ГъогурыкIоныр щынэгъончъэнымкIэ респуб­ликэ Комиссием зичэзыу зэхэсыгъоу мы ма­фэхэм иIагъэр видеозэпхыныгъэм тетэу рекIокIыгъ. Iофтхьабзэр Адыгэ Респуб­ли­кэм и Премьер-министрэу Геннадий Митро­фановым зэрищагъ.

Зэхэсыгъор пэублэ псалъэкIэ къызэIуихызэ, Адыгеим и ЛIы­шъхьэу КъумпIыл Мурат иунашъокIэ зэрэзэрэугъоигъэхэр ыкIи гъогу хъугъэ-шIагъэхэр къызыхэкIыхэрэм яIофыгъохэр дагъэзыжьынхэм ар ышъхьэкIэ зэралъыплъэрэр Премьер-министрэм къыIуагъ. Нэужым IофыгъуиплIэу зыхэплъэнхэу агъэ­нэфагъэхэм ягугъу къышIыгъ.

Апэрэ Iофыгъо шъхьаIэу къы­щаIэтыгъэр гъогурыкIоныр щы­нэгъончъэнымкIэ, кIэлэцIыкIу фыкъоныгъэхэр дэгъэзыжьы­гъэнхэмкIэ, авариехэм япчъагъэ нахь макIэ шIыгъэнымкIэ Iоф­тхьабзэу Адыгеим щызэра­хьэ­хэрэр ары. Мыщ епхыгъэу къэ­­гущыIагъ гъогурыкIоныр щы­­нэгъончъэнымкIэ Къэралыгъо автоинспекцием и ГъэIорышIапIэу АР-м щыIэм ипащэу Александр Курпас. Ащ къызэриIуагъэмкIэ, мы илъэсым имэзибгъу республикэм игъогухэм хъугъэ­шIэгъэ 338-рэ къатехъухьагъ, ахэм нэбгырэ 51-рэ ахэкIодагъ, 404-мэ шъобж зэфэшъхьафхэр атещагъэхэ хъугъэ.

ГъэIорышIапIэм ипащэ къызэрэхигъэщыгъэмкIэ, хъугъэ-­шIагъэхэм лъапсэу афэхъухэрэм ащыщых водительхэм ма­ши­нэхэр псынкIащэу зэрэзэра­фэхэрэр, ыпэкIэ къэкIорэ автотранспортым игъогу техьэхэу къызэрэхэкIырэр, лъэсрыкIохэм шапхъэхэр зэраукъохэрэр, нэмыкIхэри.

— Республикэм къыщыхъурэ авариехэм япчъагъэ къы­щыкIагъ нахь мышIэми, ешъуагъэу рулым кIэрысыгъэ водительхэм апкъ къикIыкIэ къэхъу­гъэ хъугъэ-шIагъэхэм ахэхъуагъ, — къыIуагъ Александр Курпас. — Гъогу хъугъэ-шIагъэхэм ахэ­кIуадэхэрэм япчъагъэ анахьэу зыкъызыщиIэтыгъэр Теуцожь ыкIи Джэджэ районхэр, Адыгэ­къал. Авариехэм апкъ къикIыкIэ зидунай зыхъожьыхэрэм япчъагъэ нахь макIэ шIыгъэнымкIэ лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэм пшъэрылъэу къытфигъэуцурэр хэкIуадэрэр нэ­бгырэ 54-м шIокIы мыхъущтэу ары. Мэзи 9 зэфэхьысыжьхэм къызэрагъэлъэгъуагъэмкIэ, ти­шъолъыр а пчъагъэр нэбгырэ 51-рэ.

Гъогу инспектор шъхьаIэм зигугъу къышIыгъэхэм ащыщ комиссием иблэкIыгъэ зэхэ­сыгъо къыщаIэтыгъэ Iофыгъоу Мыекъуапэ иобъект 17-у гъэцэ­кIэжьынхэр зыщыкIуагъэхэм щы­кIагъэу яIэхэр ащ фэгъэзагъэхэм джыри зэрэдамыгъэ­зы­жьыгъэ­хэр. Джащ фэдэу фе­деральнэ гъогухэу, авариехэр нахьыбэу зыщыхъурэ чIыпIэ 16-мэ, къэнэ­фырэ пкъэухэр зы­тырагъэуцон­хэу рахъухьэгъа­гъэр гъэцэкIагъэ зэрэмыхъу-гъэм анаIэ тыраригъэдзагъ.

Сабыйхэр зыхэфэгъэ хъугъэ­шIагъэхэм япчъагъэ процент 20-кIэ къеIыхыгъ. КIэлэцIыкIу-хэм ящынэгъончъагъэ къэухъу­мэгъэным фэшI блэкIыгъэ илъэ­сым ибэдзэогъу къыщыублагъэу еджапIэхэм яублэпIэ классхэм арысхэм нэфынэ къэзытырэ ны­балъэхэр агъэфедэхэу рагъэ­жьагъ. Пандемием ыпкъ къикIы­кIэ инспекцием иIофышIэхэм еджапIэхэм ащызэрахьэщтыгъэ Iофтхьабзэхэм къазэращыкIа­гъэр Александр Курпас къыIуагъ.

