Зэпахырэ узэу коронавирусым Урысыем анахьэу зыкъызыщиIэтыщтыр шэкIогъум ыгузэгур ары. «РИА Новости» зыфиIорэ къэбарлъыгъэIэс агентствэм Урысые экономикэ университетэу Плехановым ыцIэ зыхьырэм икафедрэ идоцентэу Ольга Лебединскаям зэдэгущыIэгъоу дишIыгъэм мыр къыщиIуагъ.

Джащ фэдэу, илъэсыкIэ мэфэкI зыгъэ­псэфыгъохэм ауж узыр нахь зэкIэкIонэу ащ хигъэунэфыкIыгъ. Экспертым къызэрэхигъэщыгъэмкIэ, мы уахътэм сымаджэ хъухэрэм япчъагъэ щынэгъо дэдэп. Лебединскаям игущыIэхэмкIэ, узыр къызэрэхагъэщырэ шIыкIэхэр нахьышIу хъугъэх, ащ епхыгъэ уплъэ­кIунхэу ашIыхэрэм нахь ахэхъо.

Нэбгырэ мини 100-м телъытагъэу узыр къызыпыхьэхэрэм ястатистикэу ыкIи зызэриушъомбгъурэм икоэффициентэу къалъытагъэр щысэу экспертым къыхьыгъ. ГущыIэм пае, зызэриушъомбгъурэмкIэ мы уахътэм апэ итхэр Яма­ло-Ненецкэ шъолъырыр, Къалмыкъыр, Москва.

— ЭкономикэмкIэ зэрарэу къакIорэр къэIогъуае: мэлылъфэгъу мазэр ара хьауми чъэпыогъум зэкIэ шъолъырхэр нахь зыщызэлъикIурэр ара, — хегъэу­нэфыкIы Ольга Лебединскаям.

Инфекционистэу, вакцинологэу Евгений Тимаковым ыпэкIэ къызэриIогъагъэм­кIэ, мазэм къыкIоцI узыр зыпкъ иуцонышъ, нахь екIотэхэу фежьэщт. «Ау, къызэрэщыкIэщт пIалъэм зиукIыхьыщт ыкIи щылэ мазэм ыкIэм нэсыщт», — къыIуагъ ащ. Вирусологэу Александр Лукашевым зэрилъытэрэмкIэ, эпидемием ижъотыпIэ 2020-рэ илъэсым ыкIэм нэсыщт. Ащ дакIоу зэрапыхьэрэм ипсынкIагъэ зэрэхахъорэр гъатхэм щыIэгъэ пчъагъэм бэкIэ текIыщтэп.