Адыгэ Республикэм и ЗАГС и ГъэIорышIапIэ зэхищэгъэ зэнэкъокъоу унагъом инасып сурэтым къызэригъэлъагъорэм фэгъэхьыгъэм икIэуххэр зэфахьысыжьыгъэх.

Республикэм и ЗАГС и ГъэIорышIапIэ, Адыгэ Республикэм культурэмкIэ и Министерствэ, Урысыем ифото-сурэтышIхэм я Союз икъутамэу Адыгэ Респуб­ликэм щыIэм, Мыекъопэ сурэттех клубэу «Лэгъо-Накъэм» зэхащэгъэ зэнэкъокъум уегъэгъуазэ.

ЗАГС-м и ГъэIорышIапIэ ипащэу Джамырзэ Заремэ зэхахьэм къыщиIуагъ унагъом иджэныкъо машIо и Мафэ фэгъэхьыгъэу зэнэкъокъур зэрэзэхащагъэр.

Унагъом ишэн-хабзэхэр къэу­хъумэгъэнхэм, унагъом ищыIакIэ къэралыгъоу зыщыпсэурэм мэхьанэу щыриIэм, ижъырэ лъэхъа­ным къыщегъэжьагъэу унагъом иджэныкъо машIо зэрэблэрэм цIыфхэм еплъыкIэу фыряIэм, гушъхьэ кIуачIэр къэIэтыгъэнымкIэ шIэжьымрэ унагъом пIуныгъэ Iофэу щызэрахьэрэмрэ зэрэзэпхыгъэхэм, нэмыкIхэм яхьылIэгъэ сурэтхэр къызэрагъэлъэгъуагъэ­хэм зэхэщакIохэр ыгъэрэзагъэх.

Зэхахьэм къыщыгущыIагъэх Адыгэ Республикэм культурэмкIэ и Министерствэ иотдел иIофышIэу Теуцожь Нурыет, Урысыем ифото-сурэтышIхэм я Союз икъутамэу Адыгэ Республикэм щыIэм итхьаматэу, Адыгеим изаслуженнэ журналистэу Аркадий Кирнос, Мыекъуапэ исурэттех клубэу «Лэгъо-Накъэм» ипащэу Ирина Кирнос, АР-м и ЗАГС и ГъэIорышIапIэ и Общественнэ Совет итхьаматэу, Урысыем ижурналистхэм я Союз хэтэу, филологие шIэныгъэхэмкIэ кандидатэу МатIыжъ Аминэт, сурэттехэу Элдарэ Мурат, нэмыкIхэри…

КIэлэцIыкIум ищыIакIэ идэхагъэ фэгъэхьыгъэ зэнэкъокъум Светлана Денисовам апэрэ чIыпIэр къыщыдихыгъ.

Унагъом икъэхъукIэ ехьылIэгъэ зэнэкъокъум Марина Орловам текIоныгъэр къыщихьыгъ.

Унагъом изэгурыIоныгъэ, изыкIыныгъэ гъэпытэгъэнхэм фэгъэ­хьыгъэ зэнэкъокъум Элдарэ Мурат апэрэ чIыпIэр къыщыди­хыгъ.

Олеся Нижельскаям, Ольга Колодяжнаям, Марина Фадеевам, нэмыкIхэм хагъэунэфыкIырэ чIыпIэхэр афагъэшъошагъэх.

Наиль Батталовыр, Дмитрий Войновыр, Виктор Лутай, фэшъ­хьаф­хэри зэнэкъокъум чанэу хэлэжьагъэх, шIухьафтынхэр афашIыгъэх.

— Зэнэкъокъум зедгъэушъомбгъущт, — къытиIуагъ Аркадий Кирнос. — Унагъом икъежьакIэ, щыIэныгъэм къыщикIурэ гъогур сурэтхэмкIэ къэгъэлъэгъогъэнхэм мэхьэнэ ин етэты.

— Республикэм культурэмкIэ и Министерствэ тапэкIи хэушъхьафыкIыгъэ шIухьафтынхэр ыгъэнэфэщтых, — тизэдэгущыIэгъу лъегъэкIуатэ Теуцожь Ну­рыет. — Сурэтыр орэдым фэд, къепIолIэн плъэкIыщтыр макIэп.

ЗАГС-м и ГъэIорышIапIэ ипащэу Джамырзэ Заремэ къыхахыгъэ сурэтхэм къатегущыIагъ, экраным къыщигъэлъэгъуагъэх, зэнэкъокъум хэлэжьагъэхэм «тхьа­шъуегъэпсэу» къариIожьыгъ.

Сурэтыр тезыхыщтыр язэрэмыгъашIэу, нэпэеплъ сурэтхэр зэхахьэм икIэух щытырахыгъэх.

Сурэтым итхэр: зэхахьэм хэлэжьагъэхэр.