Адыгэ Республикэм ия 29-рэ илъэс фэгъэ­хьыгъэ мэфэкI зэхахьэхэр Мыекъуапэ гъэ­шIэгъонэу щыкIуагъэх.

Огу къаргъом тыгъэу щышIэтырэм инэбзый нэфхэм гур къагъэфабэ. ЦIыфхэр зэфэнэгушIохэу къалэм щызэIокIэх. Адыгэ Республикэм и Къэралыгъо филармоние ыпашъхьэ лъэпкъ зэфэшъхьафхэр щызэ­IукIагъэх.

ЗыкIыныгъэмрэ зэгурыIо­ныгъэмрэ япчэгу тIысыпIэхэр щагъэуцугъэх, концертым еплъы зышIоигъохэм яфэIо-фашIэхэр зэхэщакIохэм агъэцэкIагъэх.

Тызыщыпсэурэ Урысыем фэгъэхьыгъэ орэдымкIэ мэфэкI зэхахьэр къызэIуахыгъ. Адыгеим щыщхэу Хэгъэгу зэошхом илъэхъан лIыхъужъныгъэ зезыхьагъэхэм ацIэхэр пчэгум щэIух. Советскэ Союзым и ЛIыхъужъэу Нэхэе Даутэ фашист техакIохэм пхъашэу зэ­рязэуагъэр, Европэм ишъхьафитныгъэ зэрэфэзэуагъэр концертыр зезыщэхэрэм къаIуатэ. ЛIыхъужъым адыгэ къашъохэр лъэшэу ыгу рихьыщтыгъэх. Лъэпкъ къашъом идэхагъэ къы­риIотыкIыныр ащ икIэсагъ. Нэ­хэе Даутэ фэгъэхьыгъэ зэ­фэкIо дахэр артистхэм пчэгум къыщашIыгъ.

IофшIэным лIыхъужъныгъэ щызезыхьагъэхэм ацIэхэри зэхахьэм щагъэжъынчыгъэх, къашъохэр къафашIыгъэх, орэдхэр къафаIуагъэх.

Адыгэ Республикэм и Къэралыгъо Камернэ музыкальнэ театрэу Хьанэхъу Адамэ ыцIэ зыхьырэм иартистхэм тигуапэу тядэIугъ. Адыгеим изаслуженнэ артистхэу Елена Лепиховам, Ирина Кириченкэм, Виктор Марковым, нэмыкIхэм орэдхэр дахэу къаIуагъэх.

Жэнэ Къырымызэрэ Сэмэгу Гощнагъорэ зэдаусыгъэ орэдэу адыгэмэ яшэн-хабзэмэ яхьы­лIагъэр адыгабзэкIи, урысыбзэ­кIи Александр Мальцевым узы­Iэпищэу ыгъэжъынчыгъ.

ЛIыхъужъым иурам щыпсэу­рэм фэгъэхьыгъэ орэдыр Виктор Марковым къыIоу бэрэ зэхэтэхы. Артистым иIахьылхэр заом хэлэжьагъэх, лIыгъэу зэрахьагъэм рэгушхо.

Ирина Кириченкэмрэ ЛIый Бэлэрэ зэлъашIэрэ орэдэу «Синанэр» къызыхадзэм, концертым къэкIуагъэхэр адежъыугъэх. Адыгэ Республикэм изаслуженнэ артисткэу Ирина Кириченкэм адыгэ саер щыгъэу орэдыр адыгабзэкIэ къыIуагъ, адыгэ къашъор дахэу къышIыгъ.

«Си Кавказ» зыфиIорэ орэдыр Ирина Кириченкэмрэ Виктор Марковымрэ узыIэпащэу къаIуагъ, адыгэ къашъори ащ игъусэу къагъэлъэгъуагъ.

Мыекъуапэ ехьылIэгъэ орэдыр Елена Лепиховам къыхидзи, зэхахьэм хэлажьэхэрэр дежъыугъэх. Концертым Теуцожь районым культурэмкIэ иIофышIэхэри щыуджыгъэх.

Мыекъуапэ ипчэгу шъхьаIэу В. И. Лениным ыцIэ зыхьырэм республикэм имэфэкI щылъа­гъэкIотагъ. Адыгэ къэралыгъо университетым, нэмыкI еджапIэхэм шIэныгъэм ехьылIэгъэ къэгъэлъэгъонхэр щызэхаща­гъэх. КIэлэеджакIохэм сурэтхэр пчэгум щашIыгъэх, IэпэIасэхэм яIофшIагъэхэри гъэшIэгъонэу къагъэлъэгъуагъэх.

Ангелина Касумовам лъэпкъ­хэм язэпхыныгъэхэм, Кавказ яхьылIэгъэ орэдхэр къыIуагъэх.

Къэгъэлъэгъонхэр

ЗыкIыныгъэмрэ ЗэгурыIоныгъэмрэ япчэгу республикэм щыпсэурэ лъэпкъхэм ящыIакIэ къизыIотыкIырэ сурэтхэр къыщагъэлъэгъуагъэх. Тарихъым инэкIубгъохэм яхьылIэгъэ сурэт­хэр гъэшIэгъоных.

Республикэм искусствэхэмкIэ иколледж иеджакIохэм, кIэ­лэегъаджэхэм пчэгум сурэтхэр щашIыгъэх, «IэпэIасэм иеджапI» зыфиIорэр щызэхащагъ. Колледжым ипащэу Куфэнэ Щамсэт, Адыгэ Республикэм культурэмкIэ и Министерствэ иотдел ипащэу Шэуджэн Бэлэ зэхахьэм хэлэжьагъэх, зэдэгущыIэгъухэр еджакIохэм адыря­Iагъэх.

Республикэм иобщественнэ движениеу «Адыгэ Хасэм», Адыгеим щыпсэурэ къэндзалхэм якупэу «Дуслыкым» ахэтхэр, къэзэкъ шъуашэкIэ фэпэгъэ ныбжьыкIэхэр, волонтерхэм якупхэр мэфэкI зэхахьэхэм ахэлэжьагъэх.

Мыекъуапэ иурам шъхьаIэу Краснооктябрьскэм, къалэм изыгъэпсэфыпIэ парк лъэпкъ шIэжьым, культурэмрэ искусствэмрэ афэгъэхьыгъэ къэгъэлъэгъонхэр къыщызэIуахыгъэх. Паркым орэдхэр къыщаIуагъэх, щыуджыгъэх. Къалэм игупчэ Щытхъу пхъэм­бгъоу къыщызэIуахыгъэр медицинэм иIофышIэхэм яхьы­лIагъ.

— МэфэкIым цIыфыбэ зэфищагъ, — къытиIуагъ Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ. — Лъэпкъхэм языкIыныгъэ зэрэпытэрэр, Адыгэ Рес­публикэм хэхъоныгъэхэр зэришIыхэрэр мэфэкIым къыхэщыгъэх.

Мыекъуапэ дэт джэгупIэхэм кIэлэцIыкIухэм яуахътэ гъэшIэгъонэу, гум къинэжьынэу щагъэкIуагъ. Опсэу, Адыгэ Рес­публикэр! О уихэхъоныгъэхэм тэ тарэгушхо. Тинеущрэ мафэ нахьышIу зэрэхъущтым гукIи, псэкIи тыфэкIо. Сахьидэкъо Нурбый.

Сурэтхэр зэхахьэхэм къащытетхыгъэх.