Лъэпкъ шIэжьым, адыгабзэм изэгъэшIэн, шы спортым зегъэушъомбгъугъэным афэгъэхьыгъэ зэIукIэр республикэ общественнэ движениеу «Адыгэ Хасэм» щызэхащагъ.

Адыгэ Хасэм итхьаматэу ЛIымыщэкъо Рэмэзан адыгабзэм изэгъэшIэн, игъэфедэн Iофыгъо шъхьаIэхэм ащыщэу ылъытагъ. КIэлэцIыкIу IыгъыпIэхэм егъэджэныр, пIуныгъэр, джэгукIэхэр зэращызэхащэхэрэм ехьылIэгъэ уплъэкIунхэр Адыгэ Хасэм зэ­хищэщтых. Iофтхьабзэм респуб­ликэм и Правительствэ, районхэм ыкIи къалэхэм яадминист­рациехэм якъулыкъушIэхэр хэлэжьэщтых.

Адыгэ къуаджэхэм адэт кIэлэцIыкIу IыгъыпIэхэм ащыщхэм адыгабзэр зэращызэрагъашIэрэм джырэ уахътэ уигъэразэрэп. ЩыкIагъэхэр дагъэзыжьынхэм фэшI Адыгэ Хасэм и Хэсашъхьэ хэтхэр кIэлэпIухэм аIукIэщтых, зэфэхьысыжьхэр ашIыщтых.

Адыгэ Хасэм иапэрэ тхьама­тэу, Дунэе Адыгэ Хасэм итхьа­мэтэ гъэшIуагъэу, шIэныгъэлэжь цIэрыIоу, тхакIоу Шъхьэлэхъо Абу ыгу къытемыожьырэми, ишIу­шIагъэкIэ къытхэт, щысэ тетэхы. А. Шъхьэлахъом ыцIэкIэ Очэпщые иурамхэм ащыщ зэреджэщтхэм, саугъэт зэрэфагъэуцущтым, адыга­бзэм изэгъэшIэн къатегущыIагъэх ЛIымыщэкъо Рэмэзан, Бэгъушъэ Алый, Къэзэнэ Юсыф, Тэу Аслъан, ЦIыкIу­шъо Аслъан, Хъот Юныс, Къуижъ Къэплъан, нэмыкIхэри. Зэхэща­кIохэм яIофыгъохэм Адыгэ Хасэр ахэлажьэ.

Шы спортыр

ТекIоныгъэм ия 75-рэ илъэс фэгъэхьыгъэ зекIохэм, мэфэкI зэхахьэхэм шыухэр зэрахэлэжьагъэхэм Тхьапшъэкъо Альберт къатегущыIагъ. Рагъэжьэгъэ Iофыр лъагъэкIуатэзэ, шы спортым, театрализованнэ едзыгъо­хэм зарагъэушъомбгъущт.

Урысыем изаслуженнэ артистэу Бэрзэдж Сыхьатбый искусствэм щыцIэрыIу. Англием, Японием, Москва, нэмыкIхэм ащыIагъ, шы спортым пылъ.

Шыу ныбжьыкIэ купхэр Адыгэ Хасэм зэхищэщтых, театрализованнэ къэгъэлъэгъонхэм цIыфхэр арагъэплъыщтых. Тхьапшъэ­къо Альбертрэ Бэрзэдж Сыхьатбыйрэ къызэраIуагъэу, Мые­къуапэ, районхэм шыу купхэр ащызэхащэхэу фежьагъэх. Iофыр зэрэлъыкIуатэрэм гъэзетеджэхэр щыдгъэгъозэщтых.

«Матэм» ишIухьафтын

Адыгэ къуаер къызыщашIырэ IофшIапIэу «Матэм» ипащэу Цышэ Казбек республикэм имэфэкI фэгъэхьыгъэу Адыгэ Хасэм къыфэгушIуагъ.

СурэтышI-модельерэу СтIашъу Юрэ, археологэу Тэу Аслъан дунаим щызэлъашIэх, Адыгэ Ха­сэм игъэцэкIэкIо куп хэтых, об­щественнэ Iофыгъохэм чанэу ахэлажьэх.

Адыгэ къуаехэр зыдэлъ пхъон­тэжъые гъэкIэрэкIагъэхэр «Ма­тэм» афигъэшъошагъэх СтIашъу Юрэрэ Тэу Аслъанрэ. ЛIымыщэкъо Рэмэзан тицIыф цIэрыIохэм афэгушIуагъ, шIухьафтынхэр аритыжьыгъэх.

Тэхъутэмыкъое районым икъуа­­­джэхэм яурамхэм цIэу афаусыхэрэм ыгъэгумэкIэу Хьа­джые Адам зэхахьэм къыщы­гущыIагъ, зэIукIэгъум нэмыкI Iофхэри къыщаIэтыгъэх.

Сурэтым итхэр: А. Тэум Хасэм хэтхэр фэгушIох.