БлэкIыгъэ 2019-рэ илъэсыр къызихьагъэм къыщыублагъэу пенсием ыныбжь екIолIагъэкIэ алъытэхэрэм (предпенсионеры) фэгъэкIотэнхэр яIэ хъугъэ. Ахэм ахахьэхэрэр пенсием кIонкIэ илъэси 5 къызфэнагъэхэр ары. Мыгъэ пштэмэ, бзылъфыгъэу илъэс 52 — 57-рэ, хъулъфыгъэу — 57 — 62-рэ зыныбжьхэр арых ащ фэдэ статусым къыхиубытагъэхэр.

Мы купым хахьэхэрэм диспансеризацием пае IофшIэгъу мэфитIу аштэн фитых. IофшIапIэм ипащэ лъэIу тхылъкIэ зыфа­гъэзэнэу ары ныIэп ищыкIагъэр.

IофшIэпIэ чIыпIэр къязытыгъэр ушъхьагъу гъэнэфагъэ щымыIэу цIыфым ыныбжь пенсием зэрекIолIагъэм пае къы­IуигъэкIын фитэп. Ар зышIэрэм пшъэдэкIыжь ыхьынэу Уголовнэ кодексым къыщыдэлъытагъ.

Пенсием ыныбжь екIолIагъэу IофшIэпIэ чIыпIэр чIинагъэмэ, пособиеу къыратыщтыр адрэхэм аратырэм нахьыбэу УФ-м ихэбзэгъэуцугъэ щыгъэнэфагъ.

ХэбзэIахьхэм ятынкIи мыхэм фэгъэкIотэнхэр яIэх. ГущыIэм пае, чIыгу Iахьэу сотки 6 нахьыбэ мыхъурэм пае хэбзэIахь атыщтэп, ау ащ къехъурэм тефэрэр къыфалъытэщт. Джащ фэдэу зы унэ ыкIи зы фэтэр иIэмэ, тIумэ яз паи хэбзэIахьыр ытыщтэп.

Субъект пэпчъ мы купым хахьэхэрэм апае фэгъэкIотэн тедзэхэр егъэнафэх. Адыгеир пштэмэ, бзылъфыгъэу илъэс 55-м, хъулъфыгъэу — 60-м зыныбжь нэсыгъэр IофшIэным иветеранэу е ащ рагъапшэхэрэм ахэхьэмэ, мазэ къэс ахъщэ тын къыфэкIощт, ыпкIэ хэмылъэу цэхэр аригъэшIынхэу фитыныгъэ иI, транспортым пае хэбзэIахьэу къытефэрэм ипроцент 50-р ары ытыщтыр.