Шъолъырхэм ягурыт еджапIэхэм яублэпIэ классхэм арысхэм шхын стыр зэраIуфэрэр Iоныгъом къыкIоцI зэрагъэшIагъ. Ны-тыхэр, «Единэ Россием» идепутатхэр, партием ишъолъыр, ичIыпIэ къутамэхэм, «Гвардие ныбжьыкIэм» ахэтхэр, хэбзэ къулыкъухэм, ведомствэ гъэнэфагъэхэм ялIыкIохэр ащ фэдэ уплъэкIунхэм игъэкIотыгъэу ахэлэжьагъэх.Ахэм зэфэхьысыжь шъхьаIэу ашIыгъэр ублэпIэ еджапIэхэм ачIэсхэр шхын стыркIэ дэгъоу агъашхэхэу ары. А гухэлъхэм апае федеральнэ бюджетым къыхагъэкIыгъэ мылъкур зэрэщытэу шъолъырхэм аIукIагъ. Гурыт еджапIэхэм япроцент 80-м ехъумэ пчэдыжьым ыкIи щэджагъом апагъохыщт шхын стырхэр ежь-ежьырэу агъэхьазырых, процент 18-мэ ахэр нэмыкI чIыпIэ къыращых, процент 1,5-мэ кIэлэеджакIохэр нэмыкI шхапIэхэм ащэх. Тюменскэ хэкумкIэ зипсауныгъэ пыч фэхъугъэ кIэлэеджакIохэу яунэ исэу еджэхэрэм гъомылэпхъэ зэфэшъхьафхэр ядэжь афарагъащэ.

УплъэкIунхэр зэхэзыщагъэхэм зэралъытэрэмкIэ, чIыпIэ заулэмэ кIэлэеджакIохэр зэращагъашхэрэ шIыкIэр нэмыкI шъо­лъырхэми къащызфагъэфедэн алъэкIыщт. ГущыIэм пае, оптовэ гупчэр ары Самарскэ хэкум игурыт еджапIэхэмрэ исоциальнэ учреждениехэмрэ гъомылапхъэхэр къаIэкIэзыгъахьэрэр.

УплъэкIунхэм ялъэхъан кIэлэцIыкIухэр зэрагъашхэхэрэмкIэ «Единэ Россиер» цIыфхэм яупчIыгъ. Ны-тыхэмрэ кIэлэ­еджакIохэмрэ япроцент 85-мэ шхыным ыгъэразэхэу къаIуагъ. Брянскэ хэкумкIэ процент 97-мэ, Новосибирскэ хэкумкIэ – процент 96-мэ, Къэрэщэе- ЩэрджэсымкIэ – процент 94-мэ, Чувашскэ РеспубликэмкIэ – процент 93,5-мэ, Саратовскэ хэкумкIэ – процент 93-мэ, Рес­публикэу МордовиемкIэ – процент 92-мэ, Белгород хэкумкIэ – процент 91-мэ, Калужскэ хэкумкIэ – процент 90,5-мэ, Курскэ хэкумкIэ – процент 90,5-мэ, Псковскэ хэкумкIэ – процент 90-мэ, Воронежскэ хэкумкIэ – процент 90-мэ, Ульяновскэ хэкумкIэ – процент 90-мэ, Удмуртскэ РеспубликэмкIэ – процент 90-мэ ахэм къадырагъэштагъ. Пхъэшъхьэ-мышъхьэхэмрэ хэтэрыкIхэмрэ яIанэ нахьыбэу къытехьэ зэрашIо­игъор нэбгырэ зырызмэ къа­Iуагъ.

КIэлэеджакIохэм ягъэшхэнкIэ щыкIэгъэ заулэхэр шъолъырхэм къащыхагъэщыгъэх. ГущыIэм пае, Иркутскэ, Вологодскэ хэку­хэм, Республикэу Тыва, Респуб­ликэу Темыр Осетием — Аланием, Забайкальскэ краим, Се­вастополь ягурыт еджапIэхэм ащыщ­хэм япщэрыхьапIэхэм ачIэт оборудованиер жъы хъугъэ. Ин­­гушетием игурыт еджэпIэ зау­лэмэ кIэлэцIыкIухэр зыщагъа­шхэрэ чIыпIэхэр щафикъухэрэп.

«КIэлэцIыкIухэм шхын стыр еджапIэм щаIуфэным мэхьанэшхо иI. Ащ елъытыгъэщт ахэм япсауныгъэ изытет зыфэдэщтыр. «Единэ Россием» мы Iофыгъом ренэу ынаIэ тырегъэты, шап­хъэу щыIэхэм адиштэу ахэр гъэшхэгъэнхэм гъунэ лъефы. Партийнэ проектэу «Новая школа» зыфиIорэм къызэрэщыдэлъытагъэм тетэу шъолъырхэм тырягъу­сэу къыттефэрэ пшъэрылъхэм ягъэцэкIэнкIэ тфэлъэкIыщтыр зэкIэ тэшIэ. Президентэу Владимир Путиным пшъэрылъ зэрафишIыгъэм тетэу ублэпIэ еджапIэхэм ачIэсхэм апае илъэс къэс сомэ миллиард 40-м къыщымыкIэу къатIупщыщт», – къыIуагъ партийнэ проектэу «Новая школа» зыфиIорэм иIофхэм ягъэIорышIакIоу, Къэралыгъо Думэм идепутатэу Алена Аршиновам.

«Iоныгъор къызихьагъэм щегъэжьагъэу кIэлэеджакIохэм шхын стыр зэраIуфэрэм ехьылIэгъэ уплъэкIунхэр Адыгэ Респуб­ликэм щызэхащэх, — къы­Iуагъ Урысые общественнэ организациеу «Единэ Россием и НыбжьыкIэ гвардие» и Адыгэ шъо­лъыр къутамэ ипащэу, Мыекъуа­пэ идепутатэу Бэрзэдж Асы­ет. – КIэлэегъаджэхэми, ны-тыхэми, ежь кIэлэеджакIохэми дэгъоу къагурэIо кIэлэцIыкIухэм шхын стыр гурыт еджапIэм ащыIуфэн зэрэфаер».

Гъэсэныгъэ языгъэгъотырэ учреждениехэм япащэхэри, еджапIэхэм ахэт пщэрыхьапIэхэм яIофышIэхэри кIэлэцIыкIухэм яшIошIхэм къакIэдэIукIых, нахь фашIэ иIэу, пхъэшъхьэ- мышъхьэхэмрэ хэтэрыкIхэмрэ къебэкIэу, Роспотребнадзорым игъоу ылъэгъугъэ шапхъэхэм адиштэу кIэлэеджакIохэм ягъэшхэн зэрэзэхащэщтым пылъых. Ны-тыхэу уплъэкIунхэм ахэла­жьэхэрэр кIэлэцIыкIухэм ягъэшхэн зэрэзэхащэрэм егъэра­зэх».