Адыгэ Республикэм футбо­лымкIэ и Кубок къыдэ­хы­гъэ­ным фэгъэхьыгъэ кIэух ешIэ­гъур Мыекъуапэ щыкIуагъ.

Чъэпыогъум и 5-м республикэ стадионэу «Юностым» Адыгэкъалэрэ Кощхьаблэрэ яешIакIохэр щызэIукIагъэх. «Асбир» — «Интер» — 3:2.

ЗэIукIэгъур гъэшIэгъонэу кIуагъэ. Адыгэ­къалэ икомандэу «Асбирым» текIоныгъэр 3:I-у ыхьыщтыгъ. Къэлапчъэм Iэгуаор Хьатитэ Алый тIогъогогъо, Уджыхъу Рэмэзан зэ хъагъэм радзагъ.

Кощхьэблэ «Интерыр» бэрэ ыпэкIэ илъы­щтыгъ, ау пчъагъэм зэхъокIыныгъэ фи­шIын ылъэкIыщтыгъэп. «Асбирым» иешIа­кIохэр къэлапчъэм нахьыбэрэ даощтыгъэх. Къэлэпчъэпкъым Iэгуаор тырагъафэу къы­хэкIыгъ. ЛIэхъусэжъ Семенрэ Мамыжъ Му­ратрэ «Асбирым» икъэлапчъэ зырызэ Iэгуаор дадзагъ, пчъагъэр: 3:2.

ЗэIукIэгъур зыхьыщтыр нахь къэшIэгъуае зэрэхъугъэм зэнэкъокъур къыгъэдэхагъ. «Интер» гуIэм хэтэу ыпэкIэ илъыщтыгъ, ау «Асбирым» иухъумакIохэр цыхьэшIэгъоу ешIэщтыгъэх. А. Хьатитыр ошIэ-дэмышIэу ыпэкIэ илъызэ, кощхьаблэхэм яешIакIохэм рэхьат аритыщтыгъэп.

Командэхэм якъэлэпчъэIутхэр дэгъоу ешIагъэх, 3:2-у «Асбирым» текIоныгъэр къызыдехым, тренерэу Хьадпэшъо Аслъан гущыIэгъу тыфэхъугъ.

— Адыгэкъалэ иадминистрацие ипащэу ЛIыхэсэ Мыхьамодэ, къэлэ администрацием физкультурэмкIэ ыкIи спортымкIэ и ГъэIорышIапIэ ипащэу ХьакIэгъогъу Казбек, IофшIапIэу «Асбирым» ипащэу, тикоман­дэ испонсорэу ШъонтIыжъ Аслъан тафэраз, тхьаегъэпсэух, — къытиIуагъ Хьадпэшъо Аслъан. — Республикэм имэфэкI мафэ Адыгеим и Кубок къызэрэдэтхыгъэм фэшI спортым пыщагъэхэу къытфэгумэкIыхэрэм, тигушIуагъо къыддэзыгощыхэрэм лъэшэу тафэраз.

Республикэм физкультурэмкIэ ыкIи спортымкIэ и Комитет итхьаматэ игуадзэу Андрей Бородиныр, Адыгеим футболымкIэ и Федерацие итхьаматэу Николай Походенкэр, Мыекъопэ футбол клубэу «Зэкъошныгъэм» итренер шъхьаIэу Ешыгоо Сэфэрбый командэхэм афэгушIуагъэх, медальхэр, кубокыр, шIухьафтынхэр аратыжьыгъэх.

«Интерым» иешIакIохэу Пщыхъожь Ис­лъамрэ Пыщтыкъ Аслъанрэ, «Асбирым» иешIакIохэу Хьатитэ Алый, Иван Хатылевым, Артем Лаврик хэушъхьафыкIыгъэ шIу­хьафтынхэр афашIыгъэх.

Кубокым икъыдэхын фэгъэхьыгъэ ешIэгъухэр аухыгъэх. Адыгэ Республикэм изэ­нэкъокъу иятIонэрэ къекIокIыгъо хэхьэрэ зэIукIэгъухэр командэхэм шIэхэу яIэщтых. «Зэкъошныгъэм» итренер шъхьаIэу Ешыгоо Сэфэрбый къызэрэтиIуагъэу, республикэм изэнэкъокъу зэрэкIорэм лъыплъэщт, анахь дэгъоу ешIэхэрэм ащыщхэр командэм къы­ригъэблэгъэщтых.

Сурэтым итхэр: «Асбир» иешIакIохэу Кубокыр къыдэзыхыгъэхэр.