АР-м и ЛIышъхьэу КъумпIыл Мурат Iахьзэхэлъ обществэу «Россельхозбанкым» и Адыгэ шъолъыр къутамэ ипащэу Борсэ Къэплъан Правительствэр зычIэт Унэм зэIукIэгъу щыдыриIагъ. Ащ хэлэжьагъэх АР-м и Премьер-министрэу Геннадий Митрофановыр, ащ игуадзэу Сапый Вячеслав, АР-м экономикэ хэхъоныгъэмкIэ ыкIи сатыумкIэ иминистрэ игуадзэу Былымгъот Иб­рахьим ыкIи мэкъумэщ хъызмэтымкIэ министрэм игуадзэу Хъут Дамирэт.

Республикэм имэкъумэщ хъызмэт хэхъоныгъэхэр егъэшIыгъэнхэм фытегъэ­псыхьэгъэ къэралыгъо программэхэм къащыдэлъытагъэхэм ыкIи банкым ипроектхэм япхырыщынкIэ Iоф зэрэзэдашIэщтым тегущыIагъэх.

Къуаджэм хэхъоныгъэхэр егъэшIыгъэн­хэм, цIыфэу ащ дэсхэм ящыIакIэ нахьышIу шIыгъэным афытегъэпсыхьэгъэ IэпыIэгъоу банкым къытыхэрэр, предложениеу къыхьыхэрэр нахь чанэу республикэм щыпхырыщыгъэнхэ фаеу зэрилъытэрэм АР-м и ЛIышъхьэ къыкIигъэтхъыгъ. Мары мы илъэсэу тызыхэтым къоджэ псэупIэхэм хэхъоныгъэхэр ягъэшIыгъэнхэм фэгъэхьыгъэ къэралыгъо программэр пхырыщыгъэным пае «Сельская ипотека» зыфиIорэ проектыр «Рос­сельхозбанкым» рихьыжьагъ.

Ащ Адыгеир чанэу зэрэхэлажьэрэр зэIукIэгъум къыщыхагъэщыгъ. Борсэ Къэплъан къызэриIуагъэмкIэ, фэгъэ­кIотэнхэр къыдэлъытагъэхэу кредит 227-рэ, ар сомэ миллион 434,8-рэ, атыгъах. ЦIыфхэм ар лъэшэу зэрагъэфедэрэм фэшI Адыгеим пае джыри сомэ миллион 466-рэ агъэнэфагъ. Ар илъэсым ыкIэм нэс атынэу ары гухэлъэу яIэр. — «Россельхозбанкым» чанэу Iоф дэтшIэным тыфэхьазыр ыкIи ащ ишъолъыр къутамэ ипредложениехэм тыкъяжэ. Къэрылыгъо программэхэм къащыдэлъытагъэхэр пхы­рыт­щынхэм пае банкым иамалхэр дгъэфедэщтых. Ащ тетэу Iоф зэрэзэдатшIэрэр къуаджэм щыпсэухэрэм ящыIакIэ на­хьышIу хъуным ыкIи мэкъумэщ хъызмэтым хэхъоныгъэхэр ышIыным афэIорышIэн фае, — къыIуагъ КъумпIыл Мурат.