Урысыемрэ Адыгеимрэ якъэралыгъо тынхэр аIэкIэгъэ­хьажьыгъэным фэгъэхьыгъэ Iофтхьабзэр тыгъуасэ Адыгэ Республикэм и Къэралыгъо филармоние щыкIуагъ. Адыгеим и ЛIышъхьэу КъумпIыл Мурат ясэнэхьаткIэ къахэщыгъэхэм афэгушIуагъ.

Республикэм и ЛIышъхьэ зэ­рэхигъэунэфыкIыгъэмкIэ, хьа­кIэхэр зыщагъэлъэпIэрэ, лъэпкъ зэфэшъхьафхэр зыщызэгурыIорэ Адыгеим культурэ-тарихъ кIэн байрэ экономикэ амалышхо­хэмрэ иIэх. Ау анахьэу респуб­ликэр зэрыгушхорэр сэнаущыгъэ зыхэлъ, IофшIэным зыIэ екIурэ цIыфхэу ащ хэхъоныгъэ езыгъэ­шIыхэрэр ары.

«Мы залым къыщызэрэугъо­игъэхэм а гущыIэхэр япэсыгъэ шъыпкъ. Хьалэлэу шъузэрэлажьэрэм, IэпэIэсэныгъэшхо зэрэшъухэлъым, Iофэу къыхэшъухыгъэм шъузэрэфэшъыпкъэм афэшI тхьашъуегъэпсэу шъосэIо, — къыIуагъ КъумпIыл Мурат. — Гуетыныгъэ фышъуи­Iэу зэкIэми шъузэрэлажьэрэм фэшI сышъуфэраз. Непэ, лъэпкъ про­граммэхэмрэ Адыгэ Республи­кэм социальнэ-экономикэ хэ­хъоныгъэ зэри­шIыщт унэе про­граммэмрэ зыщыпхырытщырэ лъэхъаным, шъуа­щыщ пэпчъ ащ иIахьэу хишIыхьэрэм мэхьанэшхо иI. ЫпэкIэ хэхъоныгъэу тиIагъэ­хэм танэсыжьын, хэгъэгум и Президентэу Владимир Путиным пшъэрылъэу къытфи­гъэуцугъэхэр дгъэцэкIэнхэ фае. Къэралыгъом и Президент къызэриIогъагъэу, «сыдигъуи фэмыдэу непэ обществэм хэтхэр пытэу зэкъоуцонхэ фае, тызэкъотмэ ары тызылъэшыщтыр». ТIэ зэкIэ­дзагъэу тызэдэлажьэмэ, бэ къызэрэддэхъущтым сицыхьэ телъ».

Республикэм и ЛIышъхьэ псауныгъэм икъэухъумэнкIэ, гъэсэныгъэмкIэ, мэкъу- мэщымкIэ, юриспруденциемкIэ ыкIи нэмыкI лъэныкъохэмкIэ IофышIэ пэрытхэм ацIэ къыриIуагъ, ахэм ащыщ пэпчъ Адыгейми, хэгъэгуми яхэхъоныгъэ иIахь зэрэхишIыхьэрэр хигъэунэфыкIыгъ.

Урысые Федерацием и Президент и УнашъокIэ ООО-у «Георгиевское» зыфиIорэм ичIыгулэжьэу Светлана Злобинамрэ мэкъумэщ артелэу «Радуга» зыфиIорэм итрактористэу Владимир Никитинымрэ щытхъуцIэу «Урысые Федерацием мэкъу-мэщымкIэ изаслуженнэ IофышI» зыфиIорэр афагъэшъошагъ. КультурэмкIэ Тимирязевскэ къо­джэ Унэм ипащэу Любовь Мокровам щытхъуцIэу «Урысые Федерацием культурэмкIэ изаслуженнэ IофышI» зыфиIорэр фагъэшъошагъ.

Республикэм ыпашъхьэ гъэхъэгъэ ин дэдэхэр зэрэщыряIэхэм фэшI Адыгэ Республикэм и ЛIышъхьэ и УнашъокIэ медалэу «Адыгеим и Щытхъузехь» зыфи­Iорэр афагъэшъошагъ Адыгэ Республи­кэм иофициальнэ лIыкIоу Краснодар краим иадминистрацие ипащэ (игубернатор) дэжь щыIэ Александр Наролиным, искусствэхэмкIэ Адыгэ республикэ колледжэу У. Хь. Тхьабысымэм ыцIэ зы­хьырэм икIэлэегъаджэу Нэхэе Тэмарэ, пенсионеркэу Елена Матвеевам.

