Пандемием илъэхъан кIэлэеджакIохэри, кIэлэегъаджэхэри къиныгъуабэмэ яутэлIэнхэ фаеу, кIэлэегъаджэхэм урокхэр зэпэчыжьэ шIыкIэм тетэу атын фаеу хъугъэ. Ахэм яIоф къафэгъэпсынкIэгъэнымкIэ «Единэ Россием» фэлъэкIырэр зэкIэ ешIэ. ГъэсэныгъэмкIэ Министерствэм игъусэу федеральнэ телевизионнэ каналхэм ащыщ горэм ащ телеурокхэр ащызэхищэгъагъ.

Джащ фэдэу гъэсэныгъэмкIэ Министерствэмрэ стратегическэ инициативэхэмкIэ Агентствэмрэ ягъусэу Iоф­тхьабзэу «Помоги учиться дома» зыфиIорэр зэхищагъ. Сабыибэ, гъот макIэ зиIэ унагъохэм арыс кIэлэеджакIохэмрэ кIэлэегъаджэхэмрэ гаджетхэмкIэ агъэгушIуагъэх. Шъолъыр заулэмэ якIэлэегъа­джэхэм лимит зимыIэ интернетымкIэ фэгъэкIотэныгъэ зыхэлъ тарифхэр ара­тыгъэх. Къэплъытэн хъумэ, пстэумкIи кIэлэцIыкIу, кIэлэегъэджэ мин 500 фэдизмэ техникэ зэфэшъхьафхэр къа­IэкIэхьагъ.

Пандемием илъэхъан нахь макIэу Iоф ашIагъэу алъытэзэ, кIэлэегъаджэхэм ялэжьапкIэ къызэрэрагъэIыхыгъэмкIэ «Единэ Россием» тхьаусыхэ тхылъхэр къыIукIэгъагъэх. Мыщ дэжьми кIэлэегъа­джэхэм яфитыныгъэхэр зыпкъ рагъэуцожьыгъэх. Ахъщэ тегъахъоу ахэм афашIын фаем къыхэхъуагъ. ГущыIэм пае, «Единэ Россием» кIэлэегъаджэхэм къафыдихыгъ ЕГЭ-м имызакъоу, ОГЭ-м паекIи ахъщэ тегъахъо къаратынэу.

2020-рэ илъэсым ищылэ мазэ къыще­гъэжьагъэу программэу «Земскэ кIэлэегъадж» зыфиIорэр агъэфедэ хъугъэ. Президентэу Владимир Путиным ащкIэ «Единэ Россием» ипредложение къыдыригъэштагъ. Ащ къызэрэщыдэлъытагъэмкIэ, кIэлэегъаджэм зэтыгъокIэ сомэ миллион къыратыщт, Дальневосточнэ федеральнэ шъолъырым ит къоджэ псэупIэм, рабочэ поселкэм, къалэу нэбгырэ мин 50-м нэс зыдэсым щезыгъэджэнэу кIорэм сомэ миллионитIум нэс къыIукIэщт. Программэу «Земскэ кIэлэегъадж» зыфиIорэм хэлажьэхэмэ ашIоигъоу нэбгырэ мин 30 фэдизмэ заявкэхэр къатыгъэх.

КIэлэегъаджэхэм ялэжьапкIэ шъолъыр­хэм ащызэфэдизыным тегъэпсыхьэгъэ амалхэр партием зэрихьащтых. «Единэ Россием» зэрилъытэрэмкIэ, кIэлэегъа­джэм иоклад ащ илэжьапкIэ ипроцент 70-рэ фэдиз хъун фае. Джыдэдэм ар ипроцент 30 зэрэхъурэр.

«УплъэкIунхэм къызэрагъэлъагъорэмкIэ, шъолъырыбэмэ якIэлэегъаджэхэмрэ яврачхэмрэ яоклад лэжьэпкIэ анахь макIэм нахьи нахь цIыкIу, лэжьапкIэм ипроцент 30-м ар нэмысэуи мэхъу. ЖъоныгъокIэ унашъор гъэцэкIэгъэным пае пащэхэм кIэлэегъаджэхэр рагъэзых ставкэ 1,5 — 2-кIэ Iоф ашIэнэу, классхэм пэщэныгъэ адызэрахьанэу, факультативхэр зэхащэнэу», — къыIуагъ «Единэ Россием» и Генсовет исекретарэу Андрей Турчак. «Единэ Россием» ипроектэу «Новая школа» зыфиIорэм къыдыхэлъытагъэу кIэлэегъаджэхэм лэжьапкIэ къазэраратырэм хэбзэ икъу хэлъхьэгъэнымкIэ хэгъэгум ишъолъырыбэмэ предложениехэр къащахьыгъэх», — къыIуагъ партийнэ проектым икоординаторэу, Къэралыгъо Думэм идепутатэу Алена Аршиновам.

Джащ фэдэу «Единэ Россием» зэри­лъы­тэрэмкIэ, пащэхэмрэ IофышIэхэмрэ ялэжьапкIэ лъэшэу зэтекIынэу щытэп. Партием хэтхэм Урысыем икIэлэегъэджэ мин 810-у классхэм пэщэныгъэ адызезыхьэхэрэм Президентым къыгъэнэфэгъэ сомэ минитфыр къаIокIэмэ зэра­гъашIэ.

«Технологие пэрытхэр агъэфедэхэзэ, непэ Адыгеим еджэпIакIэхэр щагъэпсых, ыпэкIэ ашIыгъагъэхэми ахэупхъухьажьых. Джырэ шапхъэхэм адиштэрэ оборудование ахэм ачIэт. КIэлэеджакIохэм шIэныгъэ куу зэрагъэгъотынымкIэ, кIэлэегъаджэхэм яIофшIэн дэгъоу зэхащэнымкIэ ищыкIэгъэ амалхэр яIэх, — къы­Iуагъ федеральнэ партийнэ проектэу «Новая школа» зыфиIорэм икоординаторэу, республикэм и Къэралыгъо Совет — Хасэм идепутатэу Былымыхьэ Иринэ. — Гурыт еджапIэхэм кIэлэеджакIохэр ащагъашхэхэмэ, санитар шапхъэхэр къащыдалъытэмэ ауплъэкIу, классхэм пэщэныгъэ адызезыхьэрэ кIэлэегъа­джэхэм сомэ 5000 къаратымэ зэрагъашIэ. Ащ нэмыкIэу Адыгеим ис кIэлэегъаджэхэу классхэм пэщэныгъэ адызезыхьэхэрэм кIэлэеджэкIо пчъагъэу классым исым елъытыгъэу процент 13-м нэсэу компенсацие къараты».