Урысыем ифестиваль-зэнэкъокъоу «Культу-рэр — тэры» зыфиIорэм кIэлэцIыкIу къэшъокIо ансамблэу «Мыекъуапэ инэфылъэхэр» хэлэжьагъэх.Дэгъухэм анахь дэгъужьхэр зэхэщакIохэм къызыхахыхэм, тиансамблэ ыцIэ къыраIуи, кIэух концертэу Москва щыкIощтым рагъэблэгъагъ.

Урысые Федерацием культурэмкIэ и Министерствэрэ лъэпкъ творчествэмкIэ Урысыем и Къэралыгъо Унэу В. Д. Поленовым ыцIэ зыхьырэмрэ кIэщакIо зыфэхъугъэхэ фестиваль-зэнэ­къокъум къэшъуакIохэм, орэдыIо­хэм якупхэм, театрэм, циркым, музыкальнэ Iэмэ-псымэхэм апы­щагъэхэм яIэпэIэсэныгъэ къыщагъэлъэгъуагъ.

— Куп 250-м нахьыбэмэ осэшI­хэр яплъыгъэх. Щытхъу тхы­лъыр къызыфагъэшъошагъэхэм, лау­реат хъугъэхэм тэри тащыщ, — къытиIуагъ «Мыекъуапэ инэфылъэхэм» яхудожественнэ пащэу, Адыгэ Республикэм инароднэ артистэу Нэныжъ Айдэмыр. — Москва тызэрэкIуагъэм, кон­цертхэм тызэряплъырэм тагъэгушхо.

Фестивалым икIэух концертэу къэралыгъо академическэ театрэу «Урыс орэдым» щызэхащагъэм Саратов, Астрахань, Иркутскэ, Ханты-Мансийскэ, Тверь, Подольскэ, фэшъхьафхэм къарыкIыгъэхэм «Мыекъуапэ инэфылъэ­хэр» ахэтхэу уджыгъэх, лъэпкъ искусствэм идэхагъэ къагъэлъэгъуагъ. Къашъохэу «Си Адыгеир», «Лъэпкъ шIэжьыр» ансамблэм къышIыгъэх.

— Къэралыгъо академическэ къэшъокIо купэу «Гжелым», дунаим анахь щыцIэрыIомэ ащыщэу къэралыгъо академическэ лъэпкъ ансамблэу Игорь Моисеевым ыцIэ зыхьырэм яконцертхэм, яIэпэIэсэныгъэ зэрэхагъахъорэм тигуапэу тяплъыгъ, Москва ичIыпIэ дахэхэр зэтэгъэлъэгъух, — къытиIуагъ Нэныжъ Айдэмыр. — Мыекъуапэ къэдгъэзэжьмэ, концертхэм зафэдгъэхьазырыщт, лъэпкъ къашъохэр дгъэуцущтых.

Сурэтым итхэр: «Мыекъуапэ инэфылъэхэр» Москва щыIэх.