АР-м иминистрэхэм я Кабинет зичэзыу планернэ зэхэсыгъо тыгъуасэ иIагъ. Видеоконференцие шIыкIэм тетэу кIогъэ Iофтхьабзэр зэрищагъ Адыгэ Республикэм и ЛIышъхьэу КъумпIыл Мурат. Лъэпкъ проектхэр ыкIи къэралыгъо программэхэр шъолъырым зэрэщагъэцакIэхэрэр ары Iофыгъо шъхьаIэу зытегущыIагъэхэр.

АР-м и Премьер-министрэу Геннадий Митрофановыр лъэпкъ проектхэм ягъэ­цэкIэн зэрэлъыкIуатэрэм къытегущы­Iагъ. Ащ къызэриIуагъэмкIэ, непэрэ мафэм ехъулIэу мылъкоу агъэфеда­гъэр (хъарджхэр) процент 67-м кIэхьагъ. Адыгеим и ЛIышъхьэ пшъэрылъ къыгъэуцугъ графикэу щыIэм ыуж къинэрэ шъолъыр проектхэм яедзыгъохэм ягъэцэкIэн пытагъэ хэлъэу зэхафынхэу, ахэр дэгъэзыжьыгъэнхэм анаIэ тырагъэтынэу. Мэхьанэшхо зэратыгъэ лъэныкъохэм ащыщ Адыгеим социальнэ- экономикэ хэхъоныгъэ ышIыным фытегъэпсыхьэгъэ унэе программэм ипро­ектхэм ягъэцэкIэн. Мы илъэсым щегъэжьагъэу ар щыIэныгъэм щыпхыращы. Джырэ уахътэм ехъулIэу гухэлъэу щыIэм ипроцент 30-р зэшIохыгъэ хъугъэ. Программэу агъэнэфагъэхэр зэкIэ игъом агъэцэкIэнхэр, ащ хэхьэх поселкэу Краснооктябрьскэм щагъэпсырэ ГРС-р, сабыибэ зэрыс унагъохэм аратыгъэ чIыгу Iахьхэм инженернэ инфраструктурэ ащыгъэпсыгъэныр анахь шъхьаIэх. Ащ нэмыкIэу республикэм ипащэ ипшъэ­рылъкIэ унэе программэм къыдыхэлъытагъэу 2021-рэ илъэсым агъэцэкIэщт проектхэми Iоф адашIэ.

— Къихьащт илъэсым зэшIотхын фаехэмкIэ непэ IофшIэнышхо дгъэцэкIэн фае. Мылъкоу къы­тIэкIахьэрэр игъом тымыгъэфедэным ищынагъо къэмыуцуным фэшI гъогу картэ зэхэжъугъэуцу, нэмыкI лъэныкъохэм шъу­наIэ атежъугъэт. Iофыгъо шъхьаIэхэм ягъэцэ­кIэнкIэ ыкIи мэхьанэшхо зиIэ псэуалъэхэм яшIынкIэ екIолIэ­кIэ гъэнэфагъэ дгъэфедэн фае. Анахьэу экономикэм, инвестиционнэ проектхэм IэпыIэгъу афэхъугъэным шъу­наIэ те­шъудз, — къыхигъэщыгъ КъумпIыл Мурат.

Адыгеир загъэпсыгъэр илъэси 100 зэрэхъурэм ихэгъэунэфыкIын фэгъэхьыгъэ Iофтхьабзэхэр гъэцэкIэгъэнхэмкIэ федеральнэ гупчэм зэпхыныгъэ дыряIэу Iоф зэрэдашIэрэр Адыгеим и ЛIышъхьэ хигъэунэфыкIыгъ. Джащ фэдэу шъолъырым ипсэупIэхэм гъэстыныпхъэ шхъуан­тIэр ящэлIэгъэным, фельдшер-мамыку IэзапIэхэм, гъогухэм яшIын, федеральнэ программэу «Стимул» зыфиIорэм къыдыхэлъытэгъэ лъэныкъохэм ягъэцэкIэн, нэмыкI Iофыгъохэм къэзэрэугъоигъэхэр атегущыIагъэх. АР-м экономикэ хэхъоныгъэмкIэ ыкIи сатыумкIэ и Министерствэ пшъэрылъ фашIыгъ индустриальнэ паркэу «Яблоновскэм» игъэпсын лъигъэкIотэнэу, республикэм мэкъу-мэщымкIэ и Министерствэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Агрохолдинг Мирный» зыфиIорэм ипроект хэхъоныгъэ ышIынымкIэ Iэпы­Iэгъу фэхъунэу.

Коронавирусым пэшIуекIогъэным, зэпахырэ узхэм замыушъомбгъуным фэшI шапхъэу щыIэхэр пытагъэ хэлъэу гъэцэкIэгъэнхэ зэрэфаем иIофыгъуи зэхэсыгъом къыщаIэтыгъ.

— Зэпахырэ узыр къызпыхьэ­хэрэм япчъагъэ нахь макIэ шIыгъэным фытегъэпсыхьэгъэ унашъохэр щытштагъэх оперативнэ штабым изэхэсыгъоу бэмышIэу щыIагъэм. Ахэр непэ дгъэцэкIэнхэм мэхьанэшхо иI, — къыIуагъ КъумпIыл Мурат.

АР-м и ЛIышъхьэ ипресс-къулыкъу.