АР-м и ЛIышъхьэ сэнашъхьэ къэзыгъэкIырэ мэкъумэщ-фермер хъызмэтшIапIэу станицэу Ханскэм дэтым кIогъагъэ.

Илъэс заулэкIэ узэкIэIэбэжьмэ Джансуг Губаз ар ыгъэ­псыгъ ыкIи гектари 10 хъоу сэнашъхьэ ыгъэтIысхьагъ. 2018 — 2019-рэ илъэсхэм шъолъыр программэм къыдэлъытагъэу сомэ миллиони 2,4-рэ субсидиеу къыфэкIуагъ. Зэпахырэ узэу дунаир зэлъызыкIугъэм къиныгъохэр къыздихьыгъэхэ нахь мышIэми, джыри мыгъэ гектар 22-рэ сэнашъхьэм ригъэубытыгъ. ГъэтIысыжьхэр Италием къырищыгъэх. Илъэсэу тызыхэтыр имыкIызэ гектар 50 хигъэхъон гухэлъ иI, 2023-м нэс сэнэшъхьэ шIапIэр гектар 600-м нигъэсыным ыуж ит. «Каберне», «Мерло» ыкIи «Пти Вердо» зыфиIорэ лъэпкъхэр ары къыгъэкIыхэрэр.

Республикэм ипащэ сэнэшъхьэ къэгъэкIыныр республикэм ищыкIагъэу зэрэщытым къыкIигъэтхъыгъ.

— КъэкIощт илъэсым къыщыублагъэу ар мэкъу-мэщым изы лъэныкъоу, федеральнэ IэпыIэгъу къызIэкIахьэхэрэм ащыщ хъущт. Адыгеим къыщагъэкIыгъэ сэнэшъхьэ лъэпкъ­хэр санэ зышIырэ хъызмэтшIапIэхэм зэрящыкIагъэхэр, зэращэфырэр мары тэлъэгъу. Мэкъумэщ хъызмэтым ылъэныкъокIэ къэралыгъо IэпыIэгъоу щыIэ пстэур дгъэфедэн фае. КъыдэгъэкIыным зегъэу­шъомбгъугъэнымкIэ ыкIи Iоф­шIэпIэ чIыпIэхэр нахьыбэ шIыгъэнхэмкIэ ащ шIуагъэ къызэритыщтым сицыхьэ телъ, — къыIуагъ КъумпIыл Мурат.