А охътэ дэдэм ковидкIэ сымаджэ хъугъахэхэм ащыщхэм япсауныгъэ фэмыукIочIэу, жьы амыгъотэу сымэджэщ пIэкIорхэм ахэлъых. Джащ фэдэу врачхэу сымэджэщхэм аIутхэм узым зэлъиубытыгъэхэм ящыIэныгъэ фэбанэхэзэ чэщ мычъыехэр рахы…

Адыгеир коронавирусым зэ­рехъулIэрэм икъэбар ишъып­къапIэ зэдгъашIэмэ тшIоигъоу гущыIэгъу тыфэхъугъ Адыгэ Рес­публикэм псауныгъэр къэу­хъумэгъэнымкIэ иминистрэу Мэрэтыкъо Рустем.

Тэу З.: Рустем, коронавирусымкIэ сымаджэ хъухэрэм япчъагъэ аужырэ чэщ-зыма­фэу блэкIырэ пэпчъ нэбгырэ 50-м шъхьадэкIы. Сымаджэхэм зэрахахъорэр о уишIошIыкIэ сыд къызхэкIырэр? ЦIыфхэр эпидемиологие шапхъэхэм икъоу зэрапымылъыжьхэр ара, хьауми медицинэ амалхэр зэримыкъухэрэр ара?

Мэрэтыкъо Р.: Инфек­ционнэ госпиталищэу тиIэм чъэпогъум и 15-м телъытагъэу сымаджэу ачIэлъхэр нэбгырэ 546-рэ зэрэхъущтыгъэхэр. Яунэ­мэ арысхэу зэIазэхэрэр нэбгырэ 550-м къехъу. ГъолъыпIэу тиIэхэр процент 92-м фэдизэу гъэфедагъэ. Ахэм япчъагъэ 800-м къедгъэхъун тыгу хэлъ. Адыгеим изакъоп, коронавирускIэ сымаджэхэрэм япчъагъэ зэрэдунаеу щыхэхъо. ЗэкIэмэ апэу ар зэпхыгъэр къызэрэу­чъыIыгъэр ары. Вирус узхэм бжыхьэм ахахъоу хабзэ. Коронавирусри ахэм зэу ащыщ. Ащ фэдэу зэрэхъущтыр тшIэщтыгъэ ыкIи зыфэдгъэхьазырыгъ. Къыхэгъэщыгъэн фае джэгухэм, хьадагъэхэм цIыфхэр жъугъэу зэрякIуалIэхэрэм зэрахэхъо­жьыгъэр, илъэс еджэгъури аублэжьыгъ, шхапIэхэр, общественнэ транспортыр мэлажьэх — узым зимыушъомбгъунымкIэ шапхъэ­хэр зэраукъорэм щэч хэлъэп. Медицинэ амалхэм — сымэджэщ гъолъыпIэхэм, уцхэм тащыкIэрэп. Ау къыхэзгъэщмэ сшIоигъу — унаIэ темыгъэтмэ, сыд фэдэрэ системэ зэтегъэпсыхьагъэми зэ­тегъэогъэ Iофхэр фэмыукIо­чIынхэ ылъэкIыщт. ПшъэдэкIыжь инэу нэбгырэ пэпчъ телъыр, узыр зезыхьэхэрэм ащыщын зэралъэкIыщтыр къызгурымыIо­хэрэм зэрарышхо къытагъэкIы.

Я 6-рэ мазэ хъугъэу медицинэм иIофышIэхэм шапхъэмэ ашIокIэу Iоф ашIэ. Ковидыр къызэузыгъэхэр ахэм бэу ахэт, IофшIэным къыхэзых. Зыныбжь илъэс 65-м къехъугъэ тиIофшIэгъухэри дгъэтIысыгъэх. Мыекъо­пэ къэралыгъо технологическэ университетым истудентхэр, ор­динаторхэр IофшIэным хэтэщэх. Пшызэ медицинэ университетым иректор сезэгъыгъ я 2-рэ курсым иординаторхэр Тэ­хъутэмыкъое районым, псэу­пIэу Яблоновскэм, сымаджэхэм япчъагъэ лъэшэу зыщыхэхъуагъэхэм, Iоф ащашIэным пае къагъэкIонхэу.

