Чъэпыогъу мазэу тызыхэхьагъэм бюджетым епхыгъэу Iоф зышIэхэрэм ялэжьапкIэхэм, пенсиехэм ыкIи нэмыкI социальнэ тынхэм ащыщхэм, ОСАГО-м иполис, нэмыкI лъэныкъохэм япхыгъэ зэхъокIыныгъэу федеральнэ хэбзэгъэуцугъэхэм афашIыгъэхэм кIуачIэ яIэ хъугъэ, нахьыпэкIэ аштэгъэгъэ шапхъэхэм ащыщхэр тырахыжьыгъэх.

Процентищ къахэхъощт

Бюджетым епхыгъэу Iоф зышIэхэрэм ащыщхэм ялэжьапкIэ мы мазэм процен­тищкIэ къафаIэтыгъ.

Ащ фэдиз къызфыхагъэхъуагъэхэм ащыщых федеральнэ пащэхэр, дзэ частхэм гражданскэ цIыфэу Iоф ащызышIэхэрэр, бзэджэшIагъэ зезыхьагъэхэм пшъэ­дэкIыжь ягъэхьыгъэнымкIэ Федеральнэ къулыкъум иорганхэм ахэтхэр, нэмыкIхэр. УФ-м и Президент «ижъоныгъокIэ унашъо» къыхиубытэхэрэм, гъэсэныгъэм, медицинэм ыкIи культурэм яIофышIэхэм мыр анэсырэп.

Пенсиехэмрэ ахъщэ тынхэмрэ

ПроцентищкIэ къаIэтыгъ дзэм къулыкъу щызыхьыхэрэм, полицием, Росгвардием, таможеннэ къулыкъум ыкIи ахэм афэдэ кIуачIэхэм ясатырхэм ахэтхэм ялэ­жьапкIэ.

Мы зигугъу къэтшIыгъэхэм ащыщэу пенсием кIуагъэхэм япенсиехэми ащ фэдиз къахэхъощт.

«Мир-м» нэмыкI зыпарэми агъэкIожьыщтэп

Джащ фэдэу чъэпыогъу мазэм и 1-м къыщегъэжьагъэу социальнэ ахъщэ тынхэм ащыщхэр «Мир» зыфиIорэ картэм нэмыкI зыпарэми агъэкIожьыщтхэп.

Мы шапхъэм къыхеубытэх дзэкIолIхэм е нэмыкI УIэшыгъэ КIуачIэхэм ясатырхэм ахэтыгъэхэм япенсиехэр, IофшIэпIэ чIыпIэ зимыIэхэр, кIэлэцIыкIухэр, радиацием иягъэ зэригъэкIыгъэхэм къаратырэ пособиехэр.

Ащ нахьыбэрэ къаратыжьыщтэп

Зэпахырэ узэу дунаир зэлъызыкIугъэм ыпкъ къикIыкIэ IофшIэпIэ чIыпIэр чIинагъэу, ащ пае пособие зыфагъэнэфэгъагъэхэм ащыщ­хэм чъэпыогъум и 1-м къыщегъэжьагъэу къаратыжьыщтэп.

Ащ къыхеубытэх 2020-рэ илъэсым игъэтхэпэ мазэ и 1-м ыуж зиIофшIэн зэпызгъэугъэ унэе предпринимателэу IофшIэпIэ чIыпIэ имыIэжьэу къэнагъэхэр ыкIи IофшIапIэ зэримыIэм пае пособие къыратыщтыгъэу, ау гъэтхапэм и 1-м ипIалъэ икIи ар зыфылъагъэкIотэгъагъэхэр.

Картэр ищыкIагъэ хъужьыгъэ

Зэпахырэ узэу дунаир зэлъызыкIугъэм ыпкъ къикIэу гъунэпкъэ гъэнэфагъэхэр зиIэ режимым тытехьаным ыпэкIэ ОСАГО-м иполис къэпщэфыным пае зипIалъэ имыкIыгъэ диагностическэ картэ бгъэлъэгъон фаеу щытыгъ.

Чъэпыогъум и 1-м къыщыублагъэу мы шапхъэми къыгъэзэжьыгъ. Мазэу кIуагъэхэм ар ымыIыгъэу полисыр зыгъэпсыгъэхэм чъэпыогъум и 31-м нэс страхованиемкIэ компаниехэм арахьылIэжьын фае.

