«Къихьащт илъэ­сым лъэпкъ проектхэм атегъэ­псыхьэгъэ ахъщэ IэпыIэгъум, мазэ къэс кIэлэцIыкIухэм ахъщэ IэпыIэгъоу аратырэм фэди 3-кIэ къахэ­хъощт».

2021 – 2023-рэ илъэсхэм ателъытэгъэ федеральнэ бюджетым ипроектэу Къэралыгъо Думэм ыхэрэ палатэ апэрэ хэплъэгъумкIэ чъэпыогъум и 29-м ыштэнэу щытым бюджетымкIэ Комитетым изэхэсыгъо щытегущыIагъэх. Зэхэ­сыгъом хэлэжьагъэх финансхэмкIэ министрэу Антон Силуановыр, экономикэ хэхъоныгъэмкIэ министрэу Максим Решет­никовыр, ЛъытэкIо палатэм ипащэу Алексей Кудриныр.

Бюджет комитетым хэтэу, Адыгэ Республикэм ыцIэкIэ Къэралыгъо Думэм идепутатэу Владислав Резник зэхэсыгъом икIэуххэм къатегущыIагъ:

«Илъэсищ благъэм телъытэгъэ федеральнэ бюджетым ипроект апэрэ хэп­лъэгъум фэгъэхьазырыгъэным тегъэ­псыхьагъэу финансхэмкIэ Министерствэмрэ экономикэ хэхъоныгъэмкIэ Министерствэмрэ япащэхэм тырягъусэу тикомитет проектым тыщытегущыIагъ, бюджетым илъэныкъо шъхьаIэхэм тахэплъагъ.

Джыдэдэм зыхэплъэхэрэ документым Къэралыгъо Думэм идепутатхэми, Правительствэми Iоф зэрэдашIагъэр хэзгъэу­нэфыкIы сшIоигъу. Гъэмэфэ псаум зэ­пы­­мыоу ащ тыпылъыгъ. Джыри зэ бюджетым илъэныкъохэм тахэплъэ­жьыщт, Президентым Федеральнэ ЗэIукIэм фигъэхьыгъэ Тхылъым щигъэнэфэгъэ пшъэрылъхэм ягъэцэкIэнкIэ мылъкоу ащ къыщыдэлъытагъэр екъумэ тыуплъэ­кIыщт. Пшъэрылъ шъхьаIэхэр цIыфхэм социальнэ IэпыIэгъу ягъэгъотыгъэныр, тихэгъэгу исхэм ящыIэкIэ-псэукIэ зы­къезыгъэIэтыщт лъэпкъ проектхэр гъэцэкIэгъэнхэр ары. Ахэм анэмыкIэу джыри зы пшъэрылъышхо къэуцугъ —коронавирусым лъэшэу зыкъызыщиштэгъэ лъэхъаным цIыфхэм ахъщэ IэпыIэгъу тедзэ къафыхэгъэкIыгъэным пае шъо­лъыр бюджетхэм субсидиехэр икъоу арыгъэхьэгъэнхэу.

Шъолъырхэм аIукIэщт субсидие лъэпкъи 177-р Правительствэм тыригъусэу бюджетым щыдгъэнэфэгъах. Бюджетым ипроект ятIонэрэу тыхаплъэ зыхъукIэ сомэ триллион 1,5-рэ хъурэ субсидиехэр шъолъырхэм атедгощэщтых. Адыгеим исхэми ахъщэ IэпыIэгъу дэгъу къаIу­кIэщт. Врачхэм, социальнэ IофышIэхэм, кIэлэегъаджэхэм, сабыйхэр зэрыс уна­гъохэм ыкIи нэмыкIхэу зытефэхэрэм ар аIукIэн фае. Социальнэ политикэм илъэныкъо зэфэшъхьафхэмкIэ федеральнэ бюджетым итрансфертхэр нахьыбэу Адыгеим къыIукIэнхэр проектым къыщыдэлъытагъ. ГущыIэм пае, къихьащт илъэсым лъэпкъ проектхэм атегъэ­псыхьэгъэ ахъщэ IэпыIэгъум, мазэ къэс кIэлэцIыкIухэм ахъщэ IэпыIэгъоу аратырэм фэди 3-кIэ къахэхъощт. Мыгъэ щымыIэгъэ субсидие лъэпкъыкIэхэри агъэфедэщтых. ГущыIэм пае, социальнэ контрактхэмкIэ цIыф куп заулэмэ къэралыгъо социальнэ IэпыIэгъу ягъэгъотыгъэным, спорт организациехэм хэхъо­ныгъэ ягъэшIыгъэным, информационнэ технологиехэм алъэныкъокIэ шъолъыр проектхэм зягъэушъомбгъугъэным атегъэпсыхьэгъэ субсидиехэр къатIупщыщтых.

Тэри, ЛъытэкIо палатэм хэтхэми зэрэтлъытэрэмкIэ, бюджетым ипроект хэгъэгум ыпашъхьэ ит пшъэрылъхэм язэшIохын пырикъун ылъэкIыщт. Ау щыкIагъэ горэхэр джыри зэрэщыIэр къэIогъэн фае. Апэрэ хэплъэгъумкIэ Къэралыгъо Думэм документыр ыштэ зыхъукIэ бюджетыр нахьышIу шIыгъэнымкIэ предложениехэр къыгъэхьазырыщтых, шъолъырхэм яеплъыкIэхэри къыдилъытэщтых. БюджетымкIэ Комитетым зэхэсыгъоу иIагъэм предложениябэ къыщахьыгъ. Адыгеим тефэщт субсидиехэм ахэгъэхъогъэнымкIэ джыри предложениехэр къахьыщтых.

Бюджетыр зэрагъэцакIэрэм парламентым гъунэ зэрэлъифын фаеми мы зэхэсыгъом шъхьафэу тыщытегущыIагъ. Къэралыгъо Думэм идепутат пэпчъ ипшъэрылъ ащ гъунэ лъафынымкIэ ищыкIэгъэ амалхэр зэрихьанхэу. Непэ кризисым тызыщыхэт лъэхъаным сыдигъуи фэмыдэу шIуагъэ къытэу мылъкур дгъэфедэным мэхьанэшхо иI».