Вакцинэхэр цIыфхэм ахалъхьаным фытегъэпсыхьэгъэ Iофтхьабзэхэр Адыгеим чанэу щырагъэкIокIых.

Прививкэ зыщашIырэ чIыпIэу культурэм и Унэу «Гигантым» къыщызэIуахыгъэм блэкIыгъэ шэмбэтми Iоф ышIагъ. Ащ шIоигъоныгъэ зиIэ пстэури Iухьан, вакцинэ зыхаригъэлъхьан ылъэ­кIыщт, зы такъикъым нахьыбэрэ пылъыщтхэп. Къыхэгъэщыгъэн фае врачыр лъып­лъэзэ вакцинэр цIыфым зэрэхалъхьэ­рэр. Iофтхьабзэм къыдыхэлъытагъэу нэбгырэ 90-м ехъумэ прививкэ ашIыгъ. Непэрэ мафэм ехъулIэу Адыгеим апэрэу къыIэкIэхьагъэр зэкIэ ыгъэфедагъ ыкIи нэбгырэ мин 84-м ехъумэ вакцинэр ахалъхьагъ. Ар агъэнэфэгъа­гъэм ипроцент 30 мэхъу. «Совигрипп» зыфиIорэ вакцинэ 78886-рэ республикэм джыри къы­IэкIэхьагъ. Ар зыныбжь икъу­гъэхэм ахалъхьащт.

— Прививкэ зышIын гухэлъ зиIэхэр зыщыпсэухэрэ чIыпIэм епхыгъэ IэзапIэхэм якIолIэнхэ е участковэ терапевтым зыфагъэзэн фае. Непэрэ мафэм ехъулIэу гриппыр къыомыутэкIынымкIэ вакцинэм нахь зишIуагъэ къэкIорэ пэшIорыгъэшъ Iофтхьабзэ щыIэп, — къыщыхагъэщы АР-м псауныгъэр къэухъу­мэгъэнымкIэ и Министерствэ.

Сурэтыр Н. Гусевам тыри­хыгъ.