АР-м и ЛIышъхьэу КъумпIыл Мурат осетрэ пцэжъые лъэпкъыр зыщахъурэ мэкъумэщ-фермер хъызмэтшIапIэу станицэу Ханскэм дэтым кIогъагъэ. Ащ игъусагъэх УФ-м и Президент и ЛIыкIоу Къыблэ Федеральнэ шъолъырым щыIэм и Аппарат ифедеральнэ инспектор шъхьаIэу Сергей Дрокинымрэ АР-м мэкъумэщ хъызмэтымкIэ и Министерствэ ипащэхэмрэ.

ЕзыгъэжьэгъэкIэ фермерхэм къэралыгъо IэпыIэгъу ятыгъэным фытегъэпсыхьэгъэ респуб­ликэ программэм къыдэлъытагъэу Левон Гукасян зипэщэ хъызмэтшIапIэм грантэу сомэ миллионрэ мин 300-рэ 2013-рэ илъэсым къыратыгъагъ. АщкIэ осетрэ ныбжьыкIэу килограмм минитIу къыщэфыгъ. 2014 — 2018-рэ илъэсхэм джыри сомэ миллион 30 инвестициеу хилъхьагъ. А мылъкумкIэ пцэжъые цIыкIухэм ахигъэхъуагъ, квад­ратнэ метрэ минрэ ныкъорэ хъурэ чIыпIэм къыдэгъэкIыпIэ щигъэпсыгъ. Джащ фэдэу илъэ­ситIукIэ узэкIэIэбэжьмэ, пцэ­жъы­ер зыщихъущт бассейнхэр джыри станицэу Ханскэм щигъэпсыгъэх.

КъумпIыл Мурат осетрэ пцэ­жъые лъэпкъым ихъун мэкъу­мэщ хъызмэтым ылъэныкъоу анахьыбэу федэ къэзыхьыхэрэм зэращыщыр къыхигъэщыгъ.

— Федэ къэзыхьыщт проект гъэшIэгъонхэм кIэщакIо афэ­хъоу, къыдигъэкIырэм хэзыгъахъоу, иамалхэм зязыгъэу­шъомбгъурэ хъызмэтшIапIэ­хэм къэралыгъо программэхэм къахиубытэу IэпыIэгъу тафэхъуным тыфэхьазыр, — къыIуагъ республикэм ипащэ. — Осетрэм ихъун республи­кэмкIэ кIэу щытэп, опыт гъэ­нэ­фагъэ щыI, ащкIэ узэдэ­гощэн, лъыбгъэкIотэн плъэ­кIыщт.

Зэпстэур ЛIышъхьэм къызэфихьысыжьзэ, къэралыгъо IэпыIэгъум фытегъэпсыхьэгъэ фе­деральнэ ыкIи шъолъыр программэхэм мэкъумэщ хъыз­мэтшIапIэхэр нахьыбэу зэрахэ­лэжьэщтхэм Iоф дашIэнэу АР-м мэкъу-мэщымкIэ и Министерствэ пшъэрылъ гъэнэфагъэхэр фишIыгъэх.