Уголовнэ пшъэдэкIыжьэу ахьыщтыр
ЦIыфым ищыIэныгъэ ыкIи ипсауныгъэ апэшIуекIорэ бзэджэшIагъэ зезыхьэрэм уголовнэ пшъэдэкIыжьэу ыхьын ылъэкIыщтым икъэбар къалэу Мыекъуапэ ипрокуратурэ къеты.
2020-рэ илъэсым имэзи 8 пштэмэ, Мыекъуапэ щызэрахьэгъэ бзэджэшIагъэхэу УФ-м иуголовнэ Кодекс истатьяхэу 105-мкIэ — 3, 111-мкIэ — 11, 112-мкIэ — 27-рэ, 115-мкIэ — 24-рэ мэхъух.
ЦIыфым ылъэныкъокIэ зэрахьэрэ бзэджэшIагъэхэр куп-купэу зэтеутыгъэх. 115-р — псауныгъэм зэрарэу екIыгъэр бэп, 112-р — ишIэ хэлъэу гурыт зэрар ипсауныгъэ рихыныр, 111-р — ишIэ хэлъэу ипсауныгъэ зэрар хьылъэ рихыныр, 105-р — укIыгъэ Iоф.
Мы бзэджэшIагъэу зигугъу къэтшIыгъэхэм анахь щынагъоу ахэтыр цIыфыр укIыгъэныр ары. УкIыгъэ Iофэу зэрахьагъэр ашIэнэу зыкIэхъугъэм, чIыпIэм елъытыгъэу ар зэфэшъхьафэу уголовнэ хэбзэгъэуцугъэм щызэтефыгъ. ГущыIэм пае, зы нэбгырэ е нахьыбэмэ, жъалымыгъэ хэлъмэ, бзылъфыгъэ лъэрмыхьэ ыкIи гуIэгъу, лъышIэжь хэтэу бзэджэшIагъэр зэрахьагъэмэ илъэси 8-м къыщегъэжьагъэу 20-м нэс е къыгъэшIэщтым хьапсым дэсыщт.
Джащ фэдэу гущыIэ дысхэр къыраIозэ е кIуачIэкIэ къагъэщынэзэ, ыгу зэкIагъэплъыхьэзэ къыдэзекIохэмэ цIыфым зиухъумэжьын фаеу чIыпIэ ефэ. Психикэр зэщэкъошъ, цIыфыр еукIы. Ащ фэдэ хъугъэ-шIагъэхэм ахэфагъэм уголовнэ пщыныжьэу ыхьырэр илъэси 3 хьапс.