ДжырэкIэ зэкIэми гъунэ алъытэфышъу — Iэзэгъу уцхэр бэу къядгъэщагъэх, IэзэпIэ чIыпIэхэм япчъагъэ хэтэ­гъэхъо зэпыт.

Узым уеIэзэн нахьи, къызэмы­гъэузыным мэхьанэшхо иI. Нэгуихъор зэкIэми дгъэфедэн фае, ар шэнышIоу, шэпхъэшIу хэхыгъэу, узыр къызпытымгъэхьанри ары, ау апытымгъэхьаныр ыкIыIоу тыпсэун фае. Джырэ уахътэм, джырэ лъэхъаным имэхьанэ зэкIэми анэсэу, ар дгъэцэкIэн фае.

Общественнэ чIыпIэхэм, цIыф зэхэхьапIэхэм нэгуихъор пIумылъэу уахахьэ хъущтэп! Метрэрэ ныкъорэ нахь благъэу нэмыкI цIыф уекIуалIэ хъущтэп! Мыхэр гъэцэкIэгъуаеп, тыса­къымэ тысымэджэщтэп!

Тэу З.: Зэпахырэ узымкIэ госпиталищэу тиIэм гъолъыпIэу яIэр кIымафэу къэблагъэ­рэм сымаджэхэм афэхъущта?

Мэрэтыкъо Р.: Зэ­кIэмкIи чIыпIэ 800-у тиIэм кисло­родыр, жьырыкIуапIэхэр къятэщалIэ. Инэм госпиталым джыдэдэм а IофшIэнхэр игъэкIотыгъэу щэкIох. Мыекъопэ къэлэ сы­мэджэщым щыдгъэпсыгъэ госпиталым къатищ хъурэ унэу хахьэрэр зэтед­гъэ­псыхьагъ. Къа­тибгъу хъу­рэ корпусми IофшIэнхэр щэ­кIох.

Зэпахырэ узхэмкIэ Мые­къопэ сымэджэщми гъолъы­пIэ­хэм ащы­хэтэгъахъо. КIыма­фэм тыфэхьазырэу текIуалIэ.

Тэу З.: Коронавирусыр цIыфым иIэмэ къэзыушыхьатырэ компьютернэ томограф­хэр республикэм икъоу иIэха? Ахэр къутэхэу къыхэкIы, сыдэущтэу язытет гъунэ лъы­шъуфыра?

Мэрэтыкъо Р.: Инэм сы­мэджэщым компьютернэ томограф кIэу чIэдгъэуцуагъ. Адыгэ­къалэ исымэджэщ чIэтым изы пкъыгъо къутагъэ, игъэцэкIэжьын сомэ миллионитф ыуас. Ащ емылъытыгъэу зэрэзэблэтхъущтыр къэтщэфыгъэу къятэгъащэ.

ТхьамэфитIукIэ томографым Iоф ышIэу ригъэжьэжьыщт.

Красногвардейскэ сымэджэщми чIэт КТ-р ядгъэгъэцэкIэжьыгъ. Iоф ешIэ. Мыекъопэ къэлэ сымэджэщым томографыкIэ IэкIэдгъэ­хьагъэу, зэхагъэуцо пэт. Къатищ хъурэ корпусым ар чIэтыщт. ЗэкIэмкIи компьютернэ томогра­фии 7 тиI. ЗэкIэми Iоф ашIэщт. ИщыкIагъэ хъумэ, джыри зы къахэдгъэхъонэу тиI.

Тэу З.: Адыгэ Республикэм и ЛIышъхьэ Оперативнэ штабым изэхэсыгъо зэрэщыхи­гъэунэфыкIыгъэмкIэ, IэзапIэ­хэм яIофшIэн, унэхэм арысхэу цIыфхэр зэрагъэхъужьыхэрэ Iофыр гъэлъэшыгъэнхэ фае. Сымаджэ хъугъэм благъэу дэ­псэухэрэм е Iоф дэзышIэ­хэрэм вирусыр къапыхьагъэмэ амыуплъэкIугъэхэу, IофышIэ дэкIыжьхэуи къызэрэхэкIырэм ищысэхэр тэшIэх. ОРЗ, пэтхъу­Iутхъу узхэр къызэуалIэхэрэм терапевтхэр амыгъотыжьэу, афи­мыкъухэу сымаджэ хъухэ­рэр къытфытеохэу мэхъух. Сыд ар къызхэкIырэр? ПЦР-анализхэр нахь псынкIэу ашIы­шъун алъэкIынэу IофшIэныр зэхэщэгъэн ылъэкIыщта?

