Роспотребнадзорым къызэритырэмкIэ, зыныбжь илъэс 60-м ехъугъэхэм коронавирусыр къяолIэныр нахь щы­на­гъоу щыт. Ахэм яиммунитеткIэ ащ фэдэ вирусыр зэрэ­къиным къыхэкIэу, тхьабыл плъыр-стыр узыр (пневмония) е нэмыкI уз хьылъэ къафихьын ылъэкIыщт.

Коронавирусыр къызэузыгъэ цIыфым благъэу уекIуалIэмэ, гущыIэм пае, къэпсыгъэмэ е къэпскагъэмэ, инфекциер къы­пыпхынкIэ щынагъо. Ащ фэшI нахьыжъхэр цIыфыбэ зыщызэхэхьэрэ чIы­пIэхэм нахь макIэу ащыIэхэмэ, общественнэ транспортыр нахь макIэу агъэфедэмэ нахьышIу. ЩапIэхэр, фэIо-фэшIэ зэ­фэшъхьафхэр зыщагъэцэкIэрэ гупчэхэр, нэмыкI организациехэр нахь ма­кIэу къакIухьанхэ фае. Гъомылапхъэхэр е нэмыкIэу ящыкIагъэр къащэ­фыщтмэ, коммунальнэ фэ­Iо-фашIэхэм апкIэ атыщтмэ яIахьыл-гупсэхэр е социальнэ IофышIэхэр къадеIэнхэ алъэкIыщт.

Нахьыбэрэ аIэхэр атхьа­кIынхэ фае, къэбзэныгъэм мэхьэнэшхо иI — урамым укъытекIыжьыгъэмэ, общественнэ чIыпIэ горэм ущыIагъэу унэм укъихьажьыгъэмэ, сабын­кIэ ахэр птхьакIынхэр шIокI зимыIэ Iоф. ПIэхэр шIойхэу унэгу уеIэжьы хъущтэп, вирусыр уипкъы­шъол хэбгъэхьанкIэ щынагъо. ПIэ птхьакIынэу амал щымыIэмэ, инфекциер зыукIырэ уц зыхэлъ салфеткэ зыдэпIыгъэу ащкIэ пIэхэри, пкъыгъоу пIыгъыхэри плъэкIынхэ фае.

ЗыгорэкIэ укъэсымэ­джагъэмэ, пэтхъу-Iутхъум имызакъоу, нэмыкI горэм укъыгъэгумэкIыгъэми, ор-орэу IэзапIэм умыкIоу, врачым укъеджэмэ на­хьышIу. ШъуиIахьыл-гу­псэхэм ащыщ IэкIыб къэрал къикIыжьыгъэу пэтхъу­Iутхъур къеузыгъэмэ, благъэу шъуемыкIуалI.

ЗэкIэми шъусакъ, псау­ныгъэ шъуиIэнэу тышъу­фэлъаIо!

УФ-м ПенсиехэмкIэ ифонд и Къутамэу АР-м щыIэм ипресс-къулыкъу