Къэралыгъо Думэм 2021-рэ илъэсым хэхьащтхэм яхэдзынэу щыIэщтым «Единэ Россием» гъэхъагъэу щишIыщтыр партием ипрограммакIэ бэ­кIэ елъы­тыгъэщт. Партием и Тхьаматэу Дмитрий Медведевым ащ фэгъэхьыгъэу программнэ комиссием зэхэсыгъоу иIагъэм къыщиIуагъ.

«ТихэдзакIохэр, шъыпкъэмкIэ, кандидатхэмрэ политическэ партиехэмрэ япрограммэхэм яджэх, политическэ кIуачIэхэм япредложениехэм къапкъырыкI­хэзэ амакъэ аты. ТипрограммакIэ мэхьанэу иIэщтым уасэ фэшIыгъуай. Ар къыхэтхы зыхъу­кIэ пшъэрылъ шъхьаIэхэр, ­игъоу къытфалъэгъухэрэр къыдэтлъы­тэнхэ фае. ТихэдзакIохэр, тихэ­гъэгу исхэр типрограммэ икъы­хэхын къыхэлажьэхэмэ, ар на­роднэ программэ шъыпкъэ хъущт», — къыIуагъ партием ипащэ.

Ащ къызэрэхигъэщыгъэмкIэ, мы аужырэ мазэхэм «Единэ Россием» хэдзын Iофтхьабзэхэр зыщыкIогъэ шъолъырхэм народнэ программэм иположение заулэхэм цIыфхэр ащатыригъэгущыIагъэх. А документым лъапсэ фэхъущтхэр цIыфхэм япредложениехэр ары. Экономикэмрэ промышленностымрэ яхэхъоныгъэ, бизнес цIыкIумрэ гурытымрэ якъэухъумэн, предпринимательхэм нахь къызэ­рыкIоу отчет ашIыным, IофшIэн зэфыщытыкIэхэм ягъэтэрэзын программэм чIыпIэшхо щаубытын фае.

Джащ фэдэу документым социальнэ Iофыгъохэм, цIыфхэм нахьышIоу IэпыIэгъу зэрарагъэгъотыщтым, псауныгъэм икъэухъумэн анаIэ щытырагъэтыщт. Илъэсыбэ хъугъэу «Единэ Россием» пхырищырэ проектхэм ягъэцэкIэни партием хэтхэм лъагъэкIотэщт. ГущыIэр зы­фэгъэхьыгъэр къалэхэр нахь зэтегъэпсыхьэгъэнхэр, къоджэ­дэсхэм ящыIэкIэ-­псэукIэ нахьы­шIу шIыгъэныр ары. Дмитрий Медведевым джыри зэ къыхигъэщыгъ къэлэ инфраструктурэм фэдэ яIэным къуаджэхэр зэрэкIэгуIэнхэ фаер.

«Къоджэ пстэуми газыр алъы­гъэIэсыгъэн зэрэфаем щэч хэ­лъэп. Ар цIыфхэм ямылъку- кIэ рамыщэу, нэмыкI къэкIуапIэхэр къагъотын, къоджэдэсхэр рэхьатэу къалэхэм зэранэсыщтхэ гъогу дэгъухэр гъэпсыгъэн­хэ фае», — къыIуагъ Дмитрий Медведевым.

Партием и Тхьаматэ зэхэсыгъом къызэрэщыхигъэщыгъэмкIэ, псауныгъэм икъэухъумэн фэгъэзэгъэ лъэныкъом джырэ электрон фэIо-фашIэхэр щызэхэщэгъэнхэмкIэ, поликлини­кэхэм язытет нахьышIу шIыгъэ­нымкIэ, медицинэ IофышIэхэм IэпыIэгъу ягъэгъотыгъэнымкIэ, тихэгъэгу ифармацевтикэ хэ­хъоныгъэ егъэшIыгъэнымкIэ шэпхъакIэхэр партием ипрограммэ хагъэхьанхэ фае.

«Единэ Россием» и Генсовет исекретарэу Андрей Турчак зэхэсыгъом зэрэщыхигъэунэ­фыкIыгъэмкIэ, цIыфхэр зыгъэгумэкIырэ Iофыгъохэр ары народнэ программэм лъапсэ фэхъущтхэр. Ар Москва икабинетхэм, эксперт гупчэхэм къащыхахыщтэп, предложениехэм яугъоинкIэ общественнэ приемнэхэр, депутатхэмрэ кандидатхэмрэ хэдзакIохэм адыря-Iэщт зэIукIэхэр, онлайн амалхэр агъэфедэщтых.

«Единэ Россием» ифракциеу Къэралыгъо Думэм щыIэм ипащэ игуадзэу Андрей Исаевым зэхэсыгъом къызэрэщи­IуагъэмкIэ, программэм ипычыгъо пэпчъ куп шъхьаф дэлэ­жьэщт. Федеральнэ, шъолъыр хэбзэ къулыкъухэм ялIыкIохэр, Къэралыгъо Думэм идепутатхэр, Урысые Федерацием и Правительствэ хэтхэр ащ фэдэ купхэм ахагъэхьащтых. Ахэм анэмыкIэу партием шъолъырхэм япащэхэр, общественнэ объеди­нениехэр, экспертхэр, шIэны­гъэлэжьхэр программэм къыхи­гъэлэжьэщтых.

Партием и Апшъэрэ совет хэтэу, политологэу, политическэ, экономическэ конъюнкту­рэмкIэ Агентствэм игенеральнэ директорэу Дмитрий Ор­ловым зэхэсыгъом хэлэжьа­гъэхэм анаIэ тыраригъэдзагъ Къэра­лыгъо Думэм иконсти­туционнэ полномочиякIэхэм япхы­гъэу «Единэ Россием» пшъэдэкIыжьэу ыхьырэм къызэрэхэхъуагъэм.

«Единэ Россием» ипрограм­мнэ комиссие изичэзыу зэхэсыгъо шэкIогъум зэрэщыIэщтыр мыщ къыщаIуагъ.

Партием и Адыгэ шъолъыр къутамэ исекретарь игуадзэу, шъолъыр гъэцэкIэкIо комитетым ипащэу АфэшIэгъо Рэмэзан къызэриIуагъэмкIэ, «Единэ Россием» икандидатхэм Адыгеим и Къэралыгъо Совет — Хасэм ихэдзынэу 2021-рэ илъэсым щыIэщтым щагъэфедэщт программэм икъыхэхын Iоф дашIэу республикэм щырагъэжьагъ. Къэралыгъо Думэмрэ респуб­ликэ парламентымрэ ядепутатхэм яхэдзынхэр къихьащт илъэ­сыр ары зыщыIэщтхэр. Адыгеим и Къэралыгъо Совет — Хасэм идепутатхэм япрограммэ лъапсэ фэхъущтхэр Iофыгъо гъэнэфагъэхэмкIэ хэдзакIохэм игъоу алъэгъухэрэр, мафэ къэс цIыф­хэм партием иобщественнэ приемнэхэм къаIэкIагъахьэрэ ятхыгъэхэр, депутатхэм якойхэм ащызэхащэрэ зэIукIэхэм рес­публикэм исхэм предложениеу къащахьыхэрэр ары. «Единэ Россием» иволонтер гупчэ Iоф ышIэ зэхъум нахьыжъхэм шIошIэу къыраIотыкIыгъэхэри къыдалъытэщтых.