Адыгэ Республикэм зэпахырэ узыкIэу коронавирусыр къырямыгъэхьэгъэнымкIэ ыкIи зыщемыгъэушъомбгъугъэнымкIэ оперативнэ штабым зэхэсыгъоу тыгъуасэ иIагъэр зэрищагъ КъумпIыл Мурат.

Джырэ уахътэм Iофхэм язытет зыфэ­дэр ащ къыщаIотагъ Роспотребнадзорым АдыгеимкIэ и ГъэIорышIапIэ ипащэу Сергей Завгороднемрэ псауныгъэр къэу­хъумэгъэнымкIэ министрэу Мэрэтыкъо Рустемрэ.

Аужырэ тхьамафэм COVID-19-р къы­зэузыгъэхэм ыкIи сымэджэщым чIэмылъхэу пневмоние зиIэ хъугъэхэм чэщ-зымафэ къэс япчъагъэ хэхъо. Джащ фэдэу ныбжь зиIэхэу сымэджагъэхэм япчъагъэ нахьыбэ мэхъу. Тыгъосэрэ мафэм ехъулIэу республикэмкIэ зэпахырэ узыр къызыхагъэщыгъэхэу агъэунэфыгъэхэм япчъагъэ нэбгырэ 4392-рэ, чэщ-зымафэм хэхъуагъэр 44-рэ. Пандемиер къызежьагъэм къыщыублагъэу хъужьыгъэр нэбгырэ 3679-рэ, чэщ-зымафэм 28-рэ. ЗищыIэныгъэ зэпигъэугъэ­хэм япчъагъэ нэбгырэ 36-рэ. Мыщ дэжьым къыхэгъэщыгъэн фае, узым илIыкIыхэрэм япчъагъэ нахь макIэ зыщы­хъугъэ шъолъырипшIымэ Адыгеир ахэфагъ.

Джырэ уахътэм Iофыр нахь къэзыгъэ­хьылъэрэр пэтхъу-Iутхъур къызэутэлIагъэхэм япчъагъэ зэрэхэхъуагъэр ары. Ар къыдалъытэзэ гриппымрэ COVID-19-мрэ къызэузыгъэхэр зэрэзэбгыращыщтхэ шIыкIэр къыхахыгъ сымэджэщхэм пневмониер къащемыкIокIыным пае. ОРВИ-мрэ пневмониемрэ къызыхагъэщыгъэхэу коронавирускIэ мысымаджэхэм апае пневмонийнэ отделение тедзэхэр сымэджэщхэм къащызэIуахыгъэх. Коронавирусыр къызлъыIэсыгъэхэм атегъэ­псыхьагъэу зэпахырэ узхэмкIэ сымэ­джэщхэм джыри гъолъыпIэ тедзэ 200 Адыгеим и ЛIышъхьэ иунашъокIэ ащагъэпсы, ащ ишIуагъэкIэ нэбгырэ 800-мэ ащяIэзэнхэ алъэкIыщт.

Медицинэ организациехэм Iэзэгъу уцхэмрэ ахэм Iоф ащызышIэхэрэм зызэраухъумэщтхэ пкъыгъохэмрэ аIэкIагъахьэ зэпыт. Республикэм джащ фэдэу IэпэчIэгъанэу тест мин 30-м ехъу Iэ­кIэлъ. Мафэ къэс нэбгырэ миным ехъу ауп­лъэкIу, лабораториехэм зэкIэми Iоф ашIэ. Мы мазэм и 15-м къыщыублагъэу Тэхъутэмыкъое район сымэджэщым джыри зы лабораторие къыщызэIуахынэу агъэнафэ.

