Адыгеим имызакъоу, зэпахырэ узэу коронавирусыр къызэутэкIыгъэмэ япчъа­гъэ зэрэдунаеу, зэрэ Урысые хэгъэгоу ащыхэхъо. Уз мэхъаджэм икъоу пэуцужьыгъэным фэгъэхьыгъэ Iофтхьабзэхэр республикэм щызэрахьэх. Республикэм и ЛIышъхьэу КъумпIыл Мурат зипэщэ оперативнэ штабэу зэхащагъэм Iоф ешIэ. Узым пэуцужьыгъэнымкIэ ищыкIэгъэ кIуачIэхэр зэкIэ зэхащагъэхэу чэщи-мафи мэлажьэх. ЗылъэкIыщтмэ пэIудзыгъэ шIыкIэм тетэу Iоф арагъашIэ, рагъаджэх. Нахьыжъхэми сымэджэ тхылъхэр аратыгъэхэу унэмэ арысых. Икъу фэдизэу сымаджэхэр зычIэлъыщт IэзапIэхэр зэтырагъэпсыхьагъэх. ЗэрэIэзэщт Iэмэ-псымэхэри, уцхэри, тхьабылым жьы IэкIэзыгъэхьан зылъэкIыщт пкъыгъохэри зэрагъэгъотыгъэх. Сымаджэмэ яIэзэщтхэри фэгъэсагъэхэу щыIэх. Узым изытети, узэрэсакъыщтым фэгъэхьыгъэ шIыкIэхэри «Адыгэ макъэм» инэкIубгъо­мэ ренэу къыхаутых, телевизорми къе­гъэлъагъо.

Арэу щыт нахь мышIэми, узыр къызэутэкIыгъэмэ япчъагъэ къеIыхырэп, къыхахъо нахь. Лъэпкъым ипащэ гумэкIыгъошхо хэлъэу республикэм щыпсэурэ пстэуми джыри джэпсалъэкIэ закъыфигъэзагъ. Щынагъоу цIыфмэ къашъхьарыхьагъэм уизакъоу утекIон зэрэмылъэ­кIыщтыр, хэти ышъхьэ къыухъумэжьын, узэдеIэжьын, узэлъыплъэжьын зэрэфаехэри шъхьэихыгъэу къыIуагъэх. Лъэпкъ Хасэм ипащи, псауныгъэм икъэухъумэн фэгъэзэгъэ министрэри, шIэныгъэлэжь цIэрыIохэри узыр зыфэдэми, укъэзыухъумэн зылъэкIыщт амалхэми, ащкIэ шIэгъэн фаехэми игъэкIотыгъэу къатегущыIэх. Джарэущтэу зэрэщытзэ, узыр зэкIагъэкIон, цIыфхэми зэгурыIоныгъэр икъу фэдизэу ахалъхьан алъэкIырэп. Мы узым тыгу къегъэкIыжьы я XIX-рэ лIэшIэгъум икъихьагъумэ адэжь адыгэ шъолъырым емынэ узым ипандемие зэрэрыкIогъагъэр. Амалрэ IэпыIэгъурэ щымыIэу лъэпкъым ызыкIэлъэныкъо узым гуихыгъагъ. Непэ тэ пащэхэри, медицинэ IофышIэхэри, зэхэшIыкI зиIэ шIэныгъэлэжьхэри тиIэх, къытфэгумэкIых. Тэ къытфэнэжьырэр тядэIуныр, аIорэр тшIэныр ары.

Узым къытфихьыгъэ къиным лъэшэу урегъэгупшысэ. ГухэкI нахь мышIэми, узыр зышIошъ мыхъухэрэр джы къызнэ­сыгъэм къытхэтых. Загъорэ гур зэпакIэу «тамыгъэхъужьыщтмэ врачхэр сыда зыкIыщыIэхэр» зыIохэрэм уарехьылIэ. Врачхэри цIыфых, ашъхьэ къамыIэтэу мэлажьэх, ахэри сымаджэ мэхъух, мэпшъых, щэIагъэу яIэми гъунапкъэ иI. Врачхэу сымаджэхэм узыр къапызыхыгъэхэм япчъагъэ къыхэхъо. НэмыкIырэ хэкIыпIэ щымыIэу медакадемием щеджэрэ студентхэр IэпыIэгъоу къырагъэблагъэх. Ащ фэдиз зытегъэогъэ цIыфмэ ар япIолIэныр емыкIу.

КъыдгурэIо, щыIэныгъэр къэбгъэуцун плъэкIыщтэп. Зым иджэгу, зым ихьа­дагъ, адрэм иIофшIэн, къызыщыхъугъэ маф е нэмыкI гушIуагъу, е къин, ау щытми, адыгэмэ зэраIоу, «хьадэгъум нэмыкI амал зимыIэ щыIэп». ГушIуагъор зэкIэпхьан, лъыбгъэкIотэн, унэгъо Iоф пшIыжьын олъэкIы. Къинми амал фэбгъотыщт – Iахьыл-гупсэмэ ашъхьарымыкIэу зепхьащт, псэпэгъэ фэIо-фашIэхэри къепхьакIынхэ плъэкIыщт. Ау чIэунэгъэ гупсэр бгъотыжьын плъэкIыщтэп. АщкIэ унэгъозехьэхэу, унэшъошIыхэу тиIэ нахьыжъмэ яакъылрэ ягупшысэрэ тащэгугъы ныбжьыкIэхэр аIэжэнхэу, агъэ­дэIонхэу, ежьхэри акъылэгъу зэфэхъу­жьынхэу.

Ныбджэгъу лъапIэхэр! Непэрэ гузэ­жъогъу чIыпIэу зэпахырэ узым къытфи­хьыгъэм хабзэри, медицинэ IофышIэхэри, цIыфхэри ушэтыпIэ ригъэуцуагъэх зэгурыIохэу, зэкъотхэу узым пэуцужьынхэм фэшI. Нахьыжъмэ я Совет, заом ыкIи IофшIэным иветеранхэм я Совет, бзылъфыгъэхэм я Союз къышъущыгугъы­хэу къышъолъэIух зэхэхьан-зэхэкIынхэм шъунаIэ атетынэу, цIыф жъугъэ зэхэтыпIэхэр кIуапIэ шъумышIынхэу, гугъапIэ къэзытырэ къэбзэныгъэмрэ нэгуихъомрэ тыдэ шъущыIэми жъугъэпсэолъэнхэу, IэпыIэгъу шъузэфэхъужьызэ шъупсэунэу. Ахэр пфэмыгъэцэкIэн Iофхэп, ау лъэшэу яшIуагъэ къэкIо. ТызэгурыIоу къин пстэуми тапэуцужьын тлъэкIымэ, хахъо тиIэу тыкъызэтенэжьмэ нахьышIу!

ГъукIэлI Нурбый, нахьыжъмэ я Совет итхьамат.

Къоджэ Аслъан, ветеранхэм я Совет итхьамат.

Ворэкъо Хьалимэт, бзылъфыгъэмэ я Союз итхьамат.