Ащ имызакъоу, гъогу хъугъэ-шIагъэм зимысагъэ хэлъым идиагностическэ картэ ипIалъэ икIыгъэмэ, зэрарэу къыхьыгъэр ежь ыпщыныжьынэу страхованиемкIэ компанием къыIон фит.

Субсидиер къыуатыным пае

Тызыхэт илъэсым имэлылъфэгъу мазэ и 1-м къыщегъэжьагъэу псэупIэ-коммунальнэ фэIо-фашIэхэм апае субсидие къатыным фэшI лъэIу тхылъ птын имыщыкIагъэу, илъэсныкъо пIалъэкIэ ар лъагъэкIотэгъагъ. Чъэпыогъум и 1-м мы шапхъэми къыгъэзэжьыгъ.

Нахьыбэу птыгъэмэ…

НахьыпэкIэ цIыфым хэбзэIахьэу къыфа­лъы­тагъэм ехъоу ытыгъэр ар дэдэр ары ныIэп зыпэIуагъэхьажьыщтыгъэр. Джы федеральнэ хэбзэIахьэу къыфалъытагъэм ехъурэр шъолъыр е чIыпIэ хэбзэIахь горэм пэIуигъэ­хьажьын ылъэкIыщт. Ащ фэдэ ытын фаеу щымытымэ, тазыр е пеня темылъымэ, ехъугъэм къыфарагъэгъэзэжьыщт.

КIуачIэ иIэжьэп

Зэпахырэ узэу дунаир зэлъызыкIугъэм зимыушъомбгъуным фэшI цIыфхэр нахь макIэу зэхэхьанхэу зашIым, кIэлэцIыкIухэм мазэ къэс къаратырэ ахъщэ тыным пае ны-тыхэм лъэIу тхылъ атын имыщыкIагъэу унашъо къыдэкIыгъагъ.

Чъэпыогъум и 2-м къыщегъэжьагъэу ащ кIуачIэ иIэжьэп. Джы ахъщэ тыныр зыгъэпсымэ зышIоигъохэм лъэIу тхылъыр атын фае.

Джащ фэдэу ны-тыхэм чIыпIэу зыщыпсэухэрэр зэблахъугъэмэ, ащ ПенсиехэмкIэ фондымрэ социальнэ органхэмрэ ащагъэгъозэныр шIокI зимыIэ Iоф хъугъэ.

Ломбардхэм яIофшIэни…

Ломбардхэм афэгъэхьыгъэ законым зэхъо­кIыныгъэу фашIыгъэхэми чъэпыогъум и 12-м кIуачIэ яIэ мэхъу. Джы ахэм IофшIэгъу сыхьат пчъагъэу яIэм къыхэ­хъуагъ. Пчэдыжьым сыхьатыр 8.00-м къыщегъэжьагъэу 23.00-м нэсэу Iоф ашIэн фитхэу законым къыщеIо. Ау джы ломбардхэм пкъыгъоу къафахьыгъэм ыуасэу къалъытагъэм нахьыбэ чIыфэ къатыжьыщтэп, аIамыхыжьыгъэу сомэ мин 300 нахь лъапIэр зэIухыгъэ шIыкIэм тетэу зэхэщэгъэ щэнхэр ары ныIэп зыщыIуа­гъэкIын фаер.

КIэлэцIыкIум ыныбжь икъу­гъэмэ…

Чъэпыогъум и 12-м къыщыублагъэу IэкIыб къэрал къикIыгъэ ны-тыхэу, ыныбжь икъугъэу ыкIи Урысыем игражданствэ зэратыгъэ кIэлэцIыкIу зиIэхэм ежьхэми ар агъэпсыныр нахь псынкIэ афэхъущт. НахьыпэкIэ ащ фэдэ къызэрыкIо шIыкIэр ны-тыхэу Iоф зышIэн амал зимыIэхэр ары ныIэп зынэсыщтыгъэхэр.

ШхапIэхэм къащаштэн фитыжьхэп

Чъэпыогъум и 30-м къыщегъэжьагъэу кальян ыкIи никотин зыхэлъ пкъыгъохэр общественнэ шхапIэхэм къащамыштэжьыным фэгъэхьыгъэ законым кIуачIэ иIэ мэхъу. Хэутыным фэзгъэхьазырыгъэр ХЪУТ Нэфсэт.