Адыгэ Республикэм заомкIэ, IофшIэнымкIэ, УIэшыгъэ КIуачIэхэмкIэ ыкIи хэбзэухъумэкIо къулыкъухэмкIэ иветеранхэм я Совет хэдзын-зэфэхьысыжь конференциеу чъэпыогъум и 20-м иIагъэр видеоконференцие шIыкIэм тетэу рекIокIыгъ.

Ащ хэлэжьагъэх АР-м ­лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, тарихъ шIэны­гъэ­хэмкIэ докторэу Ацумыжъ Каз­бек, къэбар жъугъэм иамалхэр.

АР-м заомкIэ, IофшIэнымкIэ, УIэшыгъэ КIуачIэхэмкIэ ыкIи хэ­­бзэухъумэкIо къулыкъухэмкIэ иветеранхэм я Совет илIыкIо 67-м щыщэу 60-р Iофтхьабзэм къыхэлэжьагъ, 7-р — япсауныгъэ изытет елъытыгъэу хъу­гъэ­хэп. Президиумым хэтыщт нэ­бгыри 7-р агъэнафи, IофшIэныр рагъэжьагъ.

Илъэси 5-м къыкIоцI дунаир зыхъожьи советым исатыр хэ­кIыжьыгъэхэм такъикърэ афэшъыгъуагъэх.

2015 — 2020-рэ илъэсхэм къакIоцI советым зэрихьэгъэ IофшIэным хэдзын-зэфэхьысыжь конференциер фэгъэхьыгъагъ. Ащ игъэкIотыгъэу къытегущыIагъ советым итхьаматэу Къо­джэ Аслъан. Шъо­лъырым ихэбзэ къулыкъухэмрэ Адыгэ Рес­публикэм иве­теранхэм я Со­ветрэ илъэс 33-рэ хъугъэу зэготхэу зэрэзэдэлажьэхэрэр ащ къыхигъэщыгъ. Ащ фэдизым советым лъэныкъоу Iоф зыдишIэрэр зэхъо­кIыгъэп, ыкIуа­чIэ нахь лъэш хъузэ къыры­кIуагъ.

— Мы уахътэм куп зэфэ­шъхьафхэм яветеран нэбгырэ мини 127-рэ зыхэхьэрэ советым анахьэу ынаIэ зытетыр ахэм ягумэкIыгъохэр зэшIохыгъэнхэр ары, — къыIуагъ тхьаматэм. — Джащ фэдэу ветеранхэм ящыIэкIэ-псэукIэ нахьышIу ­шIыгъэным, общественнэ IофшIэнхэм чанэу тахэлэжьэным ыуж тит.

Адыгэ Республикэм иветеран­хэм я Совет итхьаматэ къы­зы­щыуцугъэхэм ащыщ ныбжьыкIэхэм япатриотическэ пIу­ныгъэ, Хэгъэгу зэошхом Те­кIоныгъэр къызыщыдахыгъэр илъэс 75-рэ зэрэхъугъэм епхыгъэ Iофтхьабзэхэм яхэгъэунэфыкIын, зэолI­хэм ялъыхъон-­къэгъо­тыжьын яIахьышIу зэрэхалъхьэрэр.

Зэфэхьысыжь пIалъэу зигугъу къэтшIырэм къыкIоцI мы­жъобгъу 19 къызэIуахыгъ. Ахэм зэу ащыщ Аскъэлае щыщ ЛIы­хъукIэ зэши 6-у Хэгъэгу зэошхом хэкIодагъэхэм афэгъэ­хьыгъэр.

НэмыкI Iофтхьабзэу советым зэрихьагъэхэм Къоджэ Аслъан къатегущыIагъ. Сыд фэдэрэ лъэныкъокIи Адыгеим и ЛIышъхьэу КъумпIыл Мурат ахэм къотэгъу къазэрафэхъу­рэмкIэ зэрэфэразэхэр хигъэу­нэфыкIыгъ.

ГущыIэр лъигъэкIотагъ Шъхьэ­лэхъо Аскэр. ЗиIофшIэн ыкIи зизэо гъогу шъхьакIафэ зыфэтшIырэ цIыфхэр зэфэзыщэрэ советэу мыр зэрэщытыр ащ къыхигъэщыгъ. Iофэу ышIэрэм мэхьанэшхо зэриIэр, ныбжьыкIэхэм дзэ-патриотическэ пIуныгъэ тэрэз ягъэгъотыгъэным иамал зэрэрихьылIэрэр Комитетым итхьаматэ къыIуагъ.

ТекIоныгъэр къызыдахыгъэр илъэс 75-рэ зэрэхъугъэм фэ­гъэхьыгъэу республикэм икъа­лэхэмрэ ирайонхэмрэ патриотическэ Iофтхьабзэхэу ащызэрахьагъэхэм чанэу ветеранхэр зэрахэлэжьагъэхэр Адыгеим и ЛIышъхьэ бэмышIэу Къоджэ Аслъан дыриIэгъэ зэIукIэгъум зэрэщыхигъэунэфыкIыгъэр ­Шъхьэлэхъо Аскэр агу къыгъэ­кIыжьыгъ. Джащ фэдэу Адыгэ Республикэм щыпсэурэ лъэпкъхэм азыфагу илъ зэгурыIоныгъэр гъэпытэгъэнымкIэ хабзэм икъулыкъухэмрэ ветеран ор­ганизациехэмрэ язэдэлэжьэныгъэ агъэлъэшыным мэхьанэшхо зэриIэр республикэм ипащэ къыIуагъ.

Адыгэ Республикэм иветеранхэм я Совет 2015 — 2020-рэ илъэсхэм Iофэу ышIагъэм уигъэрэзэнэу алъытагъ. Зигугъу къэтшIыгъэ организацием итхьа­матэу Къоджэ Аслъан, ащ игуа­дзэу Виктор Коноваловыр икIэ­рыкIэу хадзыжьыгъэх. КъэкIощт IофшIэгъу пIалъэм агъэцэкIэщт гухэлъхэр агъэнэфагъэх.

Iэшъынэ Сусан. Сурэтыр Iэшъынэ Аслъан ты­рихыгъ.