Спортышхом щыцIэрыIо Андрей Тихоновыр Казахстан икомандэу «Астана» зыфиIорэм итренер шъхьаIэу агъэнэфагъ.

Андрей Тихоновыр «Спартак» Москва хэтэу гъогогъуи 8 Урысыем идышъэ медаль къыфагъэ­шъошагъ, хэгъэгум ихэшыпыкIыгъэ командэ бэрэ щешIагъ. Футбол клубэу «Краснодар» итренерэу Iоф ышIэзэ, Мыекъуа­пэ тыщыIукIэгъагъ.

Адыгэ къэралыгъо университетым физкультурэмрэ дзюдомрэкIэ и Институт щыкIогъэ пчыхьэзэхахьэм, футболымкIэ ныбджэгъу ешIэгъухэм А. Тихоновыр ахэлэжьагъ. Зэхахьэм икIэух нэпэеплъ сурэтхэр атырахыгъэх. Андрей Тихоновым къыгоуцо зышIоигъохэр нэбгырипшI пчъагъэ хъущтыгъэх.

Спортсменхэм язакъоп А. Тихоновым готхэу сурэтхэр зытырахыгъэхэр. КIэлэегъаджэ­хэр, медицинэм иIофышIэхэр, кIэлэеджакIохэр, ны-тыхэр, нэ­мыкI­хэри А. Тихоновым гоуцуагъэхэу тлъэгъугъэх.

— Андрей, Адыгэ Республикэм ущашIэ, ущагъэлъапIэ, Мыекъуапэ къэкIожь, — раIуагъ А. Тихоновым.

Андрей нэгушIоу купэу тызыхэтым къыхэплъагъ, Мыекъопэ «Зэкъош­ныгъэр» Урысыем иап­шъэрэ куп зыхахьэкIэ тренер шъхьаIэу Адыгеим къэкIожьыщтэу къыIуагъ.

СэмэркъэукIэ рагъэжьэгъэ зэдэгущыIэгъум лъэпсэшIу ышIынкIи пшIэхэщтэп.

«Астана» итренер шъхьаIэу Андрей Тихоновым ыныбжь мы мафэхэм илъэс 50 хъугъэ.

Мыекъуапэ щыпсэурэ Шъыжъы Хьамедэ къызэрэтиIуагъэу, Андрей Тихоновым фэдэ ешIакIохэм кIэлэцIыкIухэр акIырэплъых. Игъэхъагъэхэм ахигъэхъонэу, бэгъашIэ хъунэу Андрей Тихоновым фэтэIо.