Чъэпыогъум и 21-м зэпахырэ узэу коронавирусыр Адыгеим щыпсэурэ нэбгырэ 72-мэ къахагъэщыгъ. Пандемиер къызежьагъэм щыублагъэу мыр анахь къэгъэлъэгъон ин.

Тыгъуасэ ехъулIэу Адыгеим щыпсэурэ 5121-мэ ковидыр къахагъэщыгъ. Ахэм ащыщэу нэбгырэ 916-мэ яIазэх, чэщ-зымафэм нэбгыритIумэ ядунай ахъожьыгъ. Кощхьэблэ районым щыпсэурэ хъулъфыгъэмрэ Красногвардейскэ районым щыщ бзылъфыгъэмрэ. Лабораторнэ ушэтынхэм къызэрагъэлъэ­гъуагъэмкIэ, ахэм лъапсэу афэхъугъэр зэпахырэ узэу коронавирусыр ары.

Чъэпыогъум и 21-м ехъулIэу зидунай зыхъожьыгъэр нэбгырэ 43-рэ мэхъу, хъужьыгъэр 4162-рэ (чэщ-зымафэм 40 хэхъуагъ).

Сымаджэ хъугъэхэр республикэм имуниципалитетхэм атегощагъэу:

— Мыекъуапэ — 1719-рэ, — Тэхъутэмыкъое районыр — 929-рэ, — Красногвардейскэ районыр — 527-рэ, — Мыекъопэ районыр — 522-рэ, — Теуцожь районыр — 387-рэ, — Адыгэкъалэ — 378-рэ, — Кощхьэблэ районыр — 311-рэ, — Шэуджэн районыр — 194-рэ, — Джэджэ районыр — 154-рэ.