Мэрэтыкъо Р.: IэзапIэхэм непэ цIыфэу къяуалIэрэр бэдэд.

Мыекъуапэ изакъоми врач унэм къащэмэ ашIоигъоу гъогогъу 400-рэ къафытеох. Къызэрэс­Iуагъэу, студентхэри IофшIэным хэтщагъэх. Зыныбжь илъэс 65-м къехъугъэ тиIофшIэгъухэми афэшIэщт IофшIэныр зэпэчыжьэ шIыкIэм тетэу тфагъэцакIэ. Ахэр врач ныбжьыкIэхэм, ординаторхэм яупчIэжьэгъух.

Сымаджэ хъугъэхэм зэряIазэхэрэ схемэхэм ятэгъэплъыжьых, зэблэхъу­гъэн фэе уцхэр, гъэфедэгъэн фэе амалхэр врач ныбжьыкIэхэм къараIожьы.

ПЦР-анализ тынымкIэ шъолъырипшIэу а анализыр анахьыбэу зыщатырэм Адыгеир ахэхьэ. ЛабораториитIумэ чэщ-­зымафэм зэпыу ямыIэу респуб­ликэм Iоф щашIэ. Роспотребнадзорым игупчэ, зэпахырэ узхэмкIэ сымэджэщымрэ кIышъо-венерологическэ диспансерымрэ ялабораториехэр ары ахэр.

Инэм район сымэджэщыми лабораторие къыщызэIутхын тимурад. Ащ пае ищыкIэгъэ Iэмэ-­псымэхэр тщэфыгъахэх, ахэр зэхагъэуцожьых, тхьамэфитIукIэ лабораториер къызэIутхыщт.

Район чыжьэхэм къарымыкIхэу джы анализхэр чIыпIэм щатызэ ашIыщт. Ащ IофшIэныр лъэныкъо зэфэшъхьафхэмкIи къыгъэпсын­кIэщт.

ЦIыфхэр зыгъэгумэкIырэ упчIэхэмкIэ колл-гупчэм телефонкIэ теонхэ алъэкIыщт. НэбгырипшI чIэсэу, а зы уахътэм джэуапхэр атыжьых, зызэбла­хъузэ Iоф ашIэ.

ПЦР-анализхэр ашIокIодэуи къыхэкIы IофшIэныр къазэрэ­теорэм къыхэкIыкIэ. Ащ фэдэ дагъохэр щыдгъэзыенхэм пае къэбарлъыгъэIэс системэхэр Iоф­шIэным хэтэщэх. Ахэм яшIуагъэкIэ цIыфым ытыгъэ анализым къыгъэлъэгъуагъэр иунэе кабинет ихьэмэ, компьютерымкIэ ылъэгъужьын ылъэкIыщт, врачэу еIазэрэми IэкIэхьащт. ТапэкIэ IофшIэныр джащ фэдэу зэхэщэгъэщт.

Тэу З.: Сымаджэ хъугъэхэр тхьаусыхэхэу бэрэ зэхэтэхы: зыгъэпсэфыгъо мафэхэр апэ илъэу, гущыIэм пае, бэрэскэшхом къэсымэджагъэхэр ахэт­мэ, мафэм сыхьатыр 11-м шIокIэу ПЦР-анализ птыжьын зэрэмылъэкIырэр, е врачыр унэм къэпщэнэу зэрэзыхям­гъэтхэжьышъурэр. Хэт ахэм IэпыIэгъу афэхъущтыр?

Iахьыл, нэIуасэхэмкIэ Iофыр зэшIуа­хынэу ыуж ехьэх…

Мэрэтыкъо Р.: : Анализ тыгъом шэпхъэ гъэнэфагъэ пылъэу щыт. Игъом, пчэдыжьым, птын фае неущ хьазыр хъуным пае. Ау уахътэри блэкIыгъэу, цIыфыр нахь дэи къэхъугъэмэ, е температурэр къыдэкIоягъэмэ — IэпыIэгъу псынкIэм Iоф ешIэ. Ари псынкIэу къэмыкIон ылъэ­кIыщт.

