Мыекъуапэрэ Мыекъопэ районымрэ адэсхэм ащыщхэм чъэпыогъум и 8-м къыщегъэжьагъэу псыр икъоу къазэраIэкIэмыхьащтымкIэ муниципальнэ унитарнэ предприятиеу «Майкопводоканалым» макъэ къыгъэIугъ.

Адыгеим и ЛIышъхьэу КъумпIыл Мурат мы мафэхэм цIыф­хэм псыр зэраIэкIэхьащтым епхыгъэ IофыгъохэмкIэ зэхэсыгъо зэхищэнэу Адыгэ Респуб­ликэм и Премьер-министрэу Геннадий Митрофановым пшъэ­рылъ фишIыгъ. Зэхэсыгъом хэлэжьагъэх Адыгэ Республикэм и Премьер-министрэ игуадзэу Сапый Вячеслав, Адыгэ Респуб­ликэм псэолъэшIынымкIэ, транспортымкIэ, псэупIэ-коммунальнэ, гъогу хъызмэтхэмкIэ и Ми­нистерствэ ипащэу Валерий Картамышевыр, Мыекъуапэ имэрэу Андрей Гетмановыр, Мыекъопэ районым ипащэу Олег Топоровыр, «Майкопводоканалым» ипащэу Апэжьыхьэ СултIан, къэралыгъо бюджет учреждениеу «Стройзаказчи­кым» ипащэу Абрэдж Аслъан, ошIэ-дэмышIэ IофхэмкIэ къэлэ гъэIорышIапIэм ипащэу Абрэдж Къэплъан.

Зэхэсыгъом зэрэщыхагъэунэфыкIыгъэмкIэ, цIыфхэм икъоу псыр къаIэкIэмыхьаныр къыз­хэкIыгъэр псырыкIуапIэм изы­Iахь ишIын епхыгъэ IофшIэнхэр зэрэкIохэрэр ары.

Валерий Картамышевым къызэриIуагъэмкIэ, псыхъоу Цыцэ дэжь псыIыгъыпIакIэр щагъэпсы. Чъэпыогъум и 11-м нэс IофшIэнхэр аухынэу рахъу­хьэ. Къалэу Мыекъуапэ имэр макъэ къызэригъэIугъэмкIэ, псыр тыдэкIи щаубытыщтэп. Унэе унэхэр зиIэхэм, апэрэ къатхэм атесхэм ар къаIэкIэ­хьащт. Пчэдыжьырэ сыхьатыр 6-м къыщегъэжьагъэу 9-м къэс ыкIи пчыхьэрэ сыхьатыр 6-м къыщегъэжьагъэу 9-м нэс псыр икъоу къатыщт. Мыекъопэ районми псым икъэтынкIэ график гъэнэфагъэ щагъэфедэщт.

Къэралыгъо бюджет учреждениеу «Стройзаказчикым» ипащэу Абрэдж Аслъан къызэриIуа­гъэмкIэ, псырыкIуапIэм ишIын джыдэдэм ыкIэм фэкIо. Илъэсэу итым ыкIэхэм адэжь проектым игъэцэкIэн аухынэу рахъухьэ.

Геннадий Митрофановым муниципальнэ унитарнэ предприятиеу «Майкопводоканалым» пшъэрылъ фишIыгъ псырыкIуапIэр зэщымыкъонымкIэ ищыкIэгъэ амалхэр зэрихьанхэу. Мые­къуапэрэ Мыекъопэ районымрэ япащэхэм япшъэрылъ цIыфхэм заявкэхэр къызатыкIэ псы аIэ­кIагъэхьанэу. Республикэм ипа­щэхэм анахьэу анаIэ зытырагъэтырэр социальнэ учреждениехэм Iоф ашIэныр, санитарнэ-эпидемиологие шапхъэхэр ахэм къащыдалъытэныр ары.

Геннадий Митрофановым зэхэсыгъом къыщиIуагъ псыр икъоу къызкIаIэкIэмыхьэрэмкIэ цIыфхэм къэбархэр нахьышIоу алъагъэIэсын зэрэфаер. Адыгэ Республикэм и ЛIышъхьэу Къум­пIыл Мурат мы Iофыгъом пхъа­шэу гъунэ лъефы.

АР-м и ЛIышъхьэ ипресс-къулыкъу