гуIэтыпIэм щыпсэунхэ амал яIэщт.

(Тикорр.).