Аужырэ мафэхэм коронавирусыр къызэолIагъэу Ады­ге­им къыщыхагъэщыхэрэм япчъагъэ хэхъожьынэу ри­гъэжьагъ.

Зэпахырэ узым зимыушъомбгъуным пае цIыфыбэ зэхахьэ зэрэмыхъущтыр, санитарнэ шапхъэхэр гъэцэкIэгъэнхэр шIокI зимыIэ Iофэу зэрэщытыр мызэу, мытIоу специалистхэм къаIуагъэ нахь мышIэми, ар нахьыбэхэм агъэцэкIэжьыщтыгъэп.

Адыгэ Республикэм ыкIи Пшызэ шъо­лъыр ямуфтий шъхьаIэу Къэрдэнэ Аскэрбый мы Iофы­гъом ынаIэ тыридзагъэу, респуб­ликэм щыпсэухэрэм за­къыфигъэзагъ.

— Зэпахырэ узыр къызэуалIэрэр нахь макIэ зэхъум, цIыфхэм санитарнэ шапхъэхэр Iэпэдэлэл ашIыгъэх. ГухэкIми, джы мары нахьыбэу ыгъэсымаджэ хъу­жьыгъэ, ащ тимыгъэгумэкIын тлъэкIырэп, — къыIуагъ муфтиим гущыIэгъу тызыфэхъум. — ЦIыфхэм вирусыр зэрэзэкIэмыкIожьыгъэр, шапхъэхэр аукъо зэрэмыхъущтхэр икъоу къагурыгъэIо­гъэн фае. Ар тэри типшъэрылъэу сэлъытэ. Iимамхэмрэ ефэндхэмрэ мы лъэныкъом­кIэ Iофышхо зэшIуахы. Къуаджэм къин къыдэхъухьагъэмэ, апэу ахэр екIуалIэх, цIыфыбэ ащызэхэмыхьэмэ, тхьаусыхакIо къэкIуагъэхэр благъэу зэмыкIуалIэхэу афэтхьаусыхэхэмэ зэрэнахьышIур агурагъаIо. КъыдгурэIо, къиныр къин, ау етIани цIыфхэр нахь макIэу зэхэхьанхэм, къекIолIагъэхэр нэбгырабэу зэхэмытынхэм унагъори лъыплъэн фае.

Апэрэ мафэм къыщегъэжьагъэу быс­лъымэнхэм я ДиндэлэжьапIэ санитарнэ шапхъэхэр мэщытхэм ащагъэцэкIэнхэм ынаIэ тет. Мары Iофхэр къызэ­рэхъухэрэм тылъэплъэ, вирусым джыри нахь лъэшэу зиушъомбгъумэ, мэщытхэм ащызэхэмыхьанхэу, бэрскэшхо нэмазхэр яунэхэм ащашIынхэу ятIощт.

Коронавирусыр къызэуалIэхэ­рэм япчъагъэ зэрэхэхъожьырэм ыгъэгумэкIэу иеплъыкIэхэр къы­риIотыкIыгъэх Мыекъуапэ ыкIи Адыгэ Республикэм я Архиепископэу Тихони.

Нэбгырэ пэпчъ ипсауныгъэ, ищыIэныгъэ фэсакъын, цIыфэу къэзыуцухьэ­хэрэми ягупшысэн фаеу зэрэщытым ащ къыкIигъэтхъыгъ.

— Зэпахырэ узым цIыфхэр динэу алэжьырэмкIэ, лъэпкъэу зыщыщхэмкIэ е аныбжьыкIэ зэтырифыхэрэп. ГухэкI— ми, зэкIэмэ анэсын ылъэкIыщт. Арышъ, динэу зыпылъхэми, лъэпкъэу къызыхэ­кIыгъэхэми ямылъытыгъэу, зэкIэ Адыге­им исхэм сакъыныгъэ къызхагъэфэнэу сыкъяджэ, — къыIуагъ ащ. — Зэпахырэ узым санитарнэ шапхъэу къытфихьыгъэ­хэм зэкIэми къин тагъэлъэгъу, ау къыд­гу­рыIон фаер ахэр игъом ыкIи икъоу дгъэцакIэхэмэ, нахь псынкIэу нахьыпэрэ щыIакIэм тызэрэтеуцожьыщтыр ары. Шапхъэхэр зы нэбгырэ Iэпэдэл зишIыкIэ, ежь вирусыр къызэрэнэсыщтым имызакъоу, нэбгырэ пчъагъэми ар аритынышъ, къин къафихьынкIэ зэрэщына­гъор, ащ пэпчъ а узым нахь зызэриушъомбгъурэр зыщытэшъумыгъэгъупш. Апэрэ мафэхэм къащегъэжьагъэу чылысхэм санитарнэ шапхъэхэр ащагъэцакIэх, Iофхэр нахьышIу зэхъуми ахэр тетхыжьыгъэхэп. ЦIыфэу къакIохэрэм маскэхэр аIулъынхэ, аIэхэм вирусыр зыукIыщтхэр атыраутхэн фае, зэпэблагъэу зэмыкIолIэнхэми тынаIэ тет.

ХЪУТ Нэфсэт.