Бэ сымаджэ хъурэр, дэкIыгъо пчъагъэ ашIы, уяжэн фае мэхъу, ар шъыпкъэ. Ау мыщ дэжьым нэмыкI сымаджэм дэжь ахэр зэрэщыIэхэр зыщышъумгъэ­гъупш.

Сыхьат Iэпэ-цыпэ шъуе­жэуи къыхэкIын ылъэкIыщт. Джыдэдэм медицинэм иIофы­шIэхэм ашъхьэ къамыIэтэу, зы­гъэпсэфыгъо уахътэ къыхэмыкIэу Iоф ашIэ. Ар тицIыфхэм къагурыIонэу пстэуми сыкъяджэ. Ковид сымаджэхэм адэжь кIорэ IэпыIэгъу псынкIэ купхэми ахэдгъэхъуагъ. Температурэр къыдэкIоягъэмэ ущыщынэнэу щытэп, ар чэщ-зымэфэ пчъагъэрэ уиIэн ылъэкIыщт, щыIэны­гъэмкIэ ащ фэдизэу ар щынэгъошхоп.

Сабый цIыкIухэм ягу­гъу сшIырэп. Ахэм яIоф шъхьафы. Ау ныбжь зи­Iэхэм, чъэп­хъыгъэхэм ардэдэм зэрарышхо къафихьырэп. Бэ зэрэсыма­джэ­рэр зэхашIыкIызэ щэIагъэ къызхагъэфэнэу ыкIи зыфэсакъы­жьынхэу тицIыфхэм сыкъяджэ. IэпыIэгъунчъэу зыпари къэдгъэ­нэщтэп!

Тэу З.: Коронавирусыр къызэузыгъэхэм сыда антибиотикхэмкIэ яIазэхэра? Вирусым ебэнырэ Iэзэгъу уцхэм адакIоу сымаджэхэм ахэр ахалъхьэх, рагъашъох. Бэрэ антибиотикхэр зыгъэфедэ­хэ­рэм зэрарышхо арегъэкIы. ШIум, жъэжъыем егуаох.

Мэрэтыкъо Р.: Урысые Федерацием псауныгъэм икъэу­хъумэнкIэ и Министерствэ ыгъэ­нэфэгъэ Iэзэгъу шапхъэхэм ан­тибиотикхэр ахэтых. Коронавирусыр къызежьагъэм щегъэ­жьагъэу Iэзэн шапхъэхэр я 8-у зэблахъух, ахэмкIэ Iоф тэшIэ.

Антибиотик зэфэшъхьафхэр ви­русым пэшIуекIогъэнымкIэ гъэфедэгъэнхэ фаеу ащ къыде­лъытэ. Шъыпкъэ, вируснэ инфекциер ахэм агъэхъужьырэп, ау нэмыкI Iэзэгъу уцхэм ахэты хъумэ, гущыIэм пае, Азитромициныр ахэм ащыщ, сымаджэм ииммунитет къаIэты.

ЕтIани бак­терие инфекциер къемыжьэным пэшIуекIо. Аужырэр сыдигъокIи вирусым къыкIэлъэкIо. Арышъ, антибиотикхэр зыкIэдгъэфедэрэм мэхьанэ иI. Ау ахэр къизытхыкIын фаер врачыр ары ныIэп, ыкIи ахэр къыплъымыплъэхэу уяшъуи, зыхаплъхьэхи хъущтэп.

Бэрэ уяшъо хъуми пкъынэ-лынэм къегуао, ау тым­гъэфедэхэ хъущтэп.

Тэу З.: ПЦР-анализым ыуа­сэ сомэ миным къехъу. Сабыибэ зиIэ унагъохэр бжыхьэм, кIымафэм къакIоцI бэрэ сымаджэхэу, пчъагъэрэ зарагъэуплъэкIун хъумэ бэ текIо­дэщтыр. Хэта анализ уасэхэр зыгъэнафэрэр?

Мэрэтыкъо Р.: Сымаджэ хъу­хэрэр зэпхыгъэ IэзапIэм екIуалIэхэмэ, ыпкIэ хэмылъэу ащыIахыщт. Ау анализыр нахь псынкIэу къязыгъэшIы зышIоигъохэм нэмыкI лабораториехэм ыпкIэ ащаты — ар шъхьадж ифитыныгъ.

