Адыгеим ичIыгулэжьхэм къэкIорэ илъэсым Iуахыжьыщт бжыхьасэхэм гектар 111239-рэ арагъэубытынэу агъэнэфагъ. Ар 2019-м апхъыгъагъэм нахьи минитIу фэдизкIэ нахьыб.

АР-м мэкъу-мэщымкIэ и Министерствэ тызэрэщигъэгъозагъэмкIэ, коцыр гектар 88842-рэ зэрэхъущтыр. Ащ ипхъэн рагъэ­жьагъ, гектар 6521-рэ хагъэкIыгъах. Бжыхьэсэ хьэр Мыекъуапэрэ Адыгэкъалэрэ анэмыкIхэм зэкIэми ащыхалъхьащт. ПстэумкIи гектар 12402-рэ агъэнэфагъ, 4758-рэ хагъэкIыгъ. КIымафэр изыхыщт рапсыр халъхьэгъах. ПстэумкIи гектар 11136-рэ ар мэхъу. Джэджэ, Тэхъутэмыкъое ыкIи Шэуджэн районхэм ячIыгулэжьхэм тритикале апхъынэу агъэнэфагъ, пстэумкIи гектари 140-рэ зэрэхъущтыр.

Гъэтхэсэ гектар 102657-у халъхьэгъагъэм щыщэу 4600-м ехъу Iуахыжьынэу къэнагъэр. Ар чылапхъэ ашIыщт натрыфыр ары. ПстэумкIи гектар 24352-рэ хъущтыгъ.

Мыгъэ Адыгеим пындж гектар 9624-рэ щыхалъхьагъ. Ащ щыщэу 5304-р ары Iуахыжьынэу къэнагъэр. Ащ, гурытымкIэ лъытагъэу, центнер 43,7-рэ къырахы.

Тыгъэгъэзэ гектар 55069-рэ мыгъэ яIагъ, ар Iуахыжьыгъах. ГурытымкIэ лъытагъэу, центнер 21,6-рэ къырахыгъ, тонн 117800-м ехъу къаугъоижьыгъ.

Анахьыбэу къизыхыгъэр Джэджэ районым ичIыгулэжьхэр ары. Гектар 14163-рэ яIагъ, центнер 23,5-рэ, ари гурытымкIэ лъытагъэу, къытыгъ, тонн 33333-рэ мэхъу къаугъои­жьы­гъэр.

БылымIус ашIыщт натрыфыр зыщыхалъхьэгъагъэр Кощхьэблэ, Красногвардейскэ, Джэджэ, Мыекъопэ ыкIи Теуцожь районхэр ары. Гектар 1388-рэ хъу­щтыгъэ, ащ иIожьын аухыгъ.

Соери тичIыгулэжьхэм Iуа­хыжьыгъах. ПстэумкIи гектар 7081-рэ а культурэм рагъэубытыгъагъ, гурытымкIэ лъытагъэу, центнер 20,6-рэ къырахыгъ.

ХЪУТ Нэфсэт.