ХэбзэшIу зэрэхъугъэу, чъэпыогъум и 1-м, нэжъ-Iужъхэм я Мафэ, ти­нахьыжъхэу, заом имашIо, ащ ыуж илъэс къинхэр къызэпызы­чы­гъэ­хэм, мамыр щыIакIэм къэралыгъом хэхъоныгъэ щегъэшIыгъэным зиIахь хэзылъхьагъэхэм Адыгеим ипащэхэр афэгушIуагъэх.

Илъэси 100-м зыныбжь нэсыгъэхэр е ехъугъэхэр ары зыдэжь еблагъэхэ хабзэр. Ащ фэдэ ныбжь дахэ къагъэшIа­гъэу Адыгеим нэбгырэ 26-рэ ис. Анахьыжъхэу Красногвардейскэ районым щыщ Гезал Ибрагимовамрэ Теуцожь районым щыпсэурэ Варяк Кесянрэ мыгъэ илъэси 110-м нэсыгъэх.

АР-м и ЛIышъхьэу КъумпIыл Мурат ыцIэкIэ ахэм афэгу­шIуагъэх ыкIи шIухьафтынхэр афашIыгъэх АР-м и Парламент и Тхьаматэ, идепутатхэр, Iоф­шIэнымкIэ ыкIи социальнэ хэ­хъоныгъэмкIэ Министерствэм илIыкIохэр, народнэ депутатхэм я Советхэм япащэхэр.

АР-м и Къэралыгъо Совет — Хасэм и Тхьаматэу Владимир Нарожнэр мы мафэм Джэ­джэ районым ит станицэу Келермесскэм щы­псэурэ Надежда Слюсаренкэм дэжь апэ кIуа­гъэ. Мыгъэ ащ ыныбжь илъэси 100 хъугъэ.

Надеждэ яни яти имыIэжьхэу кIэлэцIыкIу ибэхэр зыща­Iыгъхэ Унэм щапIугъ. Хэгъэгу зэошхор къызэпичыгъ, ащ зэхигъэтэкъогъэ къэралыгъом изэ­тегъэуцожьын хэлэжьагъ, илъэсыбэрэ былымхъуным пылъ хъызмэтшIапIэхэм иIофышIэ анахь чанхэм ащыщыгъ. Зы пшъашъэ ыпIугъ, пхъорэлъфищ ыкIи ахэм къакIэхъухьа­жьыгъэхэр иIэх.

Нэужым Парламентым ипащэхэр Кощхьэблэ районым ит къуаджэу Блащэпсынэ щыIагъэх. Ахэр ихьэкIагъэх мыгъэ зыныбжь илъэси 102-рэ хъугъэ Ожъ Баблинэ.

Ар унэгъо Iужъу къихъухьагъ. Ипкъэгъу-лэгъухэм афэдэу я 30-рэ гъэблэ илъэсхэр, Хэгъэгу зэошхор, ащ ыуж къикIыгъэ къиныгъохэри къызэпичыгъэх. Ишъхьэгъусэрэ ежьыррэ пшъа­шъэ къаIахи апIугъ, пхъорэлъф­хэм анэмыкIэу ахэм къакIэхъу­хьажьыгъэу нэбгырипшI яI. Ахэм Баблинэ ащэгушIукIы, арэгушхо.

Владимир Нарожнэр нанэхэм ямэфэкIкIэ афэгушIуагъ, шIу­хьафтынхэм­рэ къэгъэгъэ Iэрам­хэмрэ аритыгъэх. Тиветеранхэм, пенсионерхэм, зэкIэ тинахьы­жъэу къэралыгъом, Адыгее цIыкIум хэхъоныгъэу ышIыгъэ­хэм зиIахь хэзылъхьагъэхэм тирэзэныгъэ гущыIэ фабэхэмкIэ къафитIотыкIынэу нэжъ-Iужъхэм я Мафэ джыри зы амал къызэ­рэтитырэр ахэм къыхагъэщыгъ.

ХЪУТ Нэфсэт.