COVID-19-м пэуцужьыгъэнымкIэ Урысые Федерацием и Президентэу Владимир Путиным игъо зэрилъэгъугъэм тетэу Адыгэ Республикэм ахъщэ тедзэ къыфыхэгъэкIыгъэным ехьылIэгъэ унашъор УФ-м и Правительствэ зэхэсыгъоу тыгъуасэ иIагъэм щаухэсыгъ.

ГущыIэм пае, сомэ миллион 57,6-р илъэси 3-м къыщегъэ­жьагъэу илъэси 7-м нэс зыныбжь кIэлэцIыкIухэм мазэ къэс аратырэ ахъщэ IэпыIэгъум пэIухьащт. Сомэ миллиони 8,7-р социальнэ IофышIэхэу коронавирусыр къызэутэлIа­гъэ­хэм къадекIокIыхэрэм аратыщт.

Адыгеим и ЛIышъхьэу КъумпIыл Мурат къэбар жъугъэм иамалхэм яIофышIэхэм къазэрариIуагъэмкIэ, федеральнэ гупчэмрэ шъолъырхэмрэ дэгъоу зэрэзэдэлажьэхэрэм ишIуа­гъэкIэ хэгъэгум и Президент къафигъэнэфэгъэ пшъэрылъхэр икъоу агъэцакIэх, социальнэу дэеу ухъумагъэхэм, пан­демием пэуцужьырэ специалистхэм ящыкIэгъэ IэпыIэгъур ара­гъэгъотын алъэкIы.

«КIэгъэгушIу мэхьанэ зиIэ, социальнэ ахъщэ IэпыIэгъухэр зэраратыхэрэм Адыгеим ренэу гъунэ щылъафы. Министерствэхэм япащэхэм сэ пшъэрылъ афэсшIыгъ зытефэхэрэм игъом ыкIи икъоу ахъщэ IэпыIэгъур аIэкIагъэхьанэу», — хигъэунэфыкIыгъ КъумпIыл Мурат.

Шъугу къэтэгъэкIыжьы: Адыгэ Республикэм мылъку тедзэ къыфэтIупщыгъэным ехьы­лIэгъэ унашъор Урысые Федерацием и Правительствэ зиштагъэр Урысые Федерацием и Федеральнэ ЗэIукIэ бюджет мылъкур атегощэжьыгъэнымкIэ икомиссие ащ къы­зыды­регъаштэр ары. Адыгеим ыцIэкIэ Къэралыгъо Думэм идепутатэу Владислав Резник ащкIэ ишIогъэшхо къыгъэкIуагъ.

«Президентым зэригъэнэфагъэм тетэу гъэтхапэм къыщыублагъэу илъэси 3-м къыще­гъэжьагъэу илъэси 7-м нэс зыныбжь кIэлэцIыкIухэр зиIэ уна­гъохэм ахъщэ IэпыIэгъу тедзэ аратэу аублагъ. Ащ Правительствэм пшъэрылъ къыфи­шIыгъ а гухэлъхэм апае фе­деральнэ бюжетым имылъку шъолъырхэм къафыхагъэкIынэу. Джащ къыщегъэжьагъэу парламент комиссиемрэ Правительствэмрэ дэгъоу зэрэзэ­дэлэжьагъэхэм ишIуагъэкIэ Адыгеим исхэм сомэ миллион 466,1-рэ хъурэ ахъщэ IэпыIэгъу тедзэ къафыхагъэкIыгъ», — къыIуагъ Владислав Резник.