— ГъогурыкIоныр щынэгъончъэным епхыгъэ унашъохэу тшIыхэрэм ялъытыгъ тицIыфхэм япсауныгъэ ыкIи ящыIэныгъэ ухъумагъэ зэрэхъущтыр. Хъу­гъэ-шIагъэхэр нахь макIэ тшIынхэм пае къыттефэрэр зэкIэ шIокI имыIэу зэшIотхынхэ, щы­кIагъэхэр дэдгъэзыжьынхэ фае, — къыIуагъ Геннадий Митрофановым.

ГущыIэр лъигъэкIотагъ Адыгэ Республикэм гъэсэныгъэмрэ шIэ­ныгъэмрэкIэ иминистрэу КIэ­рэщэ Анзаур. КIэлэегъаджэ­хэм инспекторхэр ягъусэхэу гъогурыкIоныр щынэгъончъэнымкIэ республикэм ит гъэсэныгъэм иучреждениехэм ащызэрахьэрэ Iофтхьабзэхэм игъэ­кIотыгъэу ар къатегущыIагъ. Ахэм ащыщых ублэпIэ классхэм арысхэр еджапIэм къызэрэкIощтхэр ыкIи унэм зэрэ­кIожьыщтхэ щынэгъончъэ гъогу къыхахыным, шапхъэхэр агъэцэкIэнхэм, нэфынэр къэзытырэ пкъыгъохэр агъэфедэнхэм фэгъэсэгъэнхэр.

Министрэм къызэрэхигъэщыгъэмкIэ, ныбжьыкIэ инспектор­хэм яотряди 141-мэ Iоф ашIэ, ахэм нэбгырэ 1750-рэ ахэхьэ. Ахэр федеральнэ ыкIи респуб­ликэ зэнэкъокъухэм ахэлажьэх, гъэхъагъэхэр ашIых. Сэнэхьат зэфэшъхьафхэр зыщызэрагъэгъотырэ гурыт еджапIэхэм аще­джэхэрэми апае сыхьатхэр афы­зэхащэх. Гъогу хъугъэ-шIагъэхэм ящысэхэр къизыIоты­кIырэ фильмэхэр нэрылъэгъу афашIых, сакъыныгъэрэ гулъы­тэрэ гъогум къызщыхагъэфэнхэу, шапхъэхэр шIокI имыIэу агъэцэкIэнхэу ахэм зафагъазэ.

УблэпIэ классхэм арысхэм ящынэгъончъагъэкIэ мэхьанэ­шхо зиIэ нэфынэ къэзытырэ ныба­лъэхэм ягъэфедэнкIэ, ащ мэхьа­нэу иIэр къагурыгъэIогъэнымкIэ хэбзэухъумакIохэм, ны-­тыхэм IофшIэныр джыри нахь агъэлъэ­шын зэрэфаер республикэм и Премьер-министрэ хигъэунэфыкIыгъ. Мыгъэ ныбалъэхэр зыфимыкъугъэхэ щыIэмэ, гъэсэныгъэмрэ шIэныгъэмрэкIэ министрэм зэхифынэу ащ риIуагъ.

Шъолъыр проектэу «Адыгеим иавтомобиль гъогухэр щынэ­гъончъэнхэр ыкIи шэпхъэшIухэм адиштэнхэр» зыфиIорэм игъэцэкIэн къыдыхэлъытагъэу 2020 — 2024-рэ илъэсхэм къакIоцI федеральнэ ыкIи республикэ гъогухэм сурэт ыкIи видео тезыхырэ пкъыгъо 99-рэ атырагъэуцон фае. Ащ фэгъэхьыгъэу къэгущыIагъ АР-м псэолъэшIынымкIэ, транспортымкIэ, псэу­пIэ-коммунальнэ ыкIи гъогу хъыз­мэтымкIэ иминистрэу Валерий Картамышевыр. Мы илъэ­сым ащ фэдэ пкъыгъо 52-рэу агъэуцунэу агъэнэфагъэм сомэ миллиони 146-рэ пэIухьащт. Министрэм къызэриIуагъэмкIэ, анахь чIыпIэ щынагъохэу Адыге­им и Къэралыгъо автоинспекцие къыгъэнэфагъэхэм камерэ 20 аты­рагъэуцогъах, федеральнэ мэхьанэ зиIэу гъогоу М-4 «Дон» зыфиIорэм ащ фэдэ пкъыгъуи 7 щагъэпсынымкIэ зэзэгъыныгъэм кIэтхэгъахэх. Федеральнэ гъогу агентствэм Iизын къызитыкIэ, мы илъэсыр имыкIызэ джыри камерэ 25-рэ федеральнэ мэхьанэ зиIэ гъогухэм атырагъэуцощтых.

Гъогухэм яшIын ыкIи ягъэцэкIэжьын, ахэр зэрифэшъуашэу къэгъэнэфыгъэнхэм, щынэгъончъэным фытегъэпсыхьэгъэ пкъыгъохэр, тамыгъэхэр гъогу­хэм атегъэуцогъэнхэм, нэмыкI Iофыгъуабэм комиссием хэтхэр атегущыIагъэх, унашъохэри ашIыгъэх.

Iэшъынэ Сусан. Сурэтхэр Iэшъынэ Аслъан тырихыгъ.