Адыгэ Республикэм и ЛIышъхьэу КъумпIыл Мурат хьыкум приставхэм я Федеральнэ къулыкъу АдыгеимкIэ и ГъэIорышIапIэ ипащэу агъэнэфэгъэ Александр Ихно тыгъуасэ IофшIэгъу зэIукIэгъу дыриIагъ.

Къулыкъум ыпашъхьэ щыт пшъэрылъхэм язэшIохын, ведомствэм иIофшIэн нахь шIуагъэ къытэу гъэпсыгъэнымкIэ амалэу щыIэхэм, нэмыкIхэм лъэныкъохэр атегущыIагъэх.

Республикэм ипащэ зэдэгущыIэгъум пэублэ псалъэ къыщищIызэ, къэралыгъо хэбзэ къулыкъухэм яструктурэ пштэмэ, ащ хьыкум приставхэм чIыпIэшхо зэрэщаубытырэр хигъэунэфыкIыгъ, анахьэу анаIэ зытырагъэтын фэе лъэныкъохэр къыгъэнэфагъэх.

— Къулыкъум пшъэрылъ шъхьа­Iэу иIэхэм ащыщ федеральнэ ыкIи шъолъыр бюджетхэм арагъэхьан фэе тынхэм яугъо­ин. МыщкIэ IофшIэныр гъэлъэшыгъэн, джащ фэдэу рес­публикэм ихэбзэ къулыкъухэм ведомствэм зэпхыныгъэу адыриIэр гъэпытэгъэн фае. Социальнэу мыухъумэгъэ цIыфхэм яфитыныгъэхэр къэухъумэгъэнхэм, кIэлэпIупкIэр, лэжьапкIэр игъом аIэкIэгъэхьэгъэным къулыкъур фэгъэзагъ. Тэ IэпыIэгъу тыкъышъуфэхъуным тыфэхьазыр, тызэгурыIоу Iоф зэдэтшIэным тыщэгугъы, — къы­Iуагъ КъумпIыл Мурат.

АР-м и ЛIышъхьэ къызэрэхигъэщы­гъэмкIэ, хьыкум приставхэм я Федеральнэ къулыкъу ипащэу Дмитрий Аристовым бэмышIэу Москва зыщыIокIэм къулыкъум хэхъоныгъэхэр ышIынхэм, непэрэ шапхъэхэм адиштэрэ амалхэр гъэфедэгъэнхэм яIофыгъохэм атегущыIагъэх.

ГъэIорышIапIэмрэ уплъэкIун ыкIи хэбзэухъумэкIо къулыкъухэмрэ язэпхыныгъэ гъэпытэгъэным, шIуагъэ къытэу Iоф зэдашIэным мэхьанэшхо яIэу къыхагъэщыгъ.

Адыгеим ихьыкум пристав шъхьаIэ ипшъэрылъхэр зыгъэцакIэрэм къызэриIуагъэмкIэ, илъэсэу тызыхэтым къулыкъум къэгъэлъэгъон дэгъухэр иIэх, тапэкIи IофшIэным ащ фэдэ екIолIакIэ фыряIэу лъыкIотэщтых.

Александр Ихно апшъэрэ гъэсэны­гъитIу иI, экономикэм илъэныкъо зэфэшъхьафхэм Iоф ащишIагъ. 2012-рэ илъэсым щыублагъэу хьыкум приставхэм ахэт. Адыгеим къагъэкIоным ыпэкIэ хьыкум приставхэм я Федеральнэ къулыкъу Красноярскэ краимкIэ и ГъэIорышIапIэ ипащэ игуадзэу щытыгъ.

АР-м и ЛIышъхьэ ипресс-къулыкъу.