Урысые политикэ партиеу «Единэ Россием» къыфишIыгъэ пшъэры­лъыр ыгъэцакIэзэ, Къэралыгъо Думэм физическэ культурэмкIэ, спор­тымкIэ, туризмэмкIэ ыкIи ныбжьыкIэхэм яIофхэмкIэ и Комитет хэтэу Хьасанэкъо Мурат зыныбжь хэкIотагъэхэм я Дунэе мафэ ехъулIэу тинахьыжъхэр зыгъэгумэкIырэ социальнэ-правовой Iофыгъохэм за­щигъэгъозагъ.

Урысые политикэ партиеу «Единэ Россием» и Тхьаматэу Д. А. Медведевым ирегион обще­ственнэ приемнэу Адыгэ Респуб­ликэм щыIэм Iудзыгъэ шIыкIэм тетэу Iофтхьабзэр щыкIуагъ.

Республикэм исхэми, ихьа­кIэ­хэми псауныгъэм икъэухъу­мэнрэ пенсиехэмрэ япхыгъэ IофыгъохэмкIэ парламентарием зыкъыфагъэзагъ. ГущыIэм пае, район гупчэхэм ащыщ горэм дэсхэр гъогум къытехъухьэгъэ тхьамыкIагъом хэфыкъухьагъэм еIэзэгъэнымкIэ IэпыIэгъу къа­фэхъунэу елъэIугъэх. Мы IофыгъомкIэ Хьасанэкъо Мурат ащ лъыпытэу гъэцэкIэкIо хабзэм икъулыкъоу псауныгъэм икъэу­хъумэн пылъым зыфигъэзагъ.

Илъэс 30-м къехъукIэ кIэлэ­егъаджэу Iоф зышIагъэм фэгъэ­кIо­тэныгъэ зыхэлъ пенсие къыфагъэуцунымкIэ IэпыIэгъу къы­фэхъунэу депутатым зыкъыфигъэ­загъ. Бзылъфыгъэр Урысые Фе­дерацием пенсиехэмкIэ и Фонд ирегион къутамэ мызэу, мытIоу зэрэкIуагъэм зи къикIыгъэп. Мы Iофыгъом изэшIохын пае депутатым къулыкъу зэфэшъхьафхэм тхыгъэхэр афигъэ­хьыгъэх.

— Сэ сишIошIкIэ, депутатым пшъэрылъ шъхьаIэу иIэр цIыфхэм ишIуагъэ аригъэкIыныр ары. Непэ цIыфхэм зыкъызэрэсфагъэзэгъэ Iофыгъохэм язэшIохын­кIэ ашIэрэм сшъхьэкIэ гъунэ лъысфыщт, ахэм сишIуагъэ на­хьыбэу язгъэкIыным амал зэриIэкIэ сыпылъыщт. Зыныбжь хэкIотагъэхэр социальнэ-правовоеу ухъумэгъэнхэмкIэ хэгъэгуми, республикэми япащэхэм афэлъэкIыщтыр зэкIэ непэ ашIэ. Сэ ахэм зыкъысфагъэзэныр къызыхэкIыгъэр Iофыгъо заулэ­хэм язэшIохынкIэ къиныгъо го­рэхэр зэрэщыIагъэхэр ары, — къыIуагъ парламентарием.

КъэIогъэн фае гъэцэкIэкIо ха­бзэм ифедеральнэ, иреспуб­ликэ къулыкъухэр зэдеIэжьхэзэ мы Iофтхьабзэр зэрэзэхащагъэр.

Къандор Анзор. Урысые Федерацием и Федеральнэ ЗэIукIэ и Къэралыгъо Думэ идепутат иIэпыIэгъу.