ЩытхъуцIэу «Адыгэ Республикэм народнэ гъэсэныгъэмкIэ изаслуженнэ IофышI» зыфиIорэр афагъэшъошагъ Адыгэ РеспубликэмкIэ кIэлэегъэджэ колледжэу Хъ. Андырхъуаем ыцIэ зыхьырэм икIэлэегъаджэхэу Любовь Вербицкэмрэ Анжелика Ковязинамрэ.

ЩытхъуцIэу «Адыгэ Республикэм псауныгъэр къэухъумэгъэнымкIэ изаслуженнэ IофышI» зыфиIорэр афагъэшъошагъ Мыекъопэ къэлэ клиникэ сымэджэщым иврач шъхьаIэ игуадзэу Наталья Дюминам, Джэджэ гупчэ район сымэджэщым иврач шъхьаIэу Наталья Бурмистровам, Адыгэ республикэ клиникэ инфекционнэ сымэджэщым иотделение ипащэу, иврач-инфекционистэу Серафима Крыловам.

ЩытхъуцIэу «Адыгэ Республикэм изаслуженнэ юрист» зыфиIорэр афагъэ­шъошагъ Урысые Федерацием и Следственнэ комитет Адыгэ РеспубликэмкIэ иследственнэ гъэIорышIапIэ ипащэ игуадзэу Альберт Абрамян, Адыгэ Рес­публикэм и Апшъэрэ Хьыкум ихьыкумышIэу Лариса Демьяненкэм, Адыгэ Республикэм и МВД иследователь шъхьа­Iэу Виктория Клименкэм, Урысые Федерацием и Следственнэ комитет Адыгэ РеспубликэмкIэ иследственнэ гъэIорышIапIэ криминалистикэмкIэ иотдел иследователь-криминалистэу Виктор Марцыхэ, Адыгэ Республикэм и Къэралыгъо Совет — Хасэм и Аппарат и Правовой гъэIорышIапIэ ипащэ игуадзэу Тамара Трепалинам, Адыгэ Респуб­ликэм и Апшъэрэ Хьыкум ихьыкумышIэу Чэтыжъ Светланэ.

ЩытхъуцIэу «Адыгэ Республикэм изаслуженнэ эколог» зыфиIорэр афагъэ­шъошагъ Кавказ къэралыгъо чIыопс биосфернэ заповедникэу Х. Г. Шапошниковым ыцIэ зыхьырэм ипащэу Сергей Шевелевымрэ ащ игуадзэу Николай Ескинымрэ.

ЩытхъуцIэу «Адыгэ Республикэм иза­служеннэ артист» зыфиIорэр афагъэ­шъошагъ Адыгеим лъэпкъ къашъомкIэ и Къэралыгъо академическэ ансамблэу «Налмэсым» иартистэу Едыдж Гушъаорэ Урыс къэралыгъо драматическэ театрэу А. С. Пушкиным ыцIэ зыхьырэм драмэмкIэ иартистэу Лия Теленковамрэ.

ЩытхъуцIэу «Адыгэ Республикэм культурэмкIэ изаслуженнэ IофышI» зыфиIорэр афагъэшъошагъ народнэ культурэмкIэ Теуцожь гупчэм орэдIонымкIэ инароднэ ансамблэу «Орэд» зыфиIорэм иконцертмейстерэу Джэндар Азмэт, Адыгеим лъэпкъ къашъомкIэ и Къэралыгъо академическэ ансамблэу «Налмэсым» ибалетмейстерэу Цундышк Нурыет, кIэлэцIыкIу орэдыIо-эстраднэ студиеу «Радуга» зыфиIорэм ипащэу Елена Щербак.

ЩытхъуцIэу «Адыгэ Республикэм изаслуженнэ псэолъэшI» зыфиIорэр фагъэшъошагъ гъогушIынымкIэ гъэIорышIапIэу N 3-м иасфальтбетонышI завод имастер шъхьаIэу Чэныш Мурат.

ЩытхъуцIэу «Адыгэ Республикэм изаслуженнэ тренер» зыфиIорэр фагъэ­шъошагъ Джэджэ кIэлэцIыкIу-ныбжьыкIэ спорт еджапIэм итренер-кIэлэегъаджэу Адзынэ Алый.