Пандемием дунаир зызэлъештэм, Адыгеим а узыр къэсыным хэти енэгуягъэп. Ау, тэ къызэрэтшIомышIыгъэу, республикэм лъэшэу зыщиушъомбгъугъ, сымэджагъэу хъужьыгъэри макIэп. Коронавирусыр къызэузыгъэхэу гущыIэгъу тызыфэхъугъэхэм къаIуатэхэрэр къыхэтыутыщтых.

Руслъан Д., илъэс 38-рэ ыныбжь: — Зэпахырэ узыр къызежьагъэм къыщегъэжьагъэу икъэбар игъэкIотыгъэу зэзгъэшIагъэу щыт. Ар къыспыхьаным лъэшэу сыщыщынэщтыгъэти, маскэр сIумылъэу, Iалъэхэр спымылъхэу тыди сыкIуагъэп. СиIофшIэнкIи цIыфыбэмэ сяуалIэ, нэмыкI чIыпIэхэу цIыфыбэ зыщызэрэугъоихэрэм сащыIагъэми, спиртыр зыдэсIыгъэу сIэхэр, спэ, сынэгу дезинфекцие сымы­шIыхэу хъугъэп. Арэущтэу щыт нахь мышIэми, сшыпхъу къыпысхыгъ.

Апэрэ нэшанэу къысхэщы­гъэр — спкъышъол градус 37,5-м нэсэу плъэу къыригъэжьагъ, ау ащ бэрэ сигъэгумэкIыгъэп. Зы мафэрэ ныкъорэ зэрэсиIагъэр. Мэхэр къысэмыухэу, сшхырэм иIэшIугъэ къэсымышIэу хъугъэ. Нэужым жьы къызэрэсщэрэр къэхьылъэу ыублагъ. Компьютернэ томографие ситхьабылхэр зясэгъэшIыхэм, бгъуитIури пневмониеу къычIэкIыгъ. Ащ лъыпыдзагъэу медицинэ уплъэ­кIунхэр сшIыгъэх, анализхэр тIо стыгъэх, зым — къыгъэлъэ­гъуагъ. ИщыкIэгъэ Iэзэгъу уцхэр къысфатхыгъэх, анахьэу антибиотикхэмкIэ унэм сисэу сызэIэзэжьыгъ. Тхьэм ишыкуркIэ сыхъужьыгъ, джыри ащ сыкъыщымыуцоу спкъышъол зыпкъ зэризгъэуцожьыщтым ыуж сит. Тхьабылым жьы къезыгъэщэрэ зарядкэу Стрельниковам къыугупшысыгъэр сэри сэшIы, витаминхэм сяшъо.

Мысымэджагъэхэм зафэзгъа­зэмэ сшIоигъу, коронавирусыр зэрэщыIэр шъыпкъэ. Шъущымыщынэмэ нахьышIу, ау шъузыфэ­сакъыжь, цIыфыбэ зыщызэ­рэу­гъоирэ чIыпIэхэм амал зэри­IэкIэ защышъудзый. Мэхьанэ зиIэхэм ащыщ игъом узыр къыхэбгъэщыныр, узэIэзэжьыныр.

Марыет Т., илъэс 61-рэ ыныбжь: — Сэ сшъхьэкIэ зэпахырэ узыр къызэрекIокIырэм сыщыгъуазэу щытти, нахьыбэрэмкIэ унэм сисыгъ. Сипсауныгъи уигъэрэзэнэу щытэпти, амал зэриIэкIэ сызфэсакъы­жьыгъ. Сипшъашъэ къысфихьы­нэу хъугъэ. Сишъхьэгъусэ къыпихыгъэп, ау сэ къызблэкIы­гъэп. Шъоу­щыгъу узыр сиIэти, зэу сымэ­джэщым сагъэгъолъыгъ. Игъом медицинэ IэпыIэгъу згъо­тыгъэ, врачхэм, тхьаегъэпсэух, ищы­кIэгъэ Iэзэгъур къысахьы­лIагъ. Сыхъужьыгъэу джы унэм сис.

Мы уз «бзаджэм» зызэрэщыу­ухъумэщт закъор унэм уисымэ ары. Амал зэриIэкIэ къэшъумыкIухь, нэбгырабэхэр мэсыма­джэх. Сымаджэхэми амышIэу маскэхэр аIумылъхэу къекIокIых. Коронавирусым дакIоу, мы уахътэм пэтхъу-Iутхъур къе­жьагъ. Тхьэм еIо: «Шъори шъуз­фэсакъыжьмэ, сэри сышъуфэсакъын».