Пандемием ебэныгъэнымкIэ респуб­ликэм IофшIэкIэ амал икъу зэрэIэкIэлъыр Адыгеим и ЛIышъхьэ къыхигъэ­щыгъ. Ащ дакIоу коронавирускIэ сыма­джэхэм зэряIазэхэрэмкIэ мэхэ чIыпIэу ылъытэхэрэми ягугъу къышIыгъ. Амбулаториехэм Iоф зэрашIэрэм идэгъугъэ хэгъэхъогъэн ыкIи IэзапIэхэм яIофшIэн агъэлъэшын фаеу КъумпIыл Мурат ылъы­тагъ. Медицинэм ылъэныкъокIэ еджэ­хэрэр сымаджэхэм зэпэчыжьэ IофшIэнэу адызэрахьэрэм нахь чанэу къыхэгъэлэ­жьэгъэнхэ зэрэфаем Адыгеим и ЛIышъхьэ игугъу къышIыгъ. Джащ фэдэу тест­хэр зэрауплъэкIухэрэ уахътэр нахь агъэкIэкIынэу ыкIи ахэм зэфэхьысыжьэу афэхъугъэхэр цIыфхэм нахь псынкIэу алъагъэIэсынэу пшъэрылъ къыгъэуцугъ.

«Мы лъэхъэнэ мыпсынкIэм амбулаторнэ шIыкIэкIэ зэIазэхэрэм ренэу ягъусэнхэм мэхьанэшхо иI. ЦIыфхэм зэхашIэн фае зэрапылъхэр ыкIи медицинэ IэпыIэгъу тэрэз агъотынэу щыт. Игъом узыр гъэу­нэфыгъэ зыхъукIэ ыкIи шIуагъэ къэзытырэ амбулаторнэ IэпыIэгъур ащ къызыкIэлъыкIокIэ, узым къин къыпыкIыным ищынагъо нахь ыгъэмэ­кIэщт, ар хэужъыныхьащтэп. IэзапIэхэм яIофшIэнрэ тестхэм яуплъэкIунрэ нахьышIоу зэхэщагъэхэ зыхъукIэ, ар шIэхэу къэлъэгъощт, сымэджэщхэм ателъ IофшIэнри нахь макIэ хъущт», — къыIуагъ КъумпIыл Мурат.

Вакцинэхэм яхэлъхьан шъхьафэу рыгущыIагъэх, анахьэу узыр къызыпыхьаным ищынагъо зышъхьащытхэм афэгъэхьыгъэу. Джырэ уахътэм ехъулIэу гриппым пэшIуекIоу апэ къащэгъэгъэ пстэури агъэфедэгъах, ятIонэрэу хэлъхьагъу мин 78,8-м ехъу республикэм къыфэкIуагъ.

Нэгу ихъохэмрэ Iалъэхэмрэ агъэфедэнхэ зэрэфаемкIэ цIыфхэм макъэ арагъэIу зэпытын, цIыфыбэ зыщызэрэугъоирэ чIыпIэхэм, джащ фэдэу джэгу­хэм, хьадагъэхэм, щынэгъончъэным ишапхъэ­хэр ащызэрахьанхэ зэрэфаер агу къа­гъэкIыжьынэу Адыгеим и ЛIышъхьэ къызэрэугъоигъэхэм анаIэ джыри зэ тыраригъэдзагъ.

Гъэсэныгъэм иучреждениехэм эпидемическэ шапхъэхэр ащагъэцэкIэнхэу, жьыр ащыукъэбзыгъэным тегъэпсыхьэгъэ Iофыгъохэр ащызэрахьанхэу афи­гъэпытагъ.

ЦIыфыбэ зыщызэрэугъоирэ чIыпIэхэм, транспортым ягъэкъэбзэн джыри къафагъэзэжьыщт, организациехэм Iоф ащызышIэхэрэм ащыщхэр зэпэчыжьэ IофшIакIэм тырагъэхьащтых.

Роспотребнадзорым иунашъохэр гъэ­цэкIагъэ зэрэхъухэрэм, зыныбжь илъэс 65-м шIокIыгъэхэмрэ сымаджэхэм алъы­Iэсыгъэхэмрэ яунэхэм къарымыкIынхэмкIэ шапхъэхэр зэрагъэцакIэхэрэм алъыплъэ зэпытынхэу Адыгеим и ЛIышъхьэ афигъэпытагъ.

АР-м и ЛIышъхьэ ипресс-къулыкъу. Сурэтхэр А. Гусевым тырихыгъэх