Экономикэм хэхъоныгъэхэр ышIынхэм, социальнэ мэхьанэ зиIэ Iо­фыгъохэр зэшIохыгъэнхэм, шIуагъэ къэзытыщт федеральнэ ыкIи рес­публикэ программэхэр, лъэпкъ ыкIи къэралыгъо проектхэр щыIэ­ны­гъэм щыпхырыщыгъэнхэм, нэмыкI лъэныкъохэми республикэм ипащэ­хэм непэ чанэу Iоф адашIэ.

Непэ федеральнэ гупчэм къыгъэнэфэрэ программэхэм шъолъырыр ахэлэжьэным пае ежь имылъкуи ахэм ахилъхьан фае. Мы лъэныкъомкIэ Адыгеир субъект анахь дэгъухэм ахалъытэ, къытефэрэр зэкIэ шIокI имыIэу зэригъэцакIэрэм фэшI IэпыIэгъу тедзэ къыIэ­кIа­хьэ, ащ ишIуагъэкIэ псэо­лъа­кIэхэр ашIынхэ, зищыкIа­гъэхэм гъэцэкIэжьынхэр ара­шIы­лIэнхэ, муниципалитетхэм, цIыфхэм IэпыIэгъу афэ­хъунхэ алъэкIы. Республикэм иэкономикэ хэ­хъоныгъэхэр ышIынхэр, цIыфхэм ящыIэкIэ-­псэукIэ нахьышIу шIыгъэныр — джары Адыгэ Рес­публикэм и ЛIышъхьэу КъумпIыл Мурат пшъэрылъ шъхьаIэу къыгъэуцурэр.

Мы илъэсым дунаир зэлъызыкIугъэ коронавирусым ыпкъ къикIыкIэ къэралыгъохэм, шъо­лъырхэм чIэнэгъабэ ашIыгъ, экономикэм икъэгъэлъэгъонхэми къащыкIагъ. ГумэкIыгъохэр щыIэх нахь мышIэми, экономикэм, социальнэ лъэныкъом хэхъоныгъэхэр зэрашIыщтхэм республикэм ипащэхэр пылъых.

2020-рэ илъэсым имэзибл пштэмэ, псэолъэшIыным иIоф­шIэн сомэ миллиарди 6,7-рэ ауасэ зэшIохыгъэ хъугъэ. Зэ­кIэмкIи квадратнэ метрэ мини 110-м ехъу атыгъ.

Зэпахырэ узым мэкъумэщ хъызмэтым зыпари иягъэ ригъэкIыгъэп пIоми ухэукъощтэп. Ащ щылажьэхэрэм яIофшIэн зыпарэкIи къызэтырагъэуцуа­гъэп, лэжьыгъэ бэгъуагъэ къа­хьыжьыгъ. 2020-рэ илъэсым мэкъумэщ хъызмэтшIапIэхэм сомэ миллиард 25,8-рэ ауасэ продукцие къыдагъэкIыгъ.

Промышленнэ къыдэгъэкIыныри зыпкъ ит. АР-м экономикэ хэхъоныгъэмкIэ ыкIи са­тыумкIэ и Министерствэ къызэритыгъэмкIэ, ащ къыдигъэ­кIырэм ииндекс проценти 109-рэ фэдиз мэхъу. МыщкIэ Адыге­им Къыблэ федеральнэ шъо­лъырым пэрытныгъэ щиIыгъ.

Мы илъэсым иапэрэ мэзих республикэм ихъызмэтшIапIэхэм сомэ миллиард 29-рэ ауасэ товар къадагъэкIи IуагъэкIыгъ.

Шъолъырым иэкономикэ къы­халъхьэрэ инвестициехэр на­хьы­бэ шIыгъэным, республикэм проектышхохэр, анахьэу социальнэ мэхьанэ зиIэхэр, щыгъэ­цэкIэгъэнхэм, лъэпкъ ыкIи къэ­ралыгъо программэхэм шIуа­гъэу къатырэр къызфэгъэфе­дэгъэным Адыгеим ипащэхэр пылъых, ащкIэ къадэхъурэри бэ. Ау ащ къыщымыуцухэу ыпэкIэ лъыкIотэнхэ, къэгъэ­лъэгъонхэм аха­гъэхъон, федеральнэ гупчэм зэпхыныгъэу дыряIэр джыри нахь агъэпытэн гухэлъ яI.