Адыгэ Республикэм щыпсэухэу лъытэныгъэ зыфэтшIыхэрэр! Ныбджэгъу лъапIэхэр!
Адыгэ Республикэм инахьыжъхэм я Советрэ иветеранхэм я Советрэ ахэтхэр агу къадеIэу мэфэкI лъапIэмкIэ — Адыгэ Республикэм и МафэкIэ къышъуфэгушIох!
Народнэ депутатхэм яхэку Совет идепутатхэм Урысые Федерацием хэхьэрэ Адыгэ Республикэ щыIэ зэрэхъугъэмкIэ макъэ къызагъэIугъэм ыуж илъэс 29-рэ тешIэжьыгъ. ТарихъымкIэ ар нэгъэупIэпIэгъу ныIэп, ау республикэ ныбжьыкIэмкIэ а илъэсхэу политикэ, культурнэ хъугъэ-шIэгъэшхохэр къызыщыхъугъэхэр лIэшIэгъухэм апеIэ. Къэралыгъо гъэпсынымкIэ, экономикэр нэмыкI гъогу тегъэхьэгъэнымкIэ къиныгъохэр зэпытчынхэ тлъэкIыгъ. ЩыIэныгъэм илъэныкъо пстэуми непэ зэхъокIыныгъэшIоу къащыхъухэрэм, тишэн-хэбзэ дахэхэр къызэтедгъэнэжьын, титарихъ-культурэ кIэн къэтыухъумэн зэрэтлъэкIыгъэм тарэгушхо.
Экономикэм хэхъоныгъэ егъэшIыгъэнымкIэ, цIыфхэм ящыIэкIэ-псэукIэ зыкъегъэIэтыгъэнымкIэ Урысыем и Президентэу Владимир Путиным пшъэрылъэу къыгъэуцугъэхэр гъэхъагъэ хэлъэу республикэм щагъэцакIэх. Республикэм истатус гъэпытэгъэнымкIэ Адыгэ Республикэм и ЛIышъхьэу КъумпIыл Мурати, хабзэм игъэцэкIэкIо, илIыкIо къулыкъухэми, обществэми Iофышхо ашIэ. Инвесторхэм ямылъку тиреспубликэ нахьыбэу къыхалъхьэ зэрэхъугъэр тинэрылъэгъу. Псауныгъэм икъэухъумэнкIэ, культурэмкIэ, народнэ гъэсэныгъэмкIэ, социальнэ Iофыгъохэм язэшIохынкIэ, туризмэмкIэ, унэхэмрэ гъогухэмрэ яшIынкIэ, къалэр нахь зэтегъэпсыхьэгъэнымкIэ, къуаджэм хэхъоныгъэ егъэшIыгъэнымкIэ, бизнес цIыкIумрэ гурытымрэ зягъэушъомбгъугъэнымкIэ мэхьанэшхо зиIэ проектхэр агъэцакIэх. Сабыйхэр нахьыбэу къэгъэхъугъэнхэм, IофшIэн зимыIэхэр нахь макIэ шIыгъэнхэм, гурытымкIэ цIыфхэм илъэс 80-м нэс къагъэшIэным, инвестициехэр нахьыбэу республикэм къыхалъхьаным атегъэпсыхьэгъэ программэхэр щыIэныгъэм щыпхыращых.
Граждан обществэм изэкъогъэуцонкIэ, лъэпкъ зэгурыIоныгъэр республикэм щыгъэпытэгъэнымкIэ нахьыжъхэми, лъэпкъ общественнэ движениехэми, нэмыкI движениехэми чанэу Iоф ашIэ. Адыгеим иавтономие ия 100-рэ илъэс къызыщыблагъэрэм ахэм обществэм изэкъогъэуцонрэ Урысыем хэхъоныгъэ егъэшIыгъэнымрэ кIуачIэу яIэр рахьылIэ.
Ныбджэгъу лъапIэхэр, мы мэфэкI мафэм Адыгэ Республикэм инахьыжъхэм я Советрэ иветеранхэм я Советрэ псауныгъэ пытэ, щыIэкIэ-псэукIэ дэгъу шъуиIэнэу, нахьышIум шъущыгугъызэ шъущыIэнэу, Урысыеми, Адыгейми апае шъуигухэлъышIухэр къыжъудэхъунхэу шъуфэлъаIо!
Ныбджэгъу лъапIэхэр, мэфэкI лъапIэмкIэ — Адыгэ Республикэм и МафэкIэ тышъуфэгушIо!
ГъукIэлI Нурбый. Адыгэ Республикэм инахьыжъхэм я Совет итхьамат, Къоджэ Аслъан. Адыгэ Республикэм иветеранхэм я Совет итхьамат.