Уасэхэри зэфэшъхьафых, лабораториехэр зиехэм ялъытыгъ, ахэр бэдзэр шап­хъэх. Ау тэ тиIэзапIэхэм ыкIи сымэджэщхэм ПЦР-анализыр ыкIи КТ-р ыпкIэ хэмылъэу сымаджэхэм ащыфашIых.

Тэу З.: Сымаджэм зэпхыныгъэ дызиIагъэхэр е иунагъо щыщхэу дэпсэухэрэр уплъэ­кIугъо имыфэхэу IофышIэ дэ­кIыжьхэу къыхэкIы. Сыда ащ фэдэу зыкIэхъурэр?

Мэрэтыкъо Р.: Ар тэрэзэп! Адыгэ Республикэм псауныгъэр къэухъумэгъэнымкIэ и Министерствэ «ителефон ­плъыр», 8(8772)53-49-97, шъутеомэ, гъуа­зэ тышъушIымэ, а хэукъоныгъэр къызщыхэкIыгъэм щыдгъэтэрэзыжьын тлъэкIыщт.

Сымаджэм зэпхыныгъэ дызиIагъэм анализыр япшIэнэрэ мафэм щыIахы ныIэп, нахьыжьэу ежь къэмысымэджагъэ хъумэ. Ау сыдми къызщыпIэкIахьэрэм птынэу щытэп, ащи шэпхъэ гъэ­нэфагъэ пылъ.

Тэу З.: Коронавирусыр къяолIэгъэ шъыпкъэу щытыгъэмэ зэзгъашIэ зышIоигъохэм «тест на антитела» зыфиIорэ анализыр аты. ЫпкIэ хэмылъэу ар птын плъэкIыщта?

Мэрэтыкъо Р.: ЫпкIэ хэ­мылъэуи аты. Ау зэкIэмэ апэу ар зэрагъэтыхэрэр медицинэм иIофышIэхэу инфекционнэ госпитальхэм ащылажьэхэрэр арых. Тестхэм япчъагъэ джыдэдэм имыкъун ылъэкIыщт. Сыда пIомэ, ковид сымаджэхэм Iоф адэзышIэрэ врачхэм бэрэ арагъэты.

Ау тапэкIэ зызыуплъэкIу зышIоигъохэм ащ фэдэ амал яIэщт.

Тэу З.: Бэрэ къыхэкIы ПЦР-анализым коронавирусыр къымгъэлъагъоу, ау КТ-м къы­гъэшъыпкъэжьэу. Ар сыд къызхэкIырэр?

Мэрэтыкъо Р.: Тестхэм къагъэлъагъорэм ишъыпкъагъэ процентишъэкIэ пштэ хъущтэп. Ау КТ-м къыгъэшъыпкъэжьырэр зэрэтэрэзым ушIокIынэу щытэп. КТ-I зыфагъэуцухэрэм ятхьабылхэм язытет зэхъокIыныгъэ­хэр къызэраштагъэр къыхагъэщы, къалъэгъу. Ащ фэдэхэм я ПЦР-анализ зи къымгъэлъэ­гъуагъэми, унаIэ атебгъэтын фае, сымэджэщми агъэгъолъых. Зыпари блэбгъэкIы хъущтэп, зэкIэри сакъынхэ фае!

Тэу З.: Коронавирусыр къызэузыгъэхэм ащыщэу ятIо­нэрэу къяолIэжьи ыгъэсымэ­джэжьыгъэхэу тишъолъыркIэ къыхэкIыгъа?

Мэрэтыкъо Р.: Ащ фэдэу щэгъогогъо къыхэкIыгъ. Апэ зэ­сымаджэхэм иммунитет вирусым фамышIыгъэу, ятIонэрэу ыгъэсымэджэгъэ нэбгырищ къахэкIыгъ. Ащ фэдэхэр зыкIэ­хъурэм наукэр джырэкIэ щы­гъуазэп. АпэрэмкIэ зэрэсымэ­джагъэхэм фэдэу, пскэнри, жьы­­мыгъотри хэтэу ятIонэрэуи пхырыкIыгъэх. Ащ къыгъэна­фэрэр — узыр зыпэкIэкIыгъэхэри зыфэсакъыжьынхэ зэрэфаер ары.

