Адыгэ Республикэм и ЛIышъхьэу КъумпIыл Мурат 2020-рэ илъэсым чъэпыогъум и 16-м ыштэгъэ унашъоу N 153-р зытетымкIэ Адыгэ Республикэм и ЛIышъхьэ и Указхэу коронавирусым республикэм зыщемыгъэушъомбгъугъэным фэгъэхьыгъэхэм зэхъо­кIыныгъэ гъэнэфагъэхэр афашIыгъэх. Мы Указым тетэу коронавирусым пэшIуекIогъэнымкIэ оперативнэ штабым федеральнэ шэпхъэ-правовой актхэу, Адыгэ Республикэм ишэпхъэ-правовой актхэу зэпахырэ узым зимыушъомбгъуным тегъэпсыхьагъэу аштагъэхэм ягъэцэкIэнкIэ амалхэр псынкIэу зэрихьанхэ фае.

Урысые Федерацием игражданхэу Адыгэ Респуб­ликэм щыпсэухэрэм е уахътэ горэкIэ щыIэхэм общественнэ чIыпIэхэми, транспортми социальнэ дистанциер къащыдалъытэн, нэгуихъор аIулъын, Iалъэр апылъын фае. Узыр зэпамыхынымкIэ Iофхэр нахьышIу охъуфэхэ нэс цIыфхэр жъугъэу зыхэлэжьэрэ Iофтхьабзэхэр, гущыIэм пае, культурэ, спорт, физкультурэ Iофтхьабзэхэр зэрамыхьанхэу, зыныбжь илъэс 65-м шъхьадэкIыгъэхэр, хэужъыныхьэгъэ уз зиIэхэр 2020-рэ илъэсым шэкIогъум и 1-м нэс яунэхэм арысынхэу ащ ит.

Указым ия 10-рэ пункт зэрэщыгъэнэфагъэмкIэ, общественнэ гъэшхэным фэгъэзэгъэ организациехэм кальян ащешъохэ, нэбгырэ 20-м ехъу зыхэхьэрэ купыр а зы уахътэм спорт псэуалъэхэм, фитнес-гупчэхэм спортым ащыпылъыхэ хъущтэп. Сатыу гупчэхэм ащыIэ зыгъэпсэфыпIэхэм, кIэлэцIыкIу джэгупIэхэм ачIэфэн ылъэкIыщтым ызыныкъо нахьыбэ къямыкIуалIэмэ ары Iоф ашIэн залъэкIыщтыр. ФэIо-фашIэхэр зыгъэцэкIэрэ организациехэмкIэ шапхъэу щыIэр зы нэбгырэм квадрат метри 4 телъытэгъэныр ары. Общественнэ гъэшхапIэхэм ачIэт Iанэхэр метрэ 1,5 – 2-кIэ зэпэчыжьэнхэ фае. Ахэм якъэшъопIэ чIыпIэхэр агъэфедэхэ, банкет Iофтхьабзэхэр ащызэхащэхэ хъущтэп. Кинотеатрэхэм, нэмыкI чIыпIэхэу цIыфхэр жъугъэу зыщызэрэугъоихэрэм Iоф ашIэн залъэкIыщтыр ачIафэрэм ызыныкъо нахь къыземыкIуалIэкIэ ары.

Адыгэ Республикэм икъэралыгъо хэбзэ къулыкъу­хэм, чIыпIэ зыгъэIорышIэжьынымкIэ къулыкъухэм, организациехэм, унэе предпринимательхэм санитар- эпидемиологие шапхъэхэр къыдалъытэнхэ, зэпахырэ узхэм замыушъомбгъуным тегъэпсыхьэгъэ Iофтхьабзэхэр зэрахьанхэ, Адыгэ Республикэм и Къэралыгъо санитар врач шъхьаIэ игъоу ылъэгъухэрэр дэх имыIэу агъэцэкIэнхэ фае.

Адыгэ Республикэм IофшIэнымрэ социальнэ хэхъо­ныгъэмрэкIэ и Министерствэ ипшъэрылъ мы Указым ия 7-рэ пункт зигугъу къышIыхэрэм гъомылапхъэхэр, Iэзэгъу уцхэр аIэкIэгъэхьэгъэнхэмкIэ линие плъырым зэпыу имыIэу Iоф ышIэным гъунэ лъифынэу, коронавирусым зыкъызыщиштэгъэ IэкIыб къэралыгъохэм къарыкIхэу Урысые Федерацием къакIохэрэм чIыпIэ шъхьаф обсерваторым къащаратыным иамалхэр зэрихьанхэу.

Адыгэ Республикэм псауныгъэр къэухъумэгъэнымкIэ и Министерствэ Урысые Федерацием и Къэралыгъо санитар врач шъхьаIэ иунашъохэу коронавирусыр нахь макIэу зэпахынымкIэ шIэгъэн фаехэм яхьылIагъэхэм, Урысые Федерацием псауныгъэр къэухъумэгъэнымкIэ и Министерствэ 2020-рэ илъэсым гъэтхапэм и 19-м ышIыгъэ унашъоу N 198-р зытетым къащыдэлъытэгъэ Iофтхьабзэхэр зэрэзэрихьанхэ фаер я 13-рэ пунктым итхагъ.

Урысые Федерацием игражданхэу IэкIыб къэралыгъохэм Iоф ащызышIэхэрэм Урысыем къызагъэзэжьырэ нэуж мэфи 3-м къыкIоцI коронавирусыр къяутэлIагъэмэ зэрагъэшIэным фэшI ПЦР-анализыр атын ыкIи лабораторнэ уплъэкIунхэм якIэуххэр къэнэфэфэ нэс яунэхэм арысынхэ фае.

Организациехэм аIутхэм япроцент 25-мэ дистанционнэу Iоф ашIэным пащэхэм анаIэ тырагъэтынэу, цIыфхэр нахь макIэу сымэджэнхэмкIэ амалхэр зэрахьанхэу Указым щыгъэнэфагъ.

Адыгэ Республикэм финансхэмкIэ и Министерствэ коронавирусым Адыгеим зыщимыушъомбгъунымкIэ амалэу зэрахьащтхэм апэIухьащт мылъкур къыгъотынэу, Адыгэ Республикэм псэолъэшIынымкIэ, транспортымкIэ, унэ-коммунальнэ, гъогу хъызмэтымкIэ и Министерствэ цIыфхэмрэ хьылъэхэмрэ язещэнкIэ шэпхъэ гъэнэфагъэхэр къыдалъытэнхэм ынаIэ тыригъэтынэу Указым игъо щалъэгъу.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет къэбарлъыгъэIэс республикэ амалхэр къызфигъэфедэхэзэ, коронавирусым зызэрэщаухъумэщт шIыкIэм ехьылIэгъэ къэбар икъухэр цIыфхэм аIэкIигъэхьанхэ фае. ЧIыпIэ зыгъэIорышIэжьынымкIэ къулыкъухэм япшъэрылъ мы Указым зигугъу къышIыхэрэр цIыфхэм алъагъэIэсынхэу, зызэраухъумэщт шIыкIэр ахэм агурагъэIонэу.