Чъэпыогъум и 11-р — мэкъу- мэщымрэ перерабатывающэ промышленностымрэ яIофышIэ и Маф
Мэкъу-мэщымрэ перерабатывающэ промышленностымрэ яIофышIэхэу лъытэныгъэ зыфэтшIыхэрэр!
Шъуисэнэхьат епхыгъэ мэфэкIымкIэ тышъуфэгушIо!
Тиреспублики, хэгъэгуми яэкономикэ зыкъезыгъэIэтыхэрэм, гъомылапхъэр Урысыем исхэм афикъуным зиIахьышIу хэзышIыхьэхэрэм ящытхъу мы мафэм тэIо.
Республикэм иагропромышленнэ комплекс джыдэдэм зэхъокIыныгъэшхохэр фэхъух. Аграрнэ политикэр анахьэу зытегъэпсыхьагъэр технологие пэрытхэр мэкъу- мэщым щыгъэфедэгъэнхэр, инвестициехэр нахьыбэу къыхалъхьанхэр, къуаджэхэм ясоциальнэ инфраструктурэ изытет нахьышIу шIыгъэныр ары.
Республикэм иэкономикэ зыкъезыгъэIэтырэ, чIыпIэм къыщахьыжьырэ продукцие дэгъур Адыгеим щыпсэухэрэм аIэкIэзыгъахьэрэ гъомылэпхъэшI, перерабатывающэ промышленностым изегъэушъомбгъун лъэшэу анаIэ тырагъэты.
Адыгэ Республикэм имэкъу-мэщрэ иперерабатывающэ промышленнострэ яIофышIэхэм, яветеранхэм яIоф дэгъоу зэрагъэцакIэрэм, ячIыгу гупсэ зэрэфэшъыпкъэхэм, республикэм иэкономикэ ихэхъоныгъэ яIахьышIу зэрэхашIыхьэрэм афэшI тызэрафэразэр ямэфэкI мафэ ятэIо.
Ныбджэгъу лъапIэхэр, псауныгъэ пытэ, щыIэкIэ-псэукIэшIу шъуиIэнэу, IофышIоу ешъухьыжьэрэ пстэуми гъэхъагъэхэр ащышъушIынэу шъуфэтэIо!
Адыгэ Республикэм и ЛIышъхьэу, Урысые политикэ партиеу «Единэ Россием» и Адыгэ регион къутамэ и Секретарэу КъумпIыл Мурат
Адыгэ Республикэм и Къэралыгъо Совет —Хасэм и Тхьаматэу Владимир Нарожный