Тэу З.: Коронавирусым еIэзэнхэмкIэ врачхэр сыдэущтэу ыпэкIэ лъыкIотагъэха? Сыд фэдэ Iэзэгъу уцха кIэу къыхагъэщыгъэхэр?

Мэрэтыкъо Р.: КъызэрэсIуагъэу, пандемиер къызежьагъэм щегъэжьагъэу ковид сымаджэхэм узэряIэзэщт я 8-рэ шэпхъэ хэхыгъэхэм тарыгъуазэзэ джыдэдэм Iоф тэшIэ.

Ахэр Москва дэт клиникэ цIэрыIохэм яврачхэм, профессорхэм зэхагъэуцуагъэх. Къэралыгъом зэрэщытэу исымэджэщхэм яшапхъэ­хэм арыгъуазэхэзэ сымаджэхэм адэлажьэх. Нахь хьылъэхэм узэряIэзэщтри, нахь псынкIэу зыпэкIэкIыхэрэми уазэрэдэ­псэущтри игъэкIотыгъэу ары­тхагъ.

ЦIыфыр зэрэсымэджэрэ шIыкIэм елъытыгъэу Iэзэ­гъу уц­хэр гъусэ зэфашIыхэзэ еIа­зэх. ЗэкIэмэ анахь шъхьаIэр вирусыр псынкIэу къыхэбгъэщынышъ, цIыфым уеIэзэныр ары.

Джащыгъум хьылъэу ыгъэсымаджэхэрэп ыкIи нэмыкI узхэр къыгъэбырсырырэп. Ау ор-орэу узэIэзэжьынэу щытэп.

ЦIыфым изы­тет дэгъоу къышIошIызэ хэужъы­ныхьан, нахь хьылъэ къэхъун, зэлъикIун ылъэкIыщт. Шъоущыгъу уз зиIэхэм, бэ къэзыщэчы­хэрэм нахь хьылъэ къафэхъу.

ГриппымкIэ Iэзэгъоу Японием къыщашIыгъэ препаратэу «Фавипиравир», Урысыем — «Коронавир» ацIэу къыдагъэкIы.

Ковидым ебэныгъэнымкIэ яшIогъэшхо къэкIо. НэмыкI Iэзэгъу уцхэри щыIэх. («Блокатор ку­пым хэхьэрэ препаратхэу Интерлейкин 6 — мыр Тоцилизумабыр ыкIи ащ фэдэу къашIы­хэрэр» — Мэрэтыкъо Р.) ЗыцIэ къес­Iуагъэр сымэджэ хьылъэхэм апае агъэфедэ. Кислородоте­рапиер, гормонхэр, антибиотикхэр — ищыкIагъэмэ зэкIэри зэхэтэу тэгъэфедэх, врачхэм сымаджэхэм анаIэ тетэу.

Ау анахь шъхьаIэм къыфэзгъэзэжьыни джыри зэ игугъу къэсшIын. Коронавирусым зызэриушъомбгъущтыр нэбгырэ пэпчъ эпидемиологие шапхъэхэр зэригъэцакIэрэм занкIэу епхыгъ. Ахэр цIыфхэм амгъэцакIэ хъумэ, узыр къэтымыубытышъоу тIэкIэкIыщт!

Джыри зэ цIыфхэм сыкъяджэ! Хьадагъэ, джэгу, мэфэкI зэхэхьэ кIонхэр щагъэтынхэ фае. Ныбжь зиIэхэм узыр афэукIочIырэп. Тинахьыжъхэм тафэжъугъэсакъ. Сымаджэ хъухэрэм япчъагъэ хэхъо. Узым уебэнын нахьи, къызэмгъэузыным пстэуми тишъыпкъэу тыпылъын фае.

Адыгеим щыпсэурэ пчъагъэм елъытыгъэу сыма­джэ хъугъэр зы процент ныIэп. «Коллективнэ иммунитет» зыфаIорэр тиIэ хъуным пае процент 60 — 70-р сымэджэни къе­лыжьын фае. Тыкъызкъонэ­щтыр вакцинациер ары. Са­къын­хэу цIыфхэм сыкъяджэ!

Тэу З.: Тхьауегъэпсэу, Рус­тем, уахътэ къыхэбгъэкIи ти­упчIэхэм джэуап игъэкIоты­гъэхэр къызэряптыжьыгъэхэм пае.

ДэгущыIагъэр Тэу Замир.