Джыри Iоф зыдашIэнхэр щыIэх
УблэпIэ классхэм арыс кIэлэеджакIохэм шхын стыр зэраIэкIагъахьэрэм фэгъэхьыгъагъ АР-м и Премьер-министрэ игуадзэу Наталья Широковам тхьамэтагъор зыщызэрихьэгъэ зэхэсыгъоу Правительствэр зычIэт Унэм щыкIуагъэр.
УФ-м и Президентэу Владимир Путиным иунашъокIэ илъэсыкIэ еджэгъур къызихьагъэм къыщыублагъэу 1 — 4-рэ классхэм арыс кIэлэцIыкIухэр ыпкIэ хэмылъэу агъашхэх. Гъомылапхъэхэр шапхъэхэм адиштэнхэм, федеральнэ ахъщэу мы Iофым пае къатIупщыгъэр зэрищыкIагъэм тетэу гъэфедэгъэным анаIэ тетынэу АР-м и ЛIышъхьи пшъэрылъ къафигъэуцугъ.
ИлъэсыкIэ еджэгъум иапэрэ мэзитIу ыкIэм фэкIо, кIэлэеджакIохэм каникулхэр рагъэжьэщт. Къэралыгъом ипащэ ыкIи ЛIышъхьэм яунашъохэр а уахътэм гъэцэкIагъэ зэрэхъугъэр зэхэсыгъом щызэфахьысыжьыгъ, джыри щыкIагъэу щыIэхэм, тапэкIэ анаIэ зытырагъэтын фаехэм атегущыIагъэх.
АР-м гъэсэныгъэмрэ шIэныгъэмрэкIэ иминистрэ игуадзэу Пэрэныкъо Сусаннэ къызэриIуагъэмкIэ, кIэлэеджакIоу республикэм исым ипроцент 83-мэ шхын стыр аIэкIагъахьэ. УблэпIэ классхэм арысхэр зэкIэ ыкIи фэгъэкIотэнхэр зиIэ унагъохэм къарыкIыхэрэр ащ къыхеубытэх.
ПстэумкIи мы Iофым сомэ миллиони 106,2-рэ пэIухьагъ. Ащ щыщэу миллиони 105-р федеральнэ ахъщэу къатIупщыгъ, сомэ миллионым ехъур республикэ бюджетым къыхэхыгъ, муниципальнэ образованиехэм халъхьагъэр сомэ мин 82-рэ мэхъу.
Зэпахырэ узым зызэриушъомбгъурэр, ащ ыпкъ къикIыкIэ пэIудзыгъэ шIыкIэм тетэу охътэ гъэнэфагъэм еджэн фаехэр къызэрэхэкIыхэрэр, тапэкIи ащ тетыным ищынагъо зэрэщыIэр къыдалъытэзэ, ащ фэдэ еджакIэм техьэхэрэм еджапIэм щашхын фэягъэр унэм ащыIэкIагъэхьащтмэ ны-тыхэр бэрэ къыкIэупчIэх. Пэрэныкъо Сусаннэ джэуап къыритыжьзэ, ащ фэдэ законым къызэрэщыдэмылъытагъэр къыIуагъ. Джащ фэдэу зэпахырэ узым ыпкъ къикIыкIэ санитарнэ шапхъэу Роспотребнадзорым къыгъэнэфагъэхэм ягъэцэкIэни лъэшэу анаIэ зэрэтетым къыкIигъэтхъыгъ.
КIэлэеджакIохэм ягъэшхэн еджапIэхэм зэрэзэхащэрэм гъэсэныгъэмкIэ муниципальнэ гъэIорышIапIэхэм япащэхэр, къулыкъу зэфэшъхьафхэм ялIыкIохэр зыхагъэхьэгъэхэ комиссиехэм ауплъэкIу, ны-тыхэри ащ хэлажьэх.
Министрэм игуадзэ къызэрэхигъэщыгъэмкIэ, ны-тыхэр ясабыйхэр зэрагъашхэрэм чанэу лъэплъэх. Интернет нэкIубгъохэр агъэфедэхэзэ гъэсэныгъэмкIэ Министерствэм зыфагъазэ. ЩыкIагъэхэр мымакIэу къыхагъэщых, ау ирэзэныгъэ къизыIотыкIырэри макIэп.
Нэужым а щыкIагъэу кIэлэеджакIохэм ягъэшхэнкIэ къыхагъэщыхэрэм зэдатегущыIагъэх. Муниципальнэ образованиеу нахьыбэу къызщытхьаусыхагъэхэм гъэсэныгъэмкIэ ягъэIорышIапIэхэм япащэхэми Iофхэм язытет, ны-тыхэм зигугъу къашIыгъэхэр зэрэдагъэзыжьыгъэр къаIотагъ.
КIэлэцIыкIухэр каникулым зыщыкIогъэхэ уахътэр къызфагъэфедэнышъ, пщэрыхьапIэхэм, шхапIэхэм щыкIагъэу яIэхэри, ны-тыхэм зигугъу къашIыгъэхэри дэгъэзыжьыгъэнхэм Iоф дашIэнэу Премьер-министрэм игуадзэ афигъэпытагъ.
— Ны-тыхэм яшIоигъоныгъэхэр къыдэлъытэгъэнхэм шъунаIэ тежъугъэтын, ахэм щыкIагъэу зигугъу къашIыгъэхэр зырызэу зэхэшъуфынхэ фае. ПIалъэхэм ашIомыкIэу зэкIэ дэгъэзыжьыгъэ зэрэхъущтыми шъулъыплъ, — къариIуагъ Наталья Широковам.
Роспотребнадзорым АР-мкIэ и ГъэIорышIапIэ испециалистхэм кIэлэеджакIохэм ягъэшхэн зэрэзэхащэрэм иуплъэкIун тыгъуасэ, чъэпыогъум и 22-м, рагъэжьагъ. Ащ илIыкIоу зэхэсыгъом хэлэжьагъэм къызэриIуагъэмкIэ, каникулхэм зэпагъэунышъ, ыужым падзэжьыщт, илъэсым ыкIэм нэс а IофшIэныр лъагъэкIотэщт.
ХЪУТ Нэфсэт.