Къэрэщэе-Щэрджэс Республикэм и ЛIышъхьэу Темрезов Рэщыдэ Адыгеим и МафэкIэ къыфэгушIуагъ. Мыщ фэгъэхьыгъэ тхыгъэ Инстаграм нэкIубгъом къыригъэхьагъ.
— Адыгеим и ЛIышъхьэрэ цIыфэу щыпсэухэрэмрэ республикэр загъэпсыгъэ МафэмкIэ сыгу къыздеIэу сафэгушIо! — къыщеIо тхыгъэм.
Культурэм игъэшIэгъоныгъэкIэ, тарихъ баеу ыкIи чIыопс дахэу иIэмкIэ зекIо мин пчъагъэмэ Адыгеир къызэрэхахырэр ащ къыхигъэщыгъ.
Адыгеим и ЛIышъхьэ ыкIи цIыфэу щыпсэухэрэм IофшIэнышхоу зэшIуахыгъэм яшIуагъэкIэ, социальнэ ыкIи экономикэ лъэныкъохэм хэхъоныгъэхэр ашIых. Анахь мэхьэнэ ин зиIэ лъэныкъохэу мэкъу-мэщыр, зекIоныр, промышленностыр къахэщырэмэ ащыщых.
— ХьакIэм зэрэпэгъокIыхэрэмкIэ, тарихъыр, шэн-хабзэхэр шIулъэгъуныгъэ афыряIэу зэрэзэрахьэхэрэмкIэ ткъош республикэу Адыгеим ыцIэ сыдигъуи чыжьэу Iущтыгъэ. Ахэр зэкIэ Къэрэщэе-Щэрджэсым щыпсэурэ нэбгырэ пэпчъ къыгурэIох ыкIи елъытэх.
Къэрэщэе-Щэрджэс Республикэм щыпсэухэрэм ацIэкIэ ыкIи сэ сцIэкIэ Адыгеим рэхьатныгъэ илъэу, тапэкIи игъэхъагъэхэм ахигъахъозэ псэунэу фатIозэ тыфэгушIо. Унагъо пэпчъ шIулъэгъуныгъэр, лъытэныгъэр ыкIи хахъор щыбэгъонхэу тафэлъаIо, — Инстаграм нэкIубгъом къыритхагъ Темрезов Рэщыдэ.
(Тикорр.).