Адыгеим и ЛIышъхь: «ЗэкIэми тызэкъотэу коронавирусым тыпэуцужьын фае»
Общественнэ шхапIэхэм джэгухэр ащашIыхэ, сэдэкъэшхынхэр ащагъэхьазырхэ зыхъукIэ, зэпахырэ узым зыкъимыштэнымкIэ шапхъэхэр къыдалъытэнхэ зэрэфаем фэгъэхьыгъэ зэхэсыгъор республикэм и Правительствэ зычIэт унэм щыкIуагъ.
Адыгеим и ЛIышъхьэу КъумпIыл Мурат зэхэсыгъор зэрищагъ. Iофтхьабзэм хэлэжьагъэх Адыгэ Республикэм и Премьер-министрэу Геннадий Митрофановыр, Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец, Адыгэ Республикэм и Премьер-министрэ игуадзэу Сапый Вячеслав, Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем, Роспотребнадзорым Адыгэ РеспубликэмкIэ и ГъэIорышIапIэ ипащэу Сергей Завгороднер, общественнэ гъэшхэнымкIэ организациехэу (кафехэу, ресторанхэу, банкетхэр зыщашIырэ чIыпIэхэу) квадрат 50-м ехъу зиинагъэхэм япащэхэр.
Зэхэсыгъор къызэIуихызэ, Адыгеим и ЛIышъхьэ къыхигъэщыгъ республикэми, хэгъэгуми коронавирусымкIэ Iофхэр нахь къазэращыхьылъагъэхэр, псауныгъэм икъэухъумэн фэгъэзэгъэ лъэныкъор непэ чIыпIэ къин зэритыр.
«Шэпхъэ пхъашэхэм бизнесми, экономикэми чIэнэгъэшхо зэрарагъэхьырэр блэкIыгъэ мазэхэм къагъэлъэгъуагъ», — къыIуагъ КъумпIыл Мурат.
Ау ащ дакIоу республикэм ипащэ зэрэхигъэунэфыкIыгъэмкIэ, цIыфхэр бэу зэрэсымаджэхэрэм къыхэкIэу хэбзэ къулыкъухэм шэпхъэ гъэнэфагъэхэм арыгъозэнхэ фаеу алъытэ. Адыгэ Республикэм и ЛIышъхьэ и Указ диштэу общественнэ гъэшхэнымкIэ организациехэм Iоф ашIэн зыфитхэр яIанэхэр метрэ 1,5 — 2-кIэ зэпэIудзыгъэхэ, зы нэбгырэм квадрат метри 4 телъытагъэу щыт зыхъукIэ ары. Къэшъо чIыпIэхэр ахэм агъэфедэхэ, банкет Iофтхьабзэхэр зэхащэхэ, кальян рагъашъохэ хъущтэп.
«ЦIыфхэм узыр зэпамыхынымкIэ ащ фэдэ амалхэр зетхьан фае. Ау ащ ишIуагъэ къызыкIощтыр шIокI имыIэу шапхъэхэр къыдалъытэхэ зыхъукIэ ары. Джарэущтэу ары нахь дэим зыщытыдзыен зэрэтлъэкIыщтыр. МыщкIэ нэбгырэ пэпчъ, предприниматель пэпчъ мэхьанэшхо иI. ЗэкIэми тызэкъотэу коронавирусым тыпэуцужьын фае», — къыIуагъ КъумпIыл Мурат.
Карантиным илъэхъан республикэм ибизнесменхэм Iофхэм язытет дэгъоу къазэрагурыIуагъэр Адыгеим ипащэ хигъэунэфыкIыгъ. КъумпIыл Мурат шIушIэ IэпыIэгъу язытыгъэ, волонтер Iофхэм ахэлэжьэгъэ предпринимательхэм тхьашъуегъэпсэу ариIуагъ.
Зэхэсыгъом икIэух Адыгеим и ЛIышъхьэ джыри зэ общественнэ гъэшхэным фэгъэзагъэхэм анаIэ тыраригъэдзагъ шIокI имыIэу шэпхъэ гъэнэфагъэхэр къыдалъытэн зэрэфаем.
«ПредпринимательхэмкIэ а лъэбэкъухэр зэрэкъинхэр къыдгурэIо. Ау джыдэдэм анахь шъхьаIэр цIыфхэм, тигупсэхэм япсауныгъэ къэухъумэгъэныр ары. ЦIыфхэр пандемием щыухъумэгъэнхэмкIэ афэлъэкIыщтыр зэкIэ тапэкIи республикэм щашIэщт. НепэкIэ анахь тэрэзыр игъоу къытфалъэгъухэрэр шIокI имыIэу дгъэцэкIэнхэр ары», — хигъэунэфыкIыгъ КъумпIыл Мурат.
АР-м и ЛIышъхьэ ипресс-къулыкъу