ЦIыфхэм нахь апэблэгъэнхэм фэшI
Адыгэ Республикэм и Правительствэ джы онлайн шIыкIэкIэ Iоф ышIэщт — нэкIубгъуакIэхэр социальнэ хъытыухэм къащызэIуихыгъэх.
ЦIыфыбэмэ анахьэу агъэфедэрэ социальнэ хъытыухэм Правительствэм иофициальнэ нэкIубгъохэм джы Iоф ащашIэ — «ВКонтакте» ыкIи «Одноклассники» зыфиIохэрэм.
Къэбар зыкI цIыфхэм аIэкIэхьаным, ягумэкIыгъохэмкIэ джэуап агъотыным, ахэр псынкIэу зэшIохыгъэнхэм, джащ фэдэу республикэм щыпсэухэрэм занкIэу хабзэм илIыкIохэм зафагъэзэным мы Iофыгъор афэлэжьэщт.
Адыгэ Республикэм иофициальнэ нэкIубгъоу пстэуми зызфагъэнэIосэн алъэкIыщтым икъызэIухын ыкIи изегъэушъомбгъункIэ пшъэрылъэу щытыгъэр Адыгэ Республикэм и ЛIышъхьэ, Адыгэ Республикэм иминистрэхэм я Кабинет, комитетхэмрэ гъэIорышIапIэхэмрэ зэшIуахырэр зэхэтэу къащагъэлъэгъоныр ары.
Мафэ къэс ахэм къащыхаутыхэрэр зыфэгъэхьыгъэхэр къэбар, Iофтхьэбзэ зэфэшъхьафэу щыIэщтхэм ыкIи рагъэкIокIыгъэхэм афэгъэхьыгъэ закъоп. Тишъолъыр икультурэ, ащ щыпсэухэрэм шIэныгъэм, спортым, общественнэ Iофым ыкIи нэ-мыкI лъэныкъуабэхэмкIэ ягъэхъагъэхэм къащытегущыIэх.
Тишъолъыр щыкъэбархэр зэзыгъашIэ ыкIи хэбзэ IофышIэхэм гущыIэгъу афэхъу зышIоигъохэм мы нэкIубгъохэр къызфагъэфедэнхэ алъэкIыщт:
ВКонтакте: https://vk.com/adygheya_gov Одноклассники: https://ok.ru/group/56362348118192