Игъом къыдэпхын фае

Унэе псэупIэхэм ачIэсхэм хэ­кIыр ратэкъонэу контейнерхэр шъо­лъыр операторым афигъэу­цугъэ­хэп, ар Iузыщырэ автомашинэр къызщыкIощтым къыдахышъ раты е къагъэтIылъышъ, Iуещы.

Пыдзэфэ пытэхэм ядэщын епхыгъэ шапхъэхэм ары зэращыгъэнэфагъэр.

Региональнэ операторми, хэкIыр къыдэзыхыхэрэми графикыр амыукъонэу ары ныIэп мыщ ищыкIа­гъэр. «ЭкоЦентрэм» цIыфхэм яшIоигъоныгъэхэр къы­дилъытэзэ ар зэхигъэуцуагъ, республикэ гупчэм анахь пэIудзыгъэ псэупIэхэми фэIо-фашIэр анэсынэу маршрутыр ыгъэпсыгъ.

ХэкIыр дэзыщырэ автомашинэр урамым техьэшъ гъогу гъунэм къагъэтIылъыгъэ пакетхэр къеугъоих. Арышъ, ар къэмыкIозэ хэкIыр зэкIэми къыдахын фае. Автомашинэу блэкIыгъахэм къыгъэзэжьыщтэп, сыда пIомэ, зы мафэм ащ километрэ пчъагъэ ыкIунэу ипшъэрылъ. ЗэкIэми ГЛОНАСС системэр ащыгъэпсыгъ, зыдакIохэрэри, къаугъоигъэри нафэ мэхъу.

Шъугу къэтэгъэкIыжьы, графикэу автомашинэхэр къызэрекIокIыхэрэр ООО-у «ЭкоЦентрэм» иинтернет нэкIубгъоу https://adygea.clean-rf.ru зыфиIорэм ижъу­гъотэщт. Пыдзафэхэр зэрэIуащыхэрэм ылъэныкъокIэ упчIэ шъуиIэмэ, мы телефонхэмкIэ шъукъытеон шъу­лъэкIыщт: 8-800-707-05-08, 8-962-868-14-62.

ИмычIыпIэ щыратэкъугъ

Тэхъутэмыкъое районым ипоселкэу Инэм хэкIитэкъупIэу щыгъэ­псыгъэхэм ащыщ псэолъэшIыным къы­пызыгъэ пы­­дзэфэ инхэр зыгорэм къы­щыритэ­къугъэх.

ЦIыфэу дэсхэм телефонкIэ ащ видео тырахи регио­нальнэ операторым фагъэхьыгъ.

— Фэтэрыбэу зэхэт унэхэм ачIэсхэм апае агъэуцугъэ контейнерхэм ащ фэдэ хэкI къызэрэщыратэ­къугъэр хэукъоныгъ, — къыIуагъ ООО-у «ЭкоЦентрэм» и Адыгэ шъолъыр къутамэ иподразделениеу Тэхъутэмыкъое районым щыIэм ипащэу Алыбэрд Айдэмыр. — Площадкэр зыфагъэпсыгъэ унэхэм нэбгырэ пчъагъэу ачIэсымрэ хэкIэу къыратэкъурэр зыфэдизымрэ къыдалъытэзэ графикэу зэрэIуащыщтыр зэхагъэуцо. Инэм щыпсэухэрэмкIэ шапхъэр кубометри 2,24-р ары. Ащ пакетхэм арылъ хэкIэу къырахырэри, псэолъэшIыным къыпыкIыгъэу е нэмыкI пыдзэфэ инэу илъэсым къыкIоцI къаугъоирэри хэхьэх. Видеом къызэригъэлъагъорэмкIэ, хэкIэу къыIуатэкъуагъэр кубометри 10-м къыщыкIэрэп. Ащ фэдэ хэкI площадкэм емыпхыгъэхэм къызыратэкъукIэ ар лъэшэу къаушъэшъ, цIыфэу зыфагъэуцугъэхэм зыдахьын щымыIэу къэнэх. Ащ иза­къоп, псэолъэшIыным къыпызыгъэ пыдзафэхэм яIущын пае хэушъхьафыкIыгъэу региональнэ операторым зэзэгъыныгъэ дэпшIын фаеу щыт.

ЦIыфхэм тырахыгъэм хэкIыр къызэрэратэкъурэри, къэзыщэгъэ автомашинэм иномерхэри дэгъоу иолъа­гъох. Ащ ишIуагъэкIэ хэукъоныгъэр зышIыгъэр къэгъо­тыгъошIу хъущт. Материалхэр тыкъэзыуцухьэрэ дунаим икъэухъумэнкIэ ыкIи чIыопсым икъэкIуапIэхэмкIэ АР-м и ГъэIорышIапIэ фэкIуагъэх.

Пыдзэфэ инхэр бэу зэIукIагъэхэмэ, региональнэ операторым зыфэбгъэзэнышъ, ахэр зэрэдищыщытхэм пае хэушъхьафыкIыгъэу зэзэгъыныгъэ дэпшIын фае. Ащ хэкIитэкъупIэ гъэнэфагъэм ыщэнышъ щигъэкIо­дыщт. Ащ пае мы телефонхэмкIэ шъукъытеон шъулъэ­кIыщт: 8-988-479-79-04, 8-962-868-12-29, интернет нэкIубгъоу https://adygea.clean-rf.ru зыфиIорэм лъэIу тхылъыр щышъутыми